1 Yasuuꞌa masi bareeh mitaalee bhaliisamiya. 2 Baruuh "Tibreeteet hadꞌaayi: whadꞌa wꞌooriyeeh doobeeb diraar isoomiir tꞌiiteeti. 3 Baruuh oodehay tꞌaduumaatii dehaay waliikamaab waliikti jillaay ikishiyaayeeh diigwatiya. Laakiin uudehay wꞌaay iribna.

4 Malya baruuh gal wari kishiya istoobiit, ‘Been oodehay ani waliikaab akatiyeeb sooyaana, oodiraar asoomir. Yoobwa dhha shꞌaayeewwa harada, aree naatka takwaakwtu. Idoobeet aduumaatii dehaay mꞌaana!’ diina.

5 Laakiin uudehay sinaakiraab kiikeena, aree giigiyaan. Gali dirꞌaateehna ibeena, aaraw shanhoohna ibeen. 6 Ibaagi bariiyeeh ikishiya yꞌabikna, amaag iweerniit idaarna. 7 Whadꞌa winneet yhasi. Ikajareeh diigwatiyaayt, baliin imadoora idaar, aree tumadiinaatoohna iliw idꞌi.

8 Malya ikishiyaayeeh dehaay, ‘Idoobeet aduuma amaartu, laakiin baliin ani waliikaneeb wꞌaay kaꞌastehaliyaan. 9 Isalalaayi rikwnaayeeb sakaanaat timeerni nafarka tꞌaduumaatii dehaay waliikaana.’ idi. 10 Aflaay ikishiya isalala ibeeniit, oodehay yꞌimiirneeb kasseeh idbilna. Wꞌamaagwa udaayiibwa kasseeh haay eeyaaniit, idoobi gaw amnaab itibna.

11 Laakiin whadꞌa yꞌamnaayi shibuubii dehaay eeyanihoob, beentooy doobi halaka akwaay baakaay tak rhiya. 12 Whadꞌa ootakii dehaay, ‘Wꞌaraawuun, tooy doobi halaka akwaay baakaay kak eeta?’ idi. Uutak tim iki.

13 Malya whadꞌa oodehay ishagaamana bhaliisamiya, ‘Ootak yꞌayeehwa iragadaahwa hakwirna, aree barraab uthibniib gidna. Baruuh beentooy waawi indi, aree ugirmaayooh toobuut haay iithꞌa indi.’ idi.

14 Gwida waliikamaaba, laakiin shalik waasamaaba." idi.

15 Aflaay Ifariisi giigiyaaniit, barooh bhaliyeeb haay isꞌibikni sharakiib shagaamiyaan. 16 Baraah ikwiriyaatayeehna Yasuuꞌii dehaay ifdigna, Heeroodisaayi han geeb iifiin. Baraah "Seedna, baruuk Ukwaasanaay usalal sidik allamtiniyeet toona nikteen. Uudehay aaraw naan eekwinneeb hooy kitehalaaga. Oodehay aaraw aayga ikatiineeb haay kashagaamta. 17 Aflaay sooyaa hoon, irꞌayaak naanaata? Iroomaani Gaysar titilba dehaay nifarꞌeet tuuna daayiit han kitti? Sooyaa hoon." idiin.

18 Laakiin Yasuuꞌa baraah niyaamiineet tumaagnaay ikan, aree bareeyooh dehaay, "Baraak yharay ar, naanhooy sharakiib tikwsitiib jarrabteenheeb? 19 Imhallaga titilba haay tikweesneeb haay mꞌaana." idi. Baraah diinaar dehaay haay eeyaan. 20 Yasuuꞌa bareeh raatiya, "Aan aay fiira? Aree uun aay simu?" idi.

21 Baraah "Gaysariiba." idiin.

Aflaay baruuh bareeyooh dehaay, "Gaysar, Gaysariit toona hiina, Ukwaasana aree Ukwaasanaayt toona hiina." idi.

