1 Yasuuꞌa teen teena kasteeh hadiidiyaayt faayisiyanihoob, ikwiriyaatayeeh dehaay, 2 "Whasamti Wꞌiid maloot yina dehaay mhiyaat ikatiineet toona tikteenna. Wꞌaadami Oor aree nuunamiit sallabami indi." idi.

3 Malya ifagiiriya isuurkinaawwa oodehayi eegrimaawwa, ufagiiri oowin Kayaafaas iidneeb bariiyooh oomhiin immararaayna, 4 aree baraah Yasuuꞌaab taaliiti salalii abiktiit haay iidirneet hayꞌaatiib imkirna. 5 Baraah "Laakiin wꞌiidiit tooyin kitti, tari beentooy oodehayi bitik finaab iikti indi." idiin.

6 Yasuuꞌa Beetaanyaay Siimoon ubhadhiyaayi gawiib iifiyihoob, 7 takat winneet alyaat shakwiint karooraatiib yaksitaayt, Yasuuꞌa mꞌariitiib kuurama, batuuh tishakwiin bariiyooh ugirmaay kehii tifif tidꞌi.

8 Ikwiriyaatay toon toona rhiyaanihoob yhaseeniit raatiyaana, "Naanhooy bak titehasiira?" idiin. 9 Baraah "Tuun tishakwiin alya tamaniib dilibtiit malya imhallaga oodehay yhamraab ittiyiwneet toonaati." idiin.

10 Yasuuꞌa toon toona iktiin, aree ikwiriyaatay bhaliisamiya, "Toon tootakat naanhooy gallabteena? Batuuh daayiina ani kehii tidꞌi. 11 Uudehay yhamra diimaab geebookna daayi iyadna, laakiin aneeb diimaab imaarheeb kitdiina. 12 Batuuh tishakwiin aniib ubashari kehii tififihoob, aneeb tꞌatoobsooytii dehaay tisoomiiri jillaay tidꞌi. 13 Ani oosdik andi hookna, kastooh toon tuduniyaatiib usakana udaayi hooy hadiidamiiniyi mhiinka, batuuh tidꞌiyeet tuuna han hadiidami tindi, aree batuuh haay shꞌami iyadna." idi.

14 Beenhoob ikwiriyaatay tamna malooyeeb gaal Yahuuda Wꞌiskaaryuuti iidneeb, ifagiiriya isuurkina ibaayt 15 raatiya, "Barooh nuunaniyuukna naan iyaawheeb tiyadna?" idi. Aflaay ifagiiriya isuurkina mhay tamuun ashteeti mhallaga idhigwiiniit barooh yhiin. 16 Been udoorii Yahuuda Yasuuꞌaab haay nuuniyeet fursa igwꞌad.

17 Ufatiiri hadhiyi wꞌiidiit tooyin tꞌawwaliinaatiib, ikwiriyaatay Yasuuꞌii dehaay eeyaaniit raatiyaana, "Whasamti Wꞌiidiit timꞌari naad dehook nisoomiireet hoon harriiwa?" idiin.

18 Yasuuꞌa igwibi, "Tumadiina difnaat tak gaal sooyaana, ‘Seedna diyaabu, uwaadiyaay door yꞌaabi. Whasamti Wꞌiid ikwiriyaatayi geeb ugawiyook tami andi.’ diina." idi. 19 Aflaay ikwiriyaatay Yasuuꞌa mitiyaayaneet toona idꞌiina, aree Whasamti Wꞌiid isoomirna.

20 Whawaad eeyanihoob, Yasuuꞌa itamna malooyi geeb mꞌariiti kehii isꞌa. 21 Baraah timꞌari tamee, baruuh "Ani oosdik andi hookna, gaal bareesookna iitilheeb indi." idi.

22 Baraah winneet gadabiyaaniit gaal uraawi harꞌii bariiyooh dehaay, "Aneeb nꞌalla kaaki! Wꞌankwanaay?" idiin.

23 Yasuuꞌa "Tudaatiib anii geeb tamiiniib been baruuh iitilheeb indi. 24 Wꞌaadami Oor bariiyooh kataabt tunaatiit oontꞌa iiyyi indi. Laakiin idhikw uutak Wꞌaadami Oor intiil! Baruuh faraay biikaayeek dehaay tehiyis." idi.

25 Malya Yahuuda, Yasuuꞌa iitil iiktiib, "Nꞌalla aneeb kaaki! Seedna?" idi.

Yasuuꞌa "Awooh han barook tikatiya. Baruuk abiiyaak tidiya." idi.

26 Baraah tamee, Yasuuꞌa hadhiib yakisiya aree yhamidaayt harꞌii, yhadhi ikitꞌa aree ikwiriyaatayeeh yhii. Malya "Yaksaanaat tamaana, uun baruuh aniib ugaru ikati." idi.

