1 Yasuuꞌa falluukaati kehii yꞌamt, oobhar ikitꞌa aree tumadiinaatooh tookna eeya. 2 Daab gali amꞌadhdha tak bꞌadhiib bꞌee bariiyooh dehaay haay eeyaan. Yasuuꞌa bareeh wꞌiimaanoohna rhiyanihoob, ootak ugarbamaanaay dehaay, "Wꞌooruun baahasiika! Timaagnaytaak afoomaata." idi.

3 Malya whaggi kooja gwadi igarooyeehna dehaay, "Uun uutak kifuuri bhali hadiidiini!" idiin.

4 Yasuuꞌa baraah iikwinneet toona iktiinayt, "Naanhooy iginꞌaayeekna maagt teekwinna? 5 Naan laamakaatu ‘Tumaagnaaytuuk afoomaatu’ uumiyaad laamakaabu han, tari ‘Yakaat difaa!’ uumiyaad laamakaabu? 6 Laakiin Wꞌaadami Oor tubuuti kehii timaagnay haay afooyiiniyeet hadꞌaayi ibariyeet toona shaawti tikteenna." idi. Malya ootak ugarbamaanaay dehaay, "Yakaa! Umbꞌadhook yaksaat ugawook bayaa!" idi. 7 Uutak yakiyaayt ugawooh ibi. 8 Uudehay igwida toon toona rhiyaanihoob, baraah irkwiin. Ukwaasana bak tꞌiiteet hadꞌaayi oodehay yhiiyyeet toonaati sabbii yhamidna.

9 Yasuuꞌa beentooysii giigiyanihoob, Mattaab iidni tak tilbaat lakkatanaab maktabiyooh sꞌee rhiya. Baruuh bariiyooh dehaay, "Ramaheeb!" idi. Matta asti yakiyaayt barooh iram.

10 Yasuuꞌa Mattaay ugawiib mꞌariit tamee, gwida tilbaat lakkatanaawwa, maagti dehaywa, eeyaaniit bariiyooh geeb tamiyaan. Ikwiriyaatayaah han geeb tamiyaan. 11 Ifariisi toon toona rhiyaanihoob, ikwiriyaatay sakanaayaana, "Ukoojaayuukna naanhooy itilbaat lakkatanaawwa maagti dehayi geebwa mꞌariit tamiini?" idiin.

12 Yasuuꞌa een ibhali imaasiwihoob, "Uudehay udalha hakiimii dehaay kiishinhana, eelhaab nuun. 13 Difnaat een ibhali naamiyaad ikatiineeb afhamaana, ‘Ani rhamaat aharriiw, karaamaat kaahariw.’ idi. Maagti dehayi waliikti jillaay yꞌaabu nuun, oodehay eeshboonaayi waliikti jillaay yꞌaab kaaki." idi.

14 Malya Yuuhannaay ikwiriyaatay eeyaaniit Yasuuꞌaab raatiyaana, "Hininwa Ifariisiiwwa baaskiitnay, laakiin ikwiriyaatayaak kak kabaaskiitiyaan?" idiin.

15 Yasuuꞌa igwibi, "Udoobaay yꞌamna baruuh geeb masi haayee kak gadabeen? Bareeh udooba hooy yakamiiniyi door yꞌi indi. Malya baaskiiti iyadna.

16 Gayi halaki kehii shꞌiiyaat silhaayt hanyiid tak kiihaay. Tusilhaay whalak katꞌitni, uumhiin ushataat winkaab ikati. 17 Tak aat gayiit, hamiit aateeb kiishaaw. Een tiwariyeek, tehawat thawtini, tiyꞌa han eetfiifna, tehawata han katꞌameen. Laakiin aat gayiit, gayiit hawatiib danꞌiyihoob, mhallaahna itdabiina." idi.

18 Yasuuꞌa een ibhali diyee, daabit gaal dehaay eeyaayt bariiyooh whii ignaf, "Tꞌootu hallaay tiya. Laakiin mꞌaat wꞌayook kehii daasaa, batuuh shaawti iidhhan tindi." idi. 19 Yasuuꞌa yakiyaayt bariiyooh geeb giigiya, aree ikwiriyaatayaah han iramna.

20 Been oodoor takat tamna malu hawlaayeeka booy tiitfaf eetaayt, bariiyooh harꞌii tingad. Malya bariiyooh whalakiit shinki tehita. 21 Batuuh ugarooyooh dehaay, "Ani bariiyooh whalak ookna tehaniyeek iinꞌir andi." tidi.

22 Yasuuꞌa batiiyooh nakamiyaayt, "Tꞌootuun biihasiiki! Wꞌiimaanuuk mheeliya hook." idi. Tutakat shaawti been oodoor ookna tinꞌir.

23 Yasuuꞌa udaabti gaw shuumiyanihoob, gwida dehay waawiinwa nawwaatiinwa imri. 24 Yasuuꞌa oodehayii dehaay, "Baraak hooy giigaana, tꞌoor ayaat kitti diwtini." idi. Laakiin uudehay ifaayidna. 25 Uudehay ugawii ifirꞌanihoob, baruuh shuumiyaayt tꞌooti ayi yꞌabikihoob, batuuh asti yakta. 26 Uun usakana kassooh whaashiib ibrar.

27 Yasuuꞌa beentooysii giigiyanihoob, malu hamashaya da barooh imooraamniit waliikiyaana, "Daawidi Oor, dehoon nꞌakwmanaaya." idiin.

28 Yasuuꞌa oogaw shuumiyanihoob, aanda yhamashaya bariiyooh dehaay eeyaan. Baruuh bareeh raatiya, "Ani toon toona sakaniyeet toona aamanteena?" idi.

Baraah "Awooh Wꞌankwanaay." idiin.

29 Malya Yasuuꞌa bareeyeehna eegwꞌad tehiyaayt, "Baraak aamantaanayt, tuun batiikti." idi. 30 Aanda shaawti rhiyaan. Yasuuꞌa bareeh winneet sooya, "Toon toona gaal han baasooyaana." idi. 31 Laakiin baraah giigiyaaniit oon usakana ubariiyooh kassooh whaashiib ibrirna.

32 Baraah itfirꞌanihoob, tak jin hooy iifiineeb gilluusiib bariiyooh dehaay haay eeyaan. 33 Yasuuꞌa ootak eejin hooy ifirꞌihoob, shaawti hadiidiya. Uudehay igwida winneet ajjabamiyaaniit, "Israaꞌiileeb toon toona tꞌiiteet door han akaat kitti." idiin.

34 Laakiin Ifariisi, "Baruuh ijini hadꞌaayee, eejin mhaliini." idiin.

35 Yasuuꞌa kasteeh tigariyaateebwa timadiinaateebwa hiireeriyaayt, Iyahuudi diini gawaayeeb allami. Tehadꞌaayeeti usakana udaayiib bhaliiyi, aree oodehay tilhanaywa igwirhaawwa iibriin kasseeh mheeli. 36 Yasuuꞌa oodehay igwidaab rhiyanihoob, winneet dehaay nꞌakwmanaaya. Bareeh nꞌati taar hooy daayaabu, aree shamaamt kiibariina, ooreew ishakwa baabariib tꞌiiteeb akay rhiyaneet toonaatii dehaay nꞌakwmanaaya. 37 Malya baruuh ikwiriyaatayeeh dehaay, "Uuwaak gwidaabu, laakiin ishagaamana shalika. 38 Toon toonaatii dehaay uwaaki Ankwana raataana, uwaakiit dirꞌaatooh shagaamanaab dehaay diigwatiiniyeet toona raataana." idi.