1 Oontꞌa oodehay igwidaab rhiyanihoob, Yasuuꞌa oorba reewiyaayt nꞌati isꞌa. Ikwiriyaatayaah dehaay eeyaan. 2 Baruuh bareeh allamtiib badooya:

3 "Libaabiyaan baliin ishuukee aniw,

tibreeteet hadꞌaayi bareetooh tikati.

4 Libaabiyaan baliin iwaaween,

Ukwaasana bareeh shaawti isꞌiikakir indi.

5 Libaabiyaan baliin imiskiina, baraah toobuut kwasaami iyadna.

6 Libaabiyaan baliin tushbootii dehaay yꞌitehariigwwa yꞌityawiinwa,

baraah gabi iyadna.

7 Libaabiyaan baliin yꞌarhameen,

baraah rhamaat imaar iyadna.

8 Libaabiyaan baliin iginꞌaayaahna nhas ikatiineeb,

baraah Ukwaasana rhi iyadna.

9 Libaabiyaan baliin mꞌasig ikwasiin,

Ukwaasanaay ar ituusim iyadna.

10 Libaabiyaan baliin tushbooti jillaay amaag itweeriin,

tibreeteet hadꞌaayi bareetooh iikti tindi.

11 Libaabtaana baraak, ani sabii, uudehay neeween hookna, amaag iwariin hookna, kastooh toomaag kehookna iyadna. 12 Midhadhna, afirhaana, win halageen tibreeteeb tibariina. Inabiya suurookna iifiin han bak bareetookna amaag itweeraayna.

13 Baraak whaashi miilakaana. Laakiin umiilak udꞌamooh eetniiweek, malya kak miilak dꞌamiini? Shaawti naat kaꞌanfꞌiya, itoogiid uudehay eeteen.

14 Baraakna tuduniyaati nuur tikatiina. Madiinaat ribaay kehii teefeet kitkwibas. 15 Uudehay lambaat baloolsiit biilii whii kadaasiyaan. Laakiin tageega mhiin daaseena, aree kasseeh oodehay ugawiib daayeen yꞌastini. 16 Baraak han bak, unuurookna oodehayi suurii buubsaana. Baraah tushbootookna rheen ikatiina, aree Baabookna tibreeteeb eefeeb yhamidna." idi Yasuuꞌa.

17 Yasuuꞌa "Ani Muusaay whagwa inabiyaayi kitabwa anꞌiishi jillaay yꞌaab baahiisaana. Bareeh anꞌiishi jillaay yꞌaab kaaki, laakiin bareeh sidik akwasiyi jillaay yꞌaabi. 18 Oosdik andi hookna, tuubuutwa taabreewwa kwidheeneeb ookiik, gaal harif han hooy kwidhi kiidi. Gaat galamiit nikwta han hooy kwidhi kitdi. Naatka timmiimtiniyeeb ookiik whaggii naat han kwidhi kitdi. 19 Teen tiwasi gaat han kantꞌi uutak, wari dehay bak idꞌaneet toona allamiiniibka, tibreeteet hadꞌaayeetiib oodiskaab ituusim indi. Laakiin teen tiwasi haay shagaamiiniib malya aree allamiiniib tibreeteet hadꞌaayeetiib oowin ituusim indi. 20 Ani andi hookna: tushbootuukna Ifariisiiwwa whaggi koojaawwa hasamti bitdiiyeek, sidik tibreeteet hadꞌaayi shuumi kitdiina.

21 Shꞌiiya door oodehay, ‘Baadirna, dehay indiirka haakamami indi.’ diyee timaasiwna. 22 Ani andi hookna: oosan sabab anu imhasiibka, haakamami indi. Masi usanii dehaay ‘Baruuk amaagwa’ indiibka, umajlisi suurii waliikami indi. Laakiin ‘Baruuk afraywa’ indiibka, toonꞌi jahannam daayi indi. 23 Baruuk Wꞌankwanaayt karaama fanrꞌihoob, usanuuk naat gaat kehook ibariyeet toona shꞌaa! 24 Tufirꞌatook tikaraamaati mhiini suurii daasaa. Hankaab difaat usanook afoosamaa, malya mꞌaat tufirꞌatook hiiyya. 25 Ugariimiyook tumhakama istoobiyook, willa geeb tugadiyeetook tikwikwa. Masi bariiyooh geeb haayee usalaliib tikwikwa, tari baruuh ugaadi isꞌibik hook indi. Ugaadi aree udaabit nuuni hook indi. Aflaay oosjin han daaseen hook. 26 Oosdik andi hook: baruuk kasseeh imhallaga neekalt anu kwansiyeeb ookiik itfirꞌa kitdiya.

