1 Yasuuꞌa ikwiriyaatayeeh itamna malu waliikiyaayt, eejin haay isfarꞌaneet hadꞌaayi bareeh yhii. Tilhanaywa igwalyaawwa kasseeh haay mheeleeneet hadꞌaayi yhii.

2 Aan baraah ilinguuma itamna malooyi sima ikatiina: hankaab Siimoon, Bitrus atoosmaabwa oosan Andaraawooswa, Yaaguub Sabadi oorwa, oosan Yuuhannaawwa, 3 Fiilibuswa, Baartulamaawooswa, Toomaaswa, Mattaab utilbaat lakkatanaawwa, Yaaguub Alfaaꞌiyoosi oorwa, Taddaawooswa, 4 Siimoon Ufaariswa, Yahuuda Iskaaryuuti barooh itilwa iiktiin.

5 Een itamna malu Yasuuꞌa een ibhali sooyaayt giigisiya, "Ijintiili bitik baahiireeraana, tari Saamiraayeet madiina han baashuumaana. 6 Laakiin Israaꞌiileeb yꞌargina ikwidhaab beena. 7 Giigteenihoob, toon tudiigwat bhaliiyaana, ‘Tibreeteet hadꞌaayi dawiltu.’ diina! 8 Oodehay eelhaab mheelaana, yꞌayaab shidhhanna, oobhadh ibariin sinhasna, eejin firꞌana. Balaashii tiyheena akay baraak han balaashii hiina. 9 Ijiibaayeekna dimꞌaraab geebookna baayaksaana, ashteet baayaksaana, tari baloob baayaksaana. 10 Tꞌiibaabtii dehaay shantaat baayaksaana, tari malu halaka baayaksaana, gidhꞌaat baayaksaana, kwoolay baayaksaana. Ishagaamana teena tiyhariwneet imeerneet toonaati.

11 Madiinaat tari dhiwaab shuumteenihoob, beentooy takweet ibari tak hariwna, giigteeneeb ookiik aree bariiyooh ugawiib sꞌana. 12 Oogaw shuumteenihoob, dabaay salaamaana. 13 Uugaw astehaliiniyeek umꞌasguukna kehii badaayi. Biiꞌastehalayeek, umꞌasguukna dehookna itꞌagiir ikati. 14 Daayiib baaꞌashiishookna ootak, tari ibhalyeekna baasinaakiir ootak, oogaw tari tumadiina hooy giigteenihoob, iragadaayeekna falfuut dehaay nifꞌana. 15 Oosdik andi hookna: whukwim ikatiyeet tooyin beet tumadiinaatiika Sadoomwa Gamooraaywa uudehay laamaka jasa dehaay iikti indi.

16 Ani bareek yꞌargina ikarayi bitik eefeen tꞌiiteeb akay giigsani hookna. Aflaay ikwakwaraayeet nabꞌa ginꞌaayeeb akeena, aree ikwibheeriyaayeet asgaab akeena.

17 Udehayii digwagwna, baraah whaashi suurkina nuuni hookna iyadna. Iyahuudi diini gawaayeeb aree iithibꞌa hookna iyadna. 18 Anii sabbii yhaakmaawwa yhadꞌaayi suuriiwwa haay yꞌi hookna iyadna. Bareehwa Ijintiiliiwwa kehii badehiib tikatiini jillaay haay yꞌi hookna iyadna. 19 Laakiin baraah yꞌabikneeyookna oodoor baraak naan tiyadneeb tari kak tiyadneeb haay baahasiikna. Been oodoor naan tiyadneeb ittiyiw tiyadna. 20 Been oodoor yhadiideen bareek kitteena. Laakiin Baabiyaakna Aashuuk hadiideen.

21 Been oodoor uusan usanooh isoodiir, ubaaba wꞌoorooh, yꞌar ibaaba ashoosami iyadna, malya isuudir iyadna. 22 Anii sabbii uudehay kassaah iirib hookna iyadna. Laakiin wꞌagiya ookiik akirti ingadiib uutak iidhhan indi. 23 Mhiin gaalnaay amaag iwariinuukna weer haash beeti dhaabaana. Oosdik andi hookna: Wꞌaadami Oor baayꞌi baraak Israaꞌiileet timadiinaati bitik whiireerti faaysi kitdiina.

24 Ukwiriyaataayi ukoojaayiisoohka fagarkaab kiiki. Ukishiya han wꞌankwanaayiisoohka fagarkaab kiiki. 25 Ukwiriyaataayi ukoojaayooh nadiir ikatiyeet tuuna mhatni. Ukishiya han wꞌankwanaayooh nadiir ikatiyeet tuuna mhatni. Ugawi weeli Baꞌalsabuul ittiyoodiyeek, aree indhiwaayaah kina kak amaagkaab ituusim iyadna!

26 Aflaay bareeh baarakwiina. Kwabaasna baalawayt kitehaay, tari dhꞌimaana atookkaani baadiit kitehaay. 27 Ani uthibniib sooyaniyeetookna toona, baraak oombꞌi bhaliiyaana. Yꞌangwileeyookna hadiidamtiniit toona igawaayi kehii sooyaana. 28 Baliib ubashar eedir baarakwiina, baraah ubashar eedirna nuun eeshuuk kiidirna. Laakiin Oongaal ubasharwa eeshuukwa mhalleeh toonꞌi danꞌiib rikwiina. 29 Malu kilay dabalooyaab malu girshaayee itdaliibna. Laakiin Baabuukna biihariiweek, gaal han bareesooh whaashi kehii dhibi kiidi. 30 Igirmaayiitaakna tehamu han taakna atdhagwgwiyaata. 31 Aflaay baarakwiina, baraak gwida kilayeeka alyakaabaana.

32 Udehayi suurii aniib bhaliiyiiniibka, ani tibreeteeb Baabiyu suurii haay bhaliiyi andi. 33 Laakiin udehayi suurii aneeb ittawiibka, ani han Baabiyu suurii tibreeteeb barooh ittiw andi.

34 Ani toobuuti kehii mꞌasig akwasiyi jillaay yꞌaab baahiisaana. Ani mꞌasig akwasiyi jillaay yꞌaab kaaki. Laakiin bꞌadhdhi jillaay yꞌaabi. 35 Ani khilaaf akwasiyi jillaay yꞌaabu,

wꞌoorwa ubaabaawwa,

tꞌoorwa toondeewwa,

tudoobaawwa tehamtoohwa, eebtik khilaaf akwasiyi jillaay yꞌaabi.

36 Ootak yꞌayaydaah ashoosami iyadna.

37 Baabooh tari deetooh aniika gwidakaab areeyiiniibka, anii geeb takweet kiibari. Wꞌoorooh tari tꞌootooh aniika gwidaka reer areeyiiniibka, anii geeb takweet kiibari. 38 Aree usaliibooh yakseetiit aneeb baaraam uutakka, anii geeb takweet kiibari. 39 Umidhhanooh manriibka kwidhsi indi, anii jillaay umidhhanooh kwidhsiiniibka aree midhhan imaar indi.

40 Bareek agbiliiniibka aneeb han agbiliini. Aneeb agbiliiniib aree aneeb diigwatiyaab han barooh agbiliini. 41 Unabi nabiib ikatiyi sabbii anshiishka, unabii ijir imaar indi. Ootak ooshboob shibooti jillaay anshiishka, shibu takii ijir imaar indi. 42 Een bareeh idabalooyaayeeb gaal, anii kwiriyaataayi ikatiyi sabbii lꞌa yameet kwibbaayi han gwꞌasiiniib, oosdik andi hookna, baruuh wꞌijrooh iitnaw kiidi." idi.