1 Egyu Dafidi e kpèlè Isareli bɛndɩrɛ powu e tuma Yerusalem ditele daanɩ. E kpèlè ifoli-ifoli fɔ yɩɩ bɛndɩrɛ, ma bɩtà bʋʋ bɛtàlɛ akpi-akpi gɛtɛ bɛɛ mɛ gʋtʋn bɛ tɛ egyu-dɩrɛ fɔ bɔɔ bɛndɩrɛ, ma bɩtà bʋʋ bɛndɩrɛ gɛtɛ bɛɛ nya bɩtà bʋʋ bɛtàlɛ nkpɩn ton-ton boo koro, ma ɛbɛ gɛtɛ bɛɛ nya bɩtà bʋʋ bɛtàlɛ akpilin ton-ton boo koro fɔ, ma bɛndɩrɛ gɛtɛ bɛɛ nya egyu-dɩrɛ ma wo bebi-teni boo koro gaanyan ma bɔɔ bɛnan boo koro fɔ, fɩya ma bɛnɩ gɛtɛ bɛɛ mɛ gʋtʋn digyu-kpaara daanɩ fɔ, ma ɔkɛma wʋʋ bɛnɩ, ma bɩtà bʋʋ bɛtàlɛ gbaa-gbaa e tuma.

2 Ɛwʋ gɛ egyu Dafidi ɛ tɔ e yela, gɛ ɛ dɔ̀ alan, <<Mɩɩndɩrɛ ɛbɛ ma mɩɩn bɛnɩ, ɩ nʋn maakʋn. Na len nan sere dɩkpaara gɛtɛ dàà mɛ Yahwe Dikola dɩɩ dɩdaka fɔ dɩɩ gɛdʋrɔkʋn ma Wurubwarɛ bɩsɩrɩ buu gekyikyakʋn. Gɛ na wɛrɛ tɩyɛ dii gesere gaade na sɩ̀. 3 Mɔ Wurubwarɛ ɛ dɔ̀ mɩ alan, <Nka awɔ nan sere Dikwo a tɛ mɩ bɛnɩ bàà sʋma mɩ daanɩ, yema à di gɛ bɩtà bʋʋtàlɛ, gɛ a wolo bɛnɩ kpekpesi.> 4 Mɔ fɔ, nmɩ gɛ Yahwe, Isareli wo Wurubwarɛ fɔ e tiri e ye mɩɩn dɩkpaara powu daanɩ gɛtɛ nan mɛ egyu-dɩrɛ gakpaakpa. E tiri Yuda wofoli gɛtɛ wàà mɛ ofoli-gyegeyelɛ, gɛ ye Yuda wofoli waanɩ fɔ, e tiri miinte dɩkpaara, gɛ ye miinte bebi-teni baanɩ fɔ, maade na di wɔ gʋnʋn gɛtɛ nan di bugyu n tɛ Isareli powu. 5 Yahwe ɛ tɛ mɩ bebi-teni kpekpesi, gɛ e tiri Solomon gɛtɛ ɛ̀ɛ̀ sara Wurubwarɛ bugyu bʋʋ gɛbɩya fɔ gii koro. 6 Ɛ dɔ̀ mɩ alan, <Aabi Solomon nan sere miin Dikwo-dɩrɛ fɔ ma daakpaara, yema na tiri wɔ gɛtɛ ɛ̀ɛ̀ mɛ miinbi, gɛ nmɩ mɔ nan mɛ wote. 7 Gengyi è ton maade-tɩyɛlɛ-sɩ̀lɛ fɔ, ma mii-ise fɔ yaanɩ anlɛ gɛtɛ è de yɩ nkenkele lɛ fɔ, nan yɛ wo bugyu buu gedi bàà sere ɩkpaa gakpaakpa.

