1 Baraah Algudus idwilnihoob, Isaytuuni Ribaay kehii tiifiit Beetfaagiib eeyaan. Yasuuꞌa malu kwiriyaatay diigwatiyaayt, 2 bareeyooh dehaay, "Suurookna teefeet tugariya beena, aree beentooy gaalhoob meekt hakwaart imaar tiyadna. Beet toomeek halkwiib aree geeb hakwaaru. Bareeh fidignaat tooy haay mꞌaanaheeb. 3 Gaal han naat indiyuukna, Wꞌankwana yhariw eefiyeet toona sooyaana, aree baruuh bareeh willa giigsi indi." idi.

4 Tuun tuuna unabi geebii attiyoodiyaat toona sidik tiikwsi: 5 "Sihiyooniit ootii dehaay,

Shibibii, whadꞌaayuuk yꞌiini hook,

utarmuuma meeki kehii amaa yꞌiini,

halkwiib meeki oori kehii yꞌiini." idi.

6 Ikwiriyaatay giigiyaana, aree Yasuuꞌa sooyaneet toona idꞌiin. 7 Baraah toomeekwa whalkwiiwwa haay eeyaana, aree yhalakaayeehna kehii daasiyaan. Yasuuꞌa aree kehii yꞌam. 8 Winneet gwida dehay yhalakaayeehna usalaliib ibrirna. Wari aree yhindiyee lꞌid katꞌiyaaniit, usalaliib ibrirna. 9 Bariiyooh suurii giigiyaan uudehay igwidaabwa, baliin barooh iitramwa waliikiyaana,

"Hoosaana, Daawidi Oor! Wꞌankwanaay simii eeyaab baarakamaabu! Hoosaana itageegeeb!" iidna.

10 Yasuuꞌa Algudus shuumiyanihoob, tumadiina kastuuh winneet tirgasayt raatiyaana, "Uun aabu?" idiin.

11 Uudehay igwida igwibiina, "Uun baruuh Yasuuꞌaab ikati, Jaliileeb teefeet Naasiraay ikatiib unabi." idiin.

12 Yasuuꞌa Ukwaasanaay oogaw shuumiyaayt, oodehay beentooy bꞌiishraayiin kasseeh iskwi. Aree baliin mhallaga iibdil eendeet titarabeesaawwa, tikwibheeriya iidlib eendeet tikanabaawwa bꞌoosiya idꞌi. 13 Yasuuꞌa bareeyooh dehaay, "Tuun tuuna kataabtu, ‘Aniib uugaw siