1 Yasuuꞌa "Tudaayiinaayti shagaayookna oodehayi suurii baadꞌiina! Digwagwna oodehay baarhamaana. Een tiwariineek, Baabookna tibreeteeb eefeenaay ijir imaar kitdiina. 2 Aflaay oodehay yꞌaniw tiniiwihoob, oodehay tageegsi baasooyaa! Uudehay wharaay ar Iyahuudi diini gawiibwa isalalaayeebwa idꞌaneet toona, baraah dehayi hamooysiti yhariwna. Oosdik andi hookna: baraah wꞌijroohna timmiima ahaaba. 3 Laakiin baruuk oodehay yꞌaniw tiniiwihoob, wꞌayuuk umaykwaab iniiweet toona, wꞌayook utalhaab baasookiina! 4 Shaawti umiyaawook kwibisa. Malya Baabuukna toona tukwabaas rhiiniib, ijir iyaaw hook indi.

5 Sileeltiniyihoob, oodehay wharaay ar tꞌiiteeb baaꞌakaa! Baraah Iyahuudi diini gawiib gadee siileeltiib areeyeena, isalalaayi rikwinaayeeb oodehayi rhamti yhariwna. Oosdik andi hookna: baraah wꞌijroohna timmiima ahaaba. 6 Laakiin baruuk siileeltiniyihoob, ugawook shuumaa, udheefa assaat Baabiyookna dehaay siileelaa! Baruuh baalawayu. Malya Baabuukna toona tukwabaas rhiiniib, ijir iyaaw hook indi. 7 Aree siileelteenihoob, Ijintiileet baajawaana. Baraah igwida bhaliiyeesoohna itmassiiwneeb hiiseen. 8 Baraak bareeh tꞌiiteeb baaꞌakeena, Baabuukna baraakna baaraatamay toona tehariwneet ikteen.

9 Bak aree siileelteeneet toonaatu:

Baabuun tibreeteeb eefeeb,

uusmuuk hamooysamaab baꞌiikti,

10 Tehadꞌaayeetuuk baꞌeeti,

baruuk harriiweet tuuna tubuutiib batiikti, tibreeteeb tꞌiiteenaayt,

11 amsi oombꞌi yhadhiyeen hiiyya hoon.

12 Tumaagnaaytoon afooyaa hoon,

hinin han toomaag hoon sakeen afoona.

13 Jarrabamtiib baashuumsaa hoon,

laakiin wꞌamaag oongaal hooy shidhhana hoon.

14 Uudehay toomaag hookna idꞌanihoob afooteeneek, Baabuukna tibreeteeb eefi han afooyiini hookna. 15 Laakiin udehayiit maagnaay bitꞌafooyayneek, Baabuukna han tumaagnaaytookna afooyi hookna kiidi.

16 Baraak baaskiiteenihoob, wharaay ar idꞌaneet tunaatiit hamash fiireeb baaꞌakeena. Baraah oodehay tubaaskiitoohna rhistiib yhariwna akay eefiir hamashooyaab ikwasiin. Oosdik andi hookna: baraah wꞌijroohna timmiima ahaaba. 17 Laakiin baraak baaskiiteenihoob, tehamooteekna lꞌasaana, ifiireekna aree shigwidhna. 18 Aflaay baraak baaskiitiib tikatiineet toona uudehay iikan kiidiin. Laakiin Baabookna Oongaalnaay dehaay baaskiitaana. Baabuukna ubaalaway, aree Baabuukna toona tukwabaas rhiiniib, ijir iyaaw hookna indi.

19 Igarooyeekna dehaay tubuutiib miraay baadibiina, dꞌoobwa buutwa tamtini. Gwihara aree kitꞌatiit eegwihariin. 20 Laakiin baraak miraay tibreeteeb dehookna dibiina. Beentooy dꞌoobwa buutwa katamiyaana, gwihara han kitꞌatiit kiigwiharna. 21 Umraayuukna daayiiniyeeb oomhiin, iginꞌaayaakna han daayeen. 22 Tuliili ugarooyt lambaatu. Tiliiliyaataakna daayiit ikatiineek, kassuuh ugarooyuukna nuur iittab indi. 23 Laakiin tiliiliyaataakna amagt ikatiineek, kassuuh ugarooyuukna thibin iittab indi. Shaawti uunuur geebookna thibin ikatiyeek, been uuthibin kak win ikati! 24 Gaal kishiya malu ankwana kashagaamiya. Baruuh tari gaal areeyi indi, tari ooraaw aree iirib indi. Tari oongaal daayiib shagaamiini, ooraaw aree abaabiini. Ukwaasanaawwa imhallagaawwa mhalleehna hiddaab shagaamtiib kaꞌadgirtaana.

25 Oontꞌaaneet ani andi hookna: ukwiraayiisookna baahasiikna, naan tamteeneeb tari gwꞌiteeneeb tari igarooyeekna naan teetkwiineeb baahasiikna. Umidhhan tumꞌariitiika daayikaab kiiki han? Ugaru aree yhalakaayeeka daayikaab kiiki han? 26 Eekilay tibreeteeb dhaabeen shibibna, baraah kateeraayaana, kiiwikna, tari geesaay harroob kiidibilna, masi Baabuukna tibreeteeb eefi bareeh tamsiini. Baraakna bareesoohka alyakaab kitteena han? 27 Aaw bareesookna hansiikihoob umidhhaniyooh saaꞌaat gaat eeshiwi? 28 Aree halakaayee naanhooy tehasikna? Umingaayi hindi idaawriib shibibna kak yakeena. Baraah kashagaamiyaana tari igarooyeehna kiisitookwna. 29 Masi ani andi hookna: Suleemaan kassooh ugibliisooh een yhindiyeet akwaay kiiki. 30 Ukwaasana umingaayi siyaam bak istookwiyeek, amsi tooy haayee, tulhaytooh nꞌeetiib itoogiideek, baruuh bareek daayikaab istuukw hookna kiidi han? Wooh baraakna ishalik iimaani! 31 Shaawti baahasiikna, ‘Naan tamnay? Tari naan gwꞌinay? Tari naan neetkwi?’ baadiina. 32 Uudehay diin baabariin kasteeh teen tinaati harꞌii dhaabeen. Baabuukna tibreeteeb eefi aree bareeh tehariwneet toona ikteen. 33 Laakiin hankaab bariitooh tehadꞌaayi hariwna, bariitooh tooshbu hariwna. Teen teena kasteeh aree imaar tiyadna. 34 Aflaay lhayt iikti tindiit toona haay baahasiikna, batuuh tuukna tehisik tindi. Bꞌeebka ooknaay gwirha mhaab ibari." idi Yasuuꞌa.