8 <<Okoro, ntɛ tabʋrʋ n tɛ ɛyɩ Isareli bɛndɩrɛbi, Isareli bete powu gɛtɛ ɛbɛ n di Yahwe bɛnɩ fɔ bɔɔ bʋnʋn, gɛ Wurubwarɛ mɔ ɛɛ nʋn fɔ alɛ ɩ nya gepepe gɛtɛ yàà tɛrɛma Yahwe, tii Wurubwarɛ fɔ wo-ise, fɔ gɛtʋnkwaa-kpara nyagɩ gàà bɔ gɩ mɛ yiiyo, fɔ ɛyɩ mɔ yàà kere gɩ ɩ ya tɛ yiidu wʋʋ bɛnɩ gɛtɛ bàà ba fɔ wàà bɛ mɛ boo gedikʋn gakpaakpa.

9 Gɛ awɔ miinbi Solomon, nyɩnla aatu ɛbɛ boo Wurubwarɛ fɔ, fɔ àà ka aaturu powu, ma dɩmɩnlɛ-kɩlɩn sʋma wɔ. Yema Yahwe ee we oturu-kamasɛ waanɩ, gɛ ɛ̀ nyɩ̀ ɛnɩ-kamasɛ wamɩnlɛ. Gengyi à bugiti wɔ fɔ, aà we wɔ, gɛ gengyi à fi gama a ten wɔ fɔ, eè kere wɔ ɛ ya gakpaakpa. 10 Nkele nyɩnla alɛ Yahwe e tiri wɔ̀ gɛtɛ àà sere Dikwo-dɩrɛ gɛtɛ dì di wo dikwo fɩrɩnfɩrɩn fɔ. Okoro yela kin-kin, fɔ àà mɛ gʋtʋn fɔ.>>

11 Gɛ Dafidi ɛ ka Dikwo-dɩrɛ fɔ dɩɩ kpata, ma daakwo, ma daanyan yɩɩ gɛsɩ̀kʋn, ma dɩɩ gatala gaakwo, ma dɩɩ gamɩ gaakwo, ma Ɔkʋn-dɩrɛ wʋʋkʋn-dɩrɛkʋn fɔ yii geserebi gɛtɛ ɛ ta fɔ ɛ tɛ wobi Solomon. 12 Gɛlɛ ke gɛ ɛ ka Yahwe Dikwo-dɩrɛ fɔ dɩɩ dɩkpaara dɩɩ gɛmɛ daade gɛtɛ Yahwe gifiye gɩ ka gɩ sa wamɩnlɛ yaanɩ powu fɔ, ma akwo gɛtɛ i silin i tuma fɔ, ma Wurubwarɛ Dikwo-dɩrɛ daanyan-gbaa-gbaa yɩɩ gɛsɩ̀kʋn fɔ, ma anyan gɛtɛ be tiri bɛ sɩ̀ tɛ Yahwe yɩɩ gɛsɩ̀kʋn yii geserebi yɩɩ gɛta ɛ tɛ Solomon. 13 Gɛlɛ ke e wùlà wɔ anlɛ gɛtɛ ɛ tɩyɛ ade ɛ sɩ̀ kadama gedi gɩɩ bɛtɛlɛ baakpi fɔ, ma Lefi bete, ma dɩsʋma dɩɩ gʋtʋn-kamasɛ gɛtɛ baà mɛ Dikwo-dɩrɛ daanɩ fɔ, fɩya ma anyɩmɩnyan powu gɛtɛ baà ka bɛ mɛ gʋtʋn fɔ. 14 Dafidi e wùlà Solomon sɩka-sɩya gɛtɛ baà ka bɛ mɛ sɩka wanyan gɛtɛ baà ka bɛ mɛ bʋtʋn kperen-kperen fɔ wʋʋdʋrʋ, ma sɩka-fututu gɛtɛ baà ka bɛ mɛ sɩka-fututu wanyan gɛtɛ baà ka bɛ mɛ bʋtʋn kperen-kperen fɔ wʋʋdʋrʋ. 15 E wùlà wɔ sɩka-sɩya wʋʋdʋrʋ gɛtɛ baà ka bɛ mɛ bɛkandɩya bɔɔ gɛgyagakʋn, ma yɩɩ bɛkandɩya, ma sɩka-sɩya wʋʋdʋrʋ gɛtɛ baà ka bɛ mɛ bɛkandɩya bɔɔ gɛgyagakʋn-kɩlɩn ma gɩɩ bɛkandɩya. Gɛlɛ ke gɛ ɛ dɔ̀ wɔ sɩka-fututu wʋʋdʋrʋ gɛtɛ baà ka bɛ mɛ bɛkandɩya bɔɔ gɛgyagakʋn, ma yɩɩ bɛkandɩya, ma sɩka-fututu wʋʋdʋrʋ gɛtɛ baà ka bɛ mɛ bɛkandɩya bɔɔ gɛgyagakʋn-kɩlɩn ma gɩɩ bɛkandɩya, anlɛ gɛtɛ wàà sara ma anlɛ gɛtɛ baà ka kandɩya-kamasɛ bɛ mɛ gʋtʋn fɔ. 16 E wùlà wɔ sɩka-sɩya wʋʋdʋrʋ gɛtɛ baà ka bɛ mɛ sɩka-sɩya wɔkpʋlɔ-kamasɛ gɛtɛ bɛɛ ka Wurubwarɛ wo boroboro bɛ gyaga wuu koro, ma sɩka-fututu wʋʋdʋrʋ gɛtɛ baà ka bɛ mɛ sɩka-fututu wɔ-ɩkpʋlɔ fɔ. 17 E wùlà wɔ sɩka-sɩya-kpara wʋʋdʋrʋ gɛtɛ baà ka bɛ mɛ bɩnyanɩ maabo gɛtɛ bʋ̀ ba alobi, ma bɛtasa-ŋwanlɛ nkalan, ma isunbi. E ni wùlà wɔ sɩka-fututu wʋʋdʋrʋ gɛtɛ baà ka bɛ mɛ sɩka-fututu gikunbi-kamasɛ. 18 Gɛlɛ ke gɛ e ni wùlà wɔ sɩka-sɩya-kpara wʋʋdʋrʋ gɛtɛ baà ka be sere olifwi wuu gedi gɩɩ gɛtɛ̀kʋn. Gɛ ɛ nɩ ka tiiramisan fɔ, gɛtɛ wù di sɩka-sɩya wo tiiramisan ɛbɛ gɛtɛ bɛ yaraba baabanban be tin Yahwe Dikola dɩɩ dɩdaka fɔ, wʋʋ gɛtabi ɛ tɛ wɔ.

19 Gɛ Dafidi alan, <<Yahwe na yɛ gɛ na talɩ na ŋwara ade nyayɩ, gɛ ɛ yɛ mɩ na nʋ̀n anlɛ gɛtɛ baà ka be sere dikwo fɔ powu waanɩ.>>

20 Gɛ Dafidi e biri ɛ dɔ̀ wobi Solomon alan, <<Yela kin-kin, fɔ àà wura oturu, fɔ àà mɛ gʋtʋn fɔ! Kara yɛ gɩsaa gàà ton wɔ̀ abɛɛ koro gàà yɔ wɔ̀, yema Yahwe Wurubwarɛ, miin Wurubwarɛ fɔ ɛ̀ fɩya ma awɔ. Ɛn nan yɛ wɔ̀ àà nʋ̀n, gɛ ɛn nan kere wɔ̀ ɛ ya, ka ma sere gɛtɛ Yahwe Dikwo-dɩrɛ fɔ dii gesere dɩɩ gʋtʋn powu gàà were. 21 Gedi gɩɩ bɛtɛlɛ baakpi-akpi fɔ ma Lefi bete bɛ wɛrɛ tɔ bɛ̀ sa tɛ Wurubwarɛ Dikwo-dɩrɛ fɔ dɩɩ gʋtʋn-kamasɛ gɩɩ gɛmɛ. Gɛ ɛnɩ-kamasɛ gɛtɛ ɛ̀ nyɩ̀ adawʋ ɩkɩ yɩɩ gɛsa, gɛ ee len fɔ, ɛɛ̀ kpà wɔ̀ gʋtʋn fɔ powu gaanɩ. Gɛ ade-kamasɛ gɛtɛ aà dɔ̀ fɔ, gɩfɩɩ gɩɩ bɛndɩrɛ ma bɛnɩ fɔ powu baà nʋn aakʋn.