27 Malya baruuh kaas yaksiyaayt, yhamid aree bareeh yhii. Malya "Kassaakna hooy gwꞌaana! 28 Uun baruuh aniib oobooy ikati. Oon bariisooh Wꞌankwana bareeyookna geeb galad danꞌi. Gwida dehay idanuubaahna afoomeeni jillaay uun uubooy eetfiif. 29 Ani andi hookna, Baabiitu Tehadꞌaayeetiib geebookna gayi ha gwꞌaniyeeb ookiik, shaawti masi oon wha gwꞌi kaadi." idi.

30 Malya baraah shiilaat Wꞌankwanaay dehaay idiiniit, oorba Saytuun reewiyaan.

31 Malya Yasuuꞌa bareeyooh dehaay, "Oon whawaad amsi kassaakna hoosu fidnaab dhaabteena, aree iiyꞌishheeb tiyadna.

Uuktaab: ‘Ushakwa idaar andi,

tꞌanoowwa taayaawwa aree itbirir iyadna.’ diyaabi.

32 Laakiin ani tooyat hooy yakaniyi harꞌii, Jaliil ookiik suurookna saki andi." idi.

33 Bitrus "Baraah kassaah hook ifooriineek han, ani ifuur kaadi." idi.

34 Yasuuꞌa "Ani oosdik andi hooka, oon whawaad uujiik baakuukillaayi akay baruuk mhay doora ittiwheeb tindiya." idi.

35 Laakiin Bitrus "Ani geebook atoodiireek han, ittiw hook kaadi." idi. Aree ikwiriyaatay aaraw han kassaah bak idiin.

36 Malya Yasuuꞌa ikwiriyaatayeeh geeb Gitseemaani iidni mhiin giigiyaayt bareeyooh dehaay, "Tooy sꞌana, ani beentooy diftiit siileeli andi." idi. 37 Baruuh Bitruswa Sabadiib yꞌar imaloowwa iyhaayt geebooh haay giigiya. Malya baruuh gadabwa hasiyaaytwa hooy daayaan. 38 Malya Yasuuꞌa bareeyooh dehaay, "Aniib uunfis tooyat idwil, winneet hasiyaayt itab. Baraak tooy sꞌanaat, geebu gwꞌadna." idi.

39 Yasuuꞌa dabaloot masaafa suurbeeti hiireeriyaayt, ifiiree whaashiib dhibiyaayt siileeliya, "Baabu, tuun tuuna tikatiyeek, oon ookaas hoosu nuunama. Laakiin ani aharriiweet tuuna kitꞌaki, baruuk harriiweet tikati." idi.

40 Malya yꞌagaraayt, ikwiriyaatayeeh dehaay eeya aree bareeh diwee rhiya. Baruuh Bitrusii dehaay, "Yhaana baraak gaat saaꞌaat geebu iigwꞌad kitdiina han? 41 Baraak gwꞌadna, jarrabamtiib bitdaayayni jillaay siileelaana. Aashuuk yhariwna, laakiin ugaru inꞌakw." idi.

42 Yasuuꞌa malya door fidnaab giigiyaayt siileeliya, "Baabu, tuun tuuna tikatiyeek uun uukaas hoosu bagiigi. Biikaayeek aree gwꞌi andi, baruuk harriiweet tuuna batiikti." idi.

43 Yasuuꞌa yꞌagar eeyanihoob, bareeh nariit eegwꞌad aabkaatuuyt, masi diwee rhiya. 44 Aflaay baruuh bareeh masi door weer yꞌish giigiyaayt, mhaya door siileeliya, tꞌa han beet toona idi.

45 Malya Yasuuꞌa ikwiriyaatayeeb yꞌagaraayt, "Baraak masi diwteena, fiinteena han? Shibibna, tuusꞌa dawiltu, Wꞌaadami Oor aree maagti dehayi ayeeb nuunami indi. 46 Yakaana! Giigni. Shaawti aneeb iidlib indiib uutak yꞌaabi." idi.

47 Yasuuꞌa masi bhaliiyee, itamna malooyeeb gaal iiktiib Yahuuda eeya. Gwida dehay gadhꞌamaab bꞌadhadhaawwa kwoolayaawwa iibriin bariiyooh geeb iifiin. Bareeh ifagiiriya isuurkinaawwa oodehayi eegrimaawwa diigwataaba. 48 Oontꞌa uutak utoolana alaamaat bareeh imsꞌabaak, "Ani salaamaniyeeb ootak barooh ikati, abiknaa." idi. 49 Baruuh igidiyeesooh Yasuuꞌaab beeti ibi. Yahuuda "Seedna, dabaaywa!" idiit hooy yhalab.

50 Yasuuꞌa "Wꞌaraawuun, toona dehaay yꞌaab tikatiyeet weera." idi.

Malya baraah eeyaaniit Yasuuꞌaab yꞌabikniit yhaakwirna. 51 Been oodoor Yasuuꞌiib yꞌarawee gaal bꞌadhdhooh iktim aree ilꞌib. Aree ufagiiri oowinnaay kishiyaay angwiil ithꞌa ikitꞌa.