22 Baraah een imaasiwnihoob, winneet ajjabamiyaan. Aflaay barooh yꞌishniit fidnaab giigiyaan.

23 Beet tooyin Sadduuki ooyak haay baaꞌaamanaya, Yasuuꞌaab raattii dehaay eeyaan. 24 Baraah "Seedna, Muusa sooyi hoon, ‘Tak firaay anu iyaayyeek, usanuuh bariitooh tootakat ibakii indꞌiir, aree bariiyooh dehaay firaay fanri.’ diyaabi. 25 Oontꞌa asarama sana geeboon iifiin. Usuurkina idꞌirayt iiya, baruuh ar kiibari akay, tootakatooh usanuuh idꞌir. 26 Oosan umalya han tuun tuuna dehaay tiikti, umhayaay wꞌasarama ookiik aree tuun tuuna tiikti. 27 Malya batuuh tiya. 28 Aflaay ooyaki bꞌi toon tootakat kassaah idꞌirneet aayt takat iikti tindi?" idiin.

29 Yasuuꞌa bareeyooh dehaay, "Baraak aglitaabaana, baraak eektab kitkanna, tari Ukwaasanaay akrir kitkanna. 30 Ooyaki bꞌi kiidꞌirna tari kiisidꞌirna, baraah tibreeteeb imalak tꞌiiteeb ikatiin. 31 Laakiin yꞌayaani uyaktiib, Ukwaasana sooyaneetookna toona agriiyaab kitteena han? 32 Ukwaasana ‘Ani Ibraahiimiib Ukwaasana akati, Isehaagi Ukwaasana, Yaaguubi Ukwaasana.’ diyaabi. Baruuh oodehay yꞌayaanaayi Ukwaasana kiiki, laakiin oodehay idhhaniinaayi Ukwaasana ikati." idi Yasuuꞌa.

33 Uudehay igwida een imaasiwnihoob, bariiyooh wꞌallamtiib ajjabamiyaan.

34 Laakiin Ifariisi Yasuuꞌa Isadduuki dinsiyaneet toona imaasiwnihoob, hiddaab immarraayna. 35 Gaal bareesooh, whaggi kooja iiktiib, toon toona raatiyaayt jarrabiya. 36 Baruuh "Seedna, Muusaay whaggiib keetaat wasi winkaat tikati" idi.

37 Yasuuꞌa bariiyooh dehaay, "Wꞌankwana Ukwaasanaayook kassooh uginꞌiisook, kasseeh infiseesook, kassooh ugirmaayiisook, areeyaa! 38 Tuun batuuh tiwasi tehankaaneetu aree toowinkaat tikati. 39 Tumalya batooh tꞌiiteetu; ushawwook ugarooyiitook areeyaa. 40 Kassuuh whagwa inabiyaawwa teen tiwasi timalooteeb hakwara." idi.

41 Ifariisi hiddaab ammarariya iifiineet midda, Yasuuꞌa bareeh raatiya, 42 "Baraak Umasiihiib naan teekwinna? Baruuh aay ooru?" idi.

Baraah "Umasiih Daawidi Oor ikati." idiin.

43 Yasuuꞌa bareeyooh dehaay, "Aflaay Daawid Eeshuuk Imugaddasaayee bhaliiyihoob, barooh ‘Wꞌankwana’ naanhooy waliiki? Baruuh indi,

44 ‘Wꞌankwana aniib Wꞌankwanaay dehaay:

yꞌashooyeek iragadaayeek whii

akwasiyeeb ookiik,

aniib umaygwadii dehaay sꞌaa!’ idi.

45 Aflaay Daawid barooh, ‘Wꞌankwana’ waliikiyeek, baruuh kak oorooh ikati?" idi Yasuuꞌa. 46 Gaal han adgiriit bariiyooh dehaay kalmaat gwibiyaab kiiki. Aree beet tooyintii gaal han ashꞌaraa masi weena barooh raataab kiiki.