1 Yasuuꞌa ikwiriyaatayeeh itamna malu sooyaayt harꞌii, beentooysii giigiya. Aree Jaliileet madiinaateeb allamiyi jillaay giigiya.

2 Yuuhanna Umasiih iidꞌeet toona imaasiwihoob, ikwiriyaatayeeh diigwatiya. 3 Yuuhanna barooh sakanaatiib isehariw, "Baruuk uyꞌiiniibwa han weer nhagit?" idi.

4 Yasuuꞌa dehaay idgi, "Agarnaat toona turhitaaneetwa tutimaasiwneetwa Yuuhannaab sooyaana. 5 Yhamashaya rheena, igarbama hiireereena, oobhadh ibariin eenꞌirna. Yꞌangwilaya eemsiiwna, yꞌaya eedhhaniina, aree usakana udaayi oodehay imiskiinaayee dehaay bhaliimiini. 6 Libaabiyaan baliin aniib eetehak baabariin." idi.

7 Yuuhannaay idiigwatkina giigiyaani harꞌii, Yasuuꞌa oodehayii dehaay Yuuhannaayiib hadiidiya: "Umingaay tibeenihoob, naan rhitiib tehiriwna? Aggaab ubaraam nanfiyeeb rhaa miyaadiib tibeena han? 8 Bak biikaayeek, naan rhitiini jillaay giigtaana? Daawri halaka akwaay tak? Abadan, baliin daawri halaka eetkwiin yhadꞌaayi gawaayeeb eefeen. 9 Laakiin naan rhitiini jillaay giigtaana? Nabiib? Awooh, oosdik andi hookna, nabiika winkaabi. 10 Tuun batuuh uktaabiib kataabtu: ‘Ani udiigwatkinaayu suurook iifdig andi. Baruuh whankaay usalalook isuumir indi.’ diyaabi.

11 Oosdik andi hookna: baliib taamꞌat firaat ikatiineeb eebtik, Yuuhannaab umoosanaayka winkaab lawaab kiiki. Tibreeteet hadꞌaayeetiib hooy uudiska, bariisoohka winkaabi. 12 Yuuhanna umoosanaay idamanee amsi ookiik, tibreeteet hadꞌaayi akriree tinwiin, aree ribshaayti dehay batooh akruurii abuuk yhariwna. 13 Yuuhannaab ookiik aree kassaah inabiyaawwa Muusaay whagwa tehadꞌaayeetiib hadiidiyaan. 14 Baraak batooh agbiltiib tehariwneek, Eelya yꞌiini attiyoodiyaab been baruuh Yuuhannaab ikati. 15 Yꞌangwil ibariibka maasiwna!

16 Oon udamaani dehay naanaati geeb asnadiir? Baraah inisrika isuugaayeeb sꞌatiit eeraw waliikeen tꞌiiteeba.

17 Baraah ‘Hinin biilhooyt dehookna nithꞌa,

aree baraakna hawaayaab kitteena.

Hinin dehookna nawwaatna,

aree baraakna gadabaab kitteena.’ iyadna.

18 Yuuhanna eeyanihoob, tamaab kiiki, gwꞌaab han kiiki. Baraah aree ‘Baruuh jin ibari.’ idiin. 19 Wꞌaadami Oor tameewwa gwꞌeewwa eeya. Baraah aree ‘Baruuh tamanaabu, sakraanu, tilbaat tamanaawwa maag dehaywa araweesamiini.’ idiin. Laakiin tifagarandi taakna ishagaayiisoohna oosdik rhiseen." idi Yasuuꞌa.

20 Malya Yasuuꞌa timꞌuujisa hooy iikwsiyeeb yhash neewiya. Een yhash udehayuuhna tuubaab kiikeenayt, Yasuuꞌa, 21 "Tidhikwii yaa Koorasiin! Tidhikwii yaa Beetsayda! Bateeyookna ikeent timꞌuujisa, Tiirooswa Siidooneebwa akaat iiktiineek, udehayuuhna shꞌiika tuubiina. Baraah shiwaali halak iitkwiina aree igirmaayeehna kehii nꞌeetihaash geediin. 22 Laakiin ani andi hookna: whukwimiit tooyin bareesookka Tiirooswa Siidoonii dehaaywa laamakaat iikti tindi. 23 Aree batuuk, yaa Kafarnaahuum, teebri beeti tafami tindii han? Abadan, eedhoom ookiik hoogi tindii. Timꞌuujisa batiiyook ikeent Sadoomeeb akaat iiktiineek, oon amsi ookiik masi daayiin. 24 Laakiin ani andi hookna: whukwimiit tooyin batiisookka Sadoomee dehaay laamakaat iikti tindi." idi Yasuuꞌa.

25 Been oodoor Yasuuꞌa, "Baruuk teen teena ifagarandeewwa yꞌagriyaaneewwa tikwibisaayt, yꞌar idabalooyaayee dehaay lawsita akay, ahammiid hook, yaa Baaba, toobuutwa tibreeti Wꞌankwana. 26 Awooh, yaa Baaba, tuun tuuna barook afirhistini.

27 Baabu naatka yhiiheeb. Wꞌoor aab ikatiyeeb ubaaba nuun gaal han kiikan. Ubaaba aree aab ikatiyeeb wꞌoor nuun gaal han kiikan. Laakiin wꞌoor ubaaba aab ikatiyeeb eeraw sootiib harriiw, aflaay baraah barooh iikan iyadna." idi Yasuuꞌa.

28 "Baraak igwooyaabwa digaana yaksaabwa kassaak mꞌaanaheeb, aree fiinaniit iyaaw hookna andi. 29 Anii whasaal ahaana, malya anii kanna, ani nꞌakwu, nhas ginꞌiibu, aree infiseeyookna dehaay fiinaniit imaar tiyadna. 30 Aniib whasaal laamaabu, aree aniib irabi shoof ikati." idi Yasuuꞌa.