52 Yasuuꞌa bariiyooh dehaay, "Bꞌadhdhook umhiinooh shuumsa! Bꞌadhadh eelꞌibiin baliin kassaah bꞌadhdhii ituudir iyadna. 53 Ani Baabiyu uwaliikti baaꞌadgiraayeeb hiisteena han? Baruuh anii dehaay tamna malu malaki dheesha gaal door fandiig. 54 Laakiin uuktaab kak sidik ikati? Baruuh ibakii tuun tuuna bak tikatiyeet toona sooyiini." idi.

55 Been oodoor Yasuuꞌa oodehay igwidaanaay dehaay, "Ani amgwashuushaab suuriimani han? Baraak bꞌadhdhaabwa kwoolayaawwa tiyheeniit anii abuuki jillaay eetaaneek? Ani kassooh oodoor Ukwaasanaay ugawiit angaraatiib allami, laakiin abkaayiheeb kitteena. 56 Laakiin tuun tuuna aree kastuuh inabiya iktibneeb ikatabi bhali sidik tikwasi." idi. Malya kassaah ikwiriyaatay barooh yꞌishni idꞌiiniit ifoorna.

57 Uudehay Yasuuꞌaab yꞌabikniit Kayaafaas, ufagiiri oowin iiktiib istoobna. Whaggi koojaawwa yꞌeegrimaawwa beentooy ammarariyaaba. 58 Laakiin Bitrus ikwayaay barooh imooraam, ufagiiri oowinnaay gawi hoosh ookiik imooraam. Baruuh shuumiyaayt igwꞌaadiigaayi geeb isꞌa aree toona tutiiktiit sinaakrooyt yhiriw.

59 Kassaah ifagiiriya isuurkinaawwa kassuuh Iyahuudi majliswa gwisreet badeha Yasuuꞌaab haay iidirneet yhariwna. 60 Laakiin gwida gwisri badehi eeyaaneek han, naat han miraab kiikeen.

Aakhar malu badehi eeyaaniit, 61 "Uun uutak ‘Ani Ukwaasanaay udiini gaw katꞌani, malya mhayt yinaateeb andꞌiir.’ idi." idiin.

62 Ufagiiri uuwin yakiyaayt Yasuuꞌii dehaay, "Baruuk hadiidi kitdiya han? Aan aanda iyadneet tibadeha kehook ibadehaneet naanaata?" idi. 63 Laakiin Yasuuꞌa bhaliiyaab kiiki. Ufagiiri uuwin bariiyooh dehaay, "Ukwaasana Udhhaniinaay simii halafoosani hooka, baruuk Umasiih Ukwaasanaay Oor tikatiyeek sooyaa hoon." idi.

64 Yasuuꞌa "Awooh, een baruuk tindiya. Laakiin ani kasseekna dehaay andi: harꞌook yꞌiiniib udamaaniib Wꞌaadami Oor Oongaal Wꞌalyaanaay umaygwadiib sꞌee rhi tiyadna. Barooh bꞌaluukiib tibreetee yꞌee rhi tiyadna." idi. 65 Malya ufagiiri uuwin yhalakaayeeh shatatiyaayt, "Baruuh kifuuri bhali hadiidiini! Wari badehi naanhooy nhariw? Shibibna, oontꞌa baraak ukifuuri bhali timaasiwna. 66 Baraak naan teekwinna?" idi.

Baraah "Baruuh tooyat astehaliini." idiin.

67 Malya baraah Yasuuꞌiib ifiireeb tifiyaana, yꞌayeehna itaamikwniit ithabꞌana. Aaraw aree idarag ithabꞌana. 68 Malya baraah "Umasiih, dehoon sirida, aaw ithꞌa hook?" idiin.

69 Oontꞌa Bitrus whooshiib barraab iistꞌa, oot kishiyaat bariiyooh dehaay eetaayt, "Baruuk han Yasuuꞌi geeb Jaliileeb tiifiya." tidi.

70 Laakiin baruuh kasseeh bareeyooh suurii itwi, "Naan tindiyeeb ani kaakan." idi.

71 Malya baruuh udheefa beeti hiireeriya. Beentooy oot weet barooh rhitaayt oodehayii dehaay beentooy, "Uun baruuh han Yasuuꞌaab Unaasiraayi geeb iifi." tidi.

72 Baruuh tꞌa han masi itwi, halafooyaayt, "Oon ootak ani kaakan!" idi.

73 Shalik doori harꞌii, uudehay beentooy ingid Bitrus ookiik sakiyaaniit, "Baruuk sidik bareesooh gaal tikatiya, ibhaliyaak bak mitiyaayeen." idiin.

74 Malya Bitrus ugarooyooh yꞌat aree bareeyooh dehaay halafooyaayt, "Oon ootak ani kaakan!" idi.

Been oodoor willa uujiik kuukillaaya. 75 Malya Bitrus Yasuuꞌiib ibhali, "Uujiik baakuukillaayi baruuk mhay doora ittiwheeb tindiya." diyaab iiktiyeeb ibhali shꞌiya. Malya baruuh barraab ifirꞌa aree winneet waawiya.