27 Baraak suur oodehay, ‘Baajakiinna’ diyee timaasiwna. 28 Laakiin ani andi hookna: takat hasiit liiliitii shanbiibka, uginꞌiib jiknaab ikatiyi hasaabu. 29 Ugwꞌaduuk umaygwadi maagt saksiiniyuuk, hook firꞌaat siisagti gidaa! Kassuuh ugarooyuuk jahannamiib itoogiideet toonaatiika, tarabeemti dehook hanyiis. 30 Wꞌayuuk umaygwadi maagt saksiiniyuuk, hook kitꞌaat siisagti gidaa! Kassuuh ugarooyuuk nꞌeetiib itoogiideet toonaatiika, tarabeemti dehook hanyiis.

31 Baraak oodehay, ‘Takatooh fandiig uutakka, fadageet shahaada ibakii iniiw.’ diyee timaasiwna. 32 Laakiin ani andi hookna: takatooh amaanaati naawi sabbii nuun, weer sabbii fandiig uutakka, batooh jakiint ikwaasi hasaabu. Takat fiduugiit indꞌiir uutakka, jikuun daayaabu.

33 Baraak oodehay shꞌiiya door ‘Tehalafooy baakitꞌana, laakiin Wꞌankwanaay halafooteenhoob dehaay daayaana.’ diyee timaasiwna. 34 Laakiin ani andi hookna: aslan baahalafooyaana, tibreetee han baahalafooyaana, bataah Ukwaasanaayt hadꞌaayeetii mhiin ikatiin. 35 Tari tubuutii baahalafooyaana, batuuh Ukwaasanaay ragada kehii daasameen. Tari Algudusee baahalafooyaana, batuuh Whadꞌa Oowinnaaytu. 36 Igirmaayiisookna baahalafooyaana, hamoot gaat hadalt tari eeraat han tidꞌaneet toona kaꞌadgirtaana. 37 Aflaay, ‘Daayiitu tari amaagtu’ diina, weena tiyadneek maagtii iiktiin iyadna.

38 Baraak oodehay ‘Tuliili liiliit, tookwiri kwireet’ diyee timaasiwna. 39 Laakiin ani andi hookna: maag tak baaꞌamootaara. Udaraag umaygwadiib hook inthꞌi ootak, udaraag ooraaw han dehaay naksaa. 40 Ugamiisook hook hariwtiit tumhakama istoobiyuuk, tusideeriyaaytook han dehaay isha dꞌiyaa. 41 Gaal akriree saaꞌaat sagi mhiin hiireerisiiniyuuk, maloot saaꞌaateet masaafa geeb giigaa. 42 Naat hook harriiw ootak hiiyya, silift hook yharriiw ootak aree baaꞌagiira.

43 Baraak suur oodehay, ‘Ushawawook areeya, wꞌashooyook riba.’ diyee timaasiwna. 44 Laakiin ani andi hookna: yꞌashooyeekna areeyaana, wꞌinꞌiitookna deharna, wꞌinriibookna dehaay shiboobna. Toomaag iweeryookna aree dehaay siileelaana. 45 Shaawti Baabiyeekna ar tibreeteeb tikatiina. Baruuh oodehay wꞌamaagwa udaayiibwa kasseeh tooyin dehaay talawsiini. Maag dehaywa shibi dehaywa kasseeh aree oobri dehaay bireesiini. 46 Oodehay wꞌareeyiiniyookna areeteeneek, naan rayiimi tiyadna? Tilbaat tamana han bak kasakiyaana han? 47 Isanaayeekna eebhat aree salaamteeneek, oodehay iraweeka naan gwilakabaana? Uudehay oodiin baabari han bak kiidꞌiin han? 48 Baabuukna tibreeteeb eefi timmiimaabu, baraak han timmiimaana." idi Yasuuꞌa.