1 Been oodoor ikwiriyaatay Yasuuꞌii dehaay eeyaaniit raatiyaana, "Tibreeteet hadꞌaayeetiib uuwinkaab aabu?" idiin.

2 Yasuuꞌa dis oor waliikiyaayt, bareeyooh bitik isingad. 3 Malya baruuh "Oosdik andi hookna, baraak gayyarameetiit yꞌar idadis tꞌiiteeb iikti bitdiineek, tibreeteet hadꞌaayi door han shuumi kitdiina. 4 Shaawti oon wꞌooriit ugarooyooh isoodiiska, tibreeteet hadꞌaayeetiib oowinkaab ikati.

5 Aree oon wꞌoor oodis tꞌiiteeb aniib oosmii daayiib anshiishka, aneeb han daayiib anshiishheeb. 6 Laakiin een bareeh idabalooya aneeb aamaneen gaal maagnaayt isidꞌiibka, barooh bidhdhigil riyaati awi tꞌalaatiyooh hakwirtiit ubhariit hooytiib uudhib dehaay hanyiis.

7 Oodehay maagnaayt isidꞌiint tinaati sabbii, tuduniya iidhikw tindi. Taan taana ibakii yꞌeena, laakiin bariisooh yꞌeeneeb uutak idhikw. 8 Wꞌayuuk tari uragaduuk maagnaayt saksiiniyuuk, hook kitꞌaat fidna gidaa. Baruuk malu ayi tari malu ragada barii toonꞌi tudaayimtiib tꞌatoogidooytiika, garbamaa tari katꞌamaa umidhhan udaayim ishuumti dehook hanyiis. 9 Ugwꞌaduuk maagnaayt saksiiniyuuk, hook firꞌaat fidna gidaa. Malu gwꞌadaayee toonꞌi jahannamiib tꞌatoogidooytiika, gaal gwꞌadii umidhhan ishuumti dehook hanyiis.

10 Een bareeh idabalooya baaꞌabaabaana. Ani andi hookna: imalakaahna tibreeteeb eefeena, aree diimaab Baabu tibreeteeb eefeenaay eefiir rheen.

11 Wꞌaadami Oor toona tukwidhaat ismariyi jillaay yꞌaabi. 12 Naan hiisteena? Tak sheeb arginaab ibariyeek, aree gaal kwidhiiniyeek, yꞌashshadhig tamuunwa yꞌashshadhig oorbaay kehii ishti dꞌiit, oongaal ukwidhaab kiihariw han? 13 Ani oosdik andi hookna: oon wꞌargin manriyeek, yꞌashshadhig tamuunwa yꞌashshadhig geeb iifiinneeka, been wꞌargin oongaalnaay afirhakaab iikti indi. 14 Oontꞌaaneet Baabuukna tibreeteeb eefi een bareeh idabalooya gaal han hooy kwidhsiiniyeet kiihariw.

15 Sanuuk maagnaayt hook sakiiniyeek, giigaat igalateeh rhisa. Aree mhallaakna tehalaagaay tikwikwna. Baruuh isnaakiiruuk, usanook dehaay ansiramta. 16 Laakiin baruuh biisinaakiiruuk, tak gaal tari maloob warib geebook yaksa, halaagaaytka maloob tari mhay nafaraayeet badehaatee tikati. 17 Baruuh ibadehi inriibeek, tukaniisi sooyaa. Tukaniiseeti bhali han tisnaakirooy inriibeek, barooh oodiin baabariib tari utilbaat lakkatanaayt shibiba.

18 Ani oosdik andi hookna: baraak tubuutiib tehankwiirneet tuuna, tibreeteeb han itehikwir tindi. Baraak tubuutiib tifadigneet tuuna, tibreeteeb han itfidig tindi.

19 Masi gwidaana sooyi hookna andi: maloob bareesookna tubuutiib naat gaanaatiib taafagsameetiit raatteeneek, Baabu tibreeteeb eefi dehookna iitkwikw indi. 20 Aniib oosmii maloob tari mhay gaal mhiin hiddaab yꞌeeneek, beentooy ani bareeyooh geeb eefi." idi.

21 Malya Bitrus Yasuuꞌii dehaay eeyaayt, "Wꞌankwanaay, usanu maagnaayt hoosu sakiiniyeek, naaka doora afooyani? Asarama doora hadiit?" idi.

22 Yasuuꞌa "Ani andi hooka, asarama doora kiikeena, laakiin asarama tamuunwa asarama doora.

23 Shaawti tibreeteet hadꞌaayi, whadꞌa ikishiyaayeeh haasabsamtiib yharriiw tꞌiiteeti. 24 Baruuh beet toonaati tikwuukw badooyanihoob, barooh gwida milyoona mhallagaab iishik tak dehaay haay eeyaan. 25 Baruuh baliib imhallagaayi kwisuuy adgiraab kiiki. Imhallagaayi ankwana baruuhwa tutakatuuhwa, yꞌaraahwa, kassuuh umraayuuhwa dilabtiit, uudeen haay itkwasiyi jillaay sooya.

26 Ukishiya whadꞌaay suurii dhibiyaayt, ‘Diiseet hoosu sakaa, imhallagaayeek kasseeh ikwaas hook andi.’ idiit barooh yꞌajar.

27 Ukishiyaay ankwana dehaay nꞌakw manaayaayt, oodeen afooyaayt barooh ifdig idꞌi.

28 Laakiin been ukishiya ifirꞌihoob, weer kishiya barooh sheeb diinaar inshiik imri. Barooh tꞌala yꞌabikayt iskit, ‘Imhallagaayi kwisiyaheeb!’ idi.

29 Uun ukishiya wꞌaraawuuh bariiyooh whii ignafayt barooh yꞌajar, ‘Diiseet hoosu sakaa, ikwaas hook andi.’ idi.

30 Laakiin baruuh irib. Idifayt kasseeh imhallaga ikwisiyeeb ookiik oon ootak sijin shuumisiya. 31 Ikishiya aaraw uun ukishiya sakiyaneet toona rhiyaanihoob, winneet yhaseeniit wꞌankwanaayoohna toona tutikeet kastooh sooyaan.

32 Malya wꞌankwana ukishiya waliikiyaayt, ‘Baruuk wꞌamaag kishiya, baruuk tꞌajarheeb akay kassooh oodeen afooyan hook. 33 Aflaay ani han barook afooyaneet toonaatiit, baruuk han ukishiya wꞌaraawook dehaay nꞌakwmanaaya.’ idi. 34 Ukishiyaay ankwana yhasaayt barooh jasaamiyi jillaay oosjin istoob, malya kasseeh imhallaga ikwiiseeb ookiik oosjin idꞌi.

35 Usanook uginꞌiisook afooyi bitdiiyeek, Baabu tibreeteeb eefi han kasseekna bak iiwari hookna indi." idi Yasuuꞌa.