1 Beet tooyin tookna, Yasuuꞌa ugawii ifirꞌat ubhari daraag isꞌa. 2 Winneet gwida dehay barooh ikwilalni immarraayna aree baruuh falluukaat yꞌam aree batiiyooh kehii isꞌa. Uudehay aaraw kassaah iyami dariib ingadna. 3 Malya Yasuuꞌa oodehay gwidaana mitaalee sooya, "Dirꞌaatkina teeraayooh iigidee dehaay giigiya. 4 Baruuh iteera teeraayee, habbaat gat salaliib dhibiyaan. Aree aakilay eeyaaniit aamiyaani idꞌiin. 5 Habbaat warit awi hooy iifiyi mhiin dhibiyaan. Aree oomhiin gwida haash hooy kiihaay. Whaash hoogaab kiikayt tehabba willa yakta. 6 Laakiin tuuyin tifirꞌihoob, tifuuti gadam kitbari akay balamtaayt tilaw. 7 Teera weer naweeti bitik dhibiya, aree yakiyanihoob tinawi iskitni idirna. 8 Laakiin shalikt habba daayi haashiib dhibiyaaniit, sheeb doora harroob haay eeyaan. Aree weer asagwir tamuun doora iikti, aree weer mhay tamuun doora iikti. 9 Angwil ibariib, baꞌiimsaw." idi.

10 Ikwiriyaatay bariiyooh dehaay eeyaaniit raatiyaana, "Oodehay naanhooy mitaalee tinfariida?" idiin.

11 Yasuuꞌa igwibi, "Tibreeteet hadꞌaayeetiib kwabaast tunaatiit kanaant, bareekna attiyeewiyaatu. Laakiin bareeh attiyeewiyaat kitti. 12 Ibariibka gwidaana ittiyiw indi, gwidaana aree imaar indi. Naat baabariibka aree, tuuna baruuh ibariyeet hooy giigi tindi. 13 Oon usabbii aree bareeh mitaalee anfariid. Baraah ishabibneek han, karhiyaan. Eemsiiwneek han, kiisinaakirna tari kaꞌafhamiyaan.

14 Unabi Isyaas bareeyoohna isrideet tuuna iikti tindi:

‘Baraak diimaab teemsiiwna laakiin door han kaꞌafhamtaana.

Baraak diimaab tishabibna laakiin door han karhitaana.

15 Oon oodehayi ginꞌa yꞌakirna,

yꞌangwileehna dhadhibisiyaana,

aree igwꞌadeehna assiyaan.

Bak biikaayeek, igwꞌadeesoohna rhiin iiktiin,

yꞌangwileesoohna eemsiiw iiktiin.

Iginꞌaayee afhamiin iiktiin.

Aree aneeb beeti itꞌigirneek ani bareeh mheeli.’ idi.

16 Laakiin bareekna igwꞌadaakna rheena, aree yꞌangwilaakna eemsiiwnayt, libaabtaana. 17 Ani oosdik andi hookna: baraak rhitaaneet toona gwida nabiyaawwa shibu dehaywa rhitiib yhariwna. Laakiin rhaab kiikeena, aree baraak timaasiwneet toona yhariwna laakiin maasiwaab kiikeen.

18 Baraak aflaay iteeraayanaay mitaal sinaakirna: 19 Tehadꞌaayeetiit diigwat maasiwtiit baaꞌafhamay, maagti kina dehaay yꞌeetiit uginꞌiib teeraamaat toona hooy tafiini. Uun aree iteera usalaliib dhibiyaab ikati. 20 Uutak wꞌawii mhiin dhibtaat tehabba nuunamiiniib, baruuh Ukwaasanaay bhali maasiwtiit gaal door afirhaa nuunamiini. 21 Laakiin baruuh gadam kiibari akay shalik door oobhaat hangiit. Ukwaasanaay ibhaliyi sabbii gwirha tari amaag wara yꞌiiniyihoob, baruuh willa fidinti dhibiini. 22 Uutak tinaweeteeb dhibiyaab iteera nuunamiiniib, baruuh Ukwaasanaay ibhali eemsiiw. Laakiin tuduniyaati gwirhaawwa, oomraayi reerwa barooh isakitna aree naat samaraat kiidꞌi. 23 Laakiin uutak iteera daayi haashiib dhibiyaanaay nuunamiiniib, baruuh Ukwaasanaay ibhali maasiwtiit afhamiini. Baruuh harroob haay yꞌiini, sheeb, asagwir tamuun tari mhay tamuun doora gwidakaab ikati." idi.

