1 Samuel 24

David Ɔtã Saul Ɔwe Ngbã

1 Gɔ Saul ɔsɛ ɔ̃akpɛ̃gu ma Filistise ɔkpese ɔba kama ne, maɣere wũ sɔ, "David pia i En Gedi Fafuĩ ame." 2 Ne ɔso Saul ɔsu makpakpɛ̃dze ma nlɛ maɖo kukpi kutɛ ma maɖi i Israel kaɖe ɔɖuɖu ame. Ne makɛlɛ masɛ mato manyɔnyɔ David gu ɔ̃ maturi i Kupututepuĩ Ata kɔrɛ.

3 Ɔsɛ ɔba masɛrɛrrerɔ̃ sikpã dzɛ mpia i ɔri kuruɛ iso, ɔkpolo ɔwɛ̃ pia i mmɔ, ne Saul ɔkɛlɛ mmɔ sɔ ɔ̃asɛ ɔdziriso. David gu ɔ̃ marɛrɛ̃ ana ɔwe i ɔkpolo kame isɛ dzoroo. 4 Ne David marɛrɛ̃ ɔɣɛ siwɔwɔi sɔ, "Nɔme nɖe iyi nɛ iso i Bosate ɔɖeika ku ɔwi wɔ ɔɣere-ɔ sɔ, 'Loasu fɔ tsirise lopia-ɔ i nrɔɔ̃ ame sɔ abara wũ lɛ abie.' " Ne David ɔkpɛ̃ pɔkɔsɔɔ ɔkɛlɛ ɔsɛ ɔ̃atu Saul awu tagbaraa wa ɔpia kutsueti kasɛi gɔ Saul iitsue.

5 Ne kama David kaɣere ɔɖaa wũ gbaã alasɔ ɔtu Saul awu kutsueti 6 Ɔɣere ɔ̃ maturi sɔ, "Bosate daatã me ɔri sɔ loabara ne igbã i wũ sate, ɣee lotara kɔrɔ̃ losia wũ iso; ala nwɔ i Bosate ɔsɔla nnɔĩ ɔɖe ɔso." 7 David ɔsu atɔ̃me wagbe ɔsɛ̃ ɔtã ɔ̃ maturi sɔ madaata mabo i Saul iso. Ne Saul ɔrui i ɔkpolo kɔrɛ ɔɣo ɔri ne. 8 Ne David ɔbɔrɛ i ɔkpolo ame ne ɔlakulu ɔkpere Saul sɔ, "Igara, wũ sate!" Gɔ Saul ɔpɛ ɔfiriki ɔnyɔ kama ne, David ɔbɔitikarɔ̃ fiɛ ka ɔkɔlɛ ɔfu ku anɔ i karɔ̃. 9 Ɔɣere Saul sɔ, "Be ɔso ato akã atsue gɔ maturi to maɣɛ sɔ, 'David to ɔbie teteree sɔ ɔ̃aɖoe-ɔ'? 10 Nɔme ne ɔɔnya kumɛgɔ i Bosate ɔsu-ɔ ɔpia me i nrɔɔ̃ ame i ɔkpolo ame. Mawɛ̃ ɔɣere me sɔ loɖoe-ɔ, ɣɛɛ lonyua-ɔ; loɣɛ sɔ, 'Loibatara kɔrɔ̃ losia i wũ sate iso, alasɔ nwɔ i Bosate ɔsɔla nnɔĩ ɔɖe.' 11 Nyɔ, tete, nyɔ fɔ awu tagbaraa kasɛi ga nto i kɔrɔ̃ ame! Lotu kã loɖi i fɔ awu tagbaraa kutsueti iso ɣɛɛ loiɖoe-ɔ. Kiniɔ ne nɔkarɔ̃ si atsue sɔ lona adzuni sɔ loabara-ɔ iraboa ɣee lota loya-ɔ iso. Loiɣɛrɛ-ɔ, ɣɛɛ ato agbere me si aɖoe me. 12 Bosate si ɔɣɛ itɔ̃me i bo gu-ɔ ndɛ̃. Bosate si ɔti-ɔ kuso i aranyanyariã wa ato abara me iti, ɣɛɛ loibabara-ɔ kuira. 13 Lɛ kumɛgɔ masɛ maɣɛ kokooko sɔ, "Maturi nyanyariã nsɛ mabara aranyanyariã,' ne ɔso loibabara-ɔ kuira.

14 "Nna i Israel igara ɔbɔrɛ si ɔmɔɛ̃? Nna ato ati kama? Lona kuɣa lɛ kpɛkpɛ kpia ɣee toto. 15 Bosate si ɔɖe bo tɔ̃meɣɛdze si ɔɖaɛ itɔ̃me i bo gu-ɔ ndɛ̃. Ɔbo i itɔ̃me ame si ɔfɔ me, si ɔɖi ɔte sɔ loiɣɛrɛ si ɔfɔ me i fɔ nrɔɔ̃ ame."

16 Ɔwi wɔ i David ɔro nnɛgbe iɣɛ ne, Saul ɔkarɛ sɔ, "Wũ ɔbi David, fɔ silɔ siɖe i mmɔ?" Ne ɔtsɛ ibiɛ teteree. 17 Ɔɣɛ sɔ, "Ase bɔlɔlɔ aɖo me, ɔɔbara me isɛɛ ɣɛɛ lobara-ɔ ilalaa. 18 Kiniɔ kere aɣere me isɛɛ nɛ abara me, Bosate ɔsu me ɔpia-ɔ i nrɔɔ̃ ame, ɣɛɛ aiɖoe me. 19 Si ɔturi ɔnya ɔ̃ tsirise ne, ɔsɛ ɔnyua wũ ɔrui kere sɔ ɔ̃ibabara wũ iraboa? Bosate si ɔtã-ɔ kuso kukaakɔ i kumɛgɔ abara me nɔme. 20 Loɣe sɔ gbaã ne ato aaɖe igara fiɛ Israel sigarakaɖekɔ̃ aya i fɔ nrɔɔ̃ ame. 21 Kiniɔ ne kã ndamu i Bosate iso tã me sɔ aibawɔra wũ ɔkparɛ ɣee anukutu wũ iyere i wũ ɔse iyomaturi ame."

22 Ne ɔso David ɔkã ndamu ɔtã Saul. Ne Saul ɔkpese ɔkɛlɛ kaa, ɣɛɛ David gu ɔ̃ maturi ɔrui makɛlɛ kawɛrɛkɔ̃.