24 Yasuuꞌa bareeh wari mitaal sooya, "Tibreeteet hadꞌaayi ootak daayi haashiib teeraayaab tꞌiiteeti. 25 Laakiin baraah gaalka diwee, barooh yꞌashooyaah eeyaaniit igamhi bitik adaar teeraayaaniit giigiyaan. 26 Igamhi yakiyaayt girmaab ifirꞌihoob, wꞌadaar han lawiya.

27 Udirꞌaatkinaay ishagaamana bariiyooh dehaay eeyaaniit, ‘Duuruun, tudirꞌaatiyook daayi teera teeraayaab kitta han? Wꞌadaar aflaay naa mhiinii eeya?’ idiin.

28 Baruuh ‘Toon toona wꞌashooyu iweer.’ idi.

Ishagaamana barooh raatiyaana, ‘Hinin diftiit wꞌadaar fataktiib hoon harriiwa?’ idiin.

29 Baruuh ‘Abadan, baraak wꞌadaar fatakee, igamhi geeb fatakteena. 30 Ishna dꞌiina oowaak ookiik mhallaahna hiddaab bayakiin. Been oodoor iwookana sooyi andi, Hankaab wꞌadaar wiknaat gaal mhiin hakwirnaat liwna! Malya igamhi dibilnaat ugiisaay daasaana iyaad andi.’ diyaabu udirꞌaatkina." idi Yasuuꞌa.

31 Yasuuꞌa bareeh wari mitaal dehaay hadiidiya, "Tibreeteet hadꞌaayi isinfaayt habba tak yakisiyaayt dirꞌaatiyooh teeraayaneet tꞌiiteeti. 32 Batuuh kasteeh tehabbaateeka diskaat tikatiyeek han, tinwiinihoob laakiin tudirꞌaati hindiyeeka winkaat tikati. Aflaay aakilay tibreeteeb dhaabeen yꞌeetiit ilꞌiidaayeeb naayi iyadna." idi.

33 Yasuuꞌa aree masi wari mitaal bareeyooh dehaay hadiidiya, "Takat hamiir yaksitaayt gwida bꞌuuk hooy tishaaw, aree kassooh wꞌajiin tisehamir. Tibreeteet hadꞌaayi batooh tꞌiiteeti.

34 Yasuuꞌa kasteeh teen teena mitaalee bareeyooh dehaay hadiidiya. Mitaal anu bareeh naat han sooyaab kiiki. 35 Aflaay unabi geebii hadiidamaat tuuna sidik tiikti:

‘Uyafu mitaalee iingil andi,

tuduniya daamtaneekka kwabast teena hadiidi andi.’ diyaabu." idi Yasuuꞌa.

36 Malya Yasuuꞌa oodehay hooy giigiyaayt, oogaw shuumiya. Ikwiriyaatayaah bariiyooh dehaay eeyaaniit, "Tudirꞌaatiib eefeeb wꞌadaari mitaal sooyaa hoon." idiin.

37 Yasuuꞌa "Iteera udaayiib teeraayaab uutak Wꞌaadami Oor ikati. 38 Tudirꞌa tuduniya tikati, aree iteera udaayi tehadꞌaayeeti ar ikatiin. Wꞌadaar aree wꞌamaag dehayi ar ikatiin. 39 Wꞌashu been wꞌadaar teeraayaab aree oobliis ikati. Uuwaak aree udamaani agiya ikati, iwookana aree imalak ikatiin.

40 Wꞌadaar fatakeetiit nꞌeetiib itooliiwnaayt, aflaay been udamaani agiyaay bak iikti tindi. 41 Wꞌaadami Oor imalakeeh diigwatiini, aree baraah baliib toomaagwa igwirhaawwa isidꞌiin kasseeh, tehadꞌaayeetiisooh wꞌadaariit fataki iyadna. 42 Imalak een bareeh akraat nꞌeetiib iigid iyadna. Baraah waawi iyadna, igirmaayeehna toobuut haay iithꞌa iyadna. 43 Malya uudehay aashbu Baabiitoohna tehadꞌaayeetiib tooyin tꞌiiteena talawi iyadna. Angwil ibariib, baꞌiimsaw.

44 Tibreeteet hadꞌaayi dirꞌaatiib kwabaas miraay tꞌiiteeti. Tak batooh manriyihoob, masi kwanbiiska afirhaa giigiini. Malya kassooh oomraay danliibka beet tudirꞌa dilibti iniin.

45 Masi, tibreeteet hadꞌaayi alya jawhar harriiw tijaar tꞌiiteeti. 46 Baruuh alya taman manriyihoob, diftiit ibariiyeenaaka kastooh danliibka jawhar iniin.

47 Masi tꞌa han, tibreeteet hadꞌaayi tushabaka yameeb atoogidaat kasseeh yꞌaashooyi jinsa tꞌanbiik tꞌiiteeti. 48 Batuuh titabihoob, yꞌaashoob aabki ifirꞌaniit iyami dar daasiyaan. Malya baraah isꞌaniit yꞌaashu idaayiib hooy waasiyaaniit biilii daasiyaan. Laakiin yꞌaashu yꞌamag fidnaab hooy geediyaan. 49 Tuun wꞌaakhar damaaniib bak iikti indi. Imalak yꞌeetiit oodehay yꞌamag eeshboobnaayee wawaasi iyadna. 50 Malya bareeh winneet akraat nꞌeetiib iigid iyadna. Beentooy baraah waawi iyadna, igirmaayeehna toobuut haay iithꞌa iyadna.

51 Baraak teen teena kasteeh afhamtaana?" idi Yasuuꞌa.

Baraah "Awooh." idiin.

52 Yasuuꞌa bareeyooh dehaay, "Aflaay whaggi kooja kassaah tibreeteet hadꞌaayi soomamiyaana, ugawi kina umikhsaniisooh gayi miraaywa shꞌiiya miraaywa mhaliiniib tꞌiiteena tikatiyeet toona soomamiyaan." idi.

53 Yasuuꞌa een eemtaal faaysiyanihoob, been umhiinii giigiya. 54 Baruuh whaashiitooh tumadiina eeyaayt, oodehay Iyahuudi diini gawiib allamtiib badooya. Baraah aree winneet ajjabamiyaan. Baraah "Uun uutak teen tifagarandiiwwa timꞌuujisaati akrirwa keeya mhiin imri? 55 Uun baruuh unajjaari oor kiiki han? Toondi Maryam kiidiin han? Yaaguubwa Yuusifwa Siimoonwa Yahuudaawwa sanaayeeh kiikeena han? 56 Taakwa kastaah geeboon kiihaayna han? Teen teena kasteeh uun uutak keeya mhiinii haay eeya?" idiin. 57 Aflaay baraah barooh iribna.

Laakiin Yasuuꞌa bareeyooh dehaay, "Unabi whaashiitooh tumadiinaatiibwa ugawooh ooknaaywa oobhaat whamooysiti kiimri." idi.

58 Baraah wꞌiimaan biibariini sabbii, Yasuuꞌa gwidaat mꞌuujisa kwaasaab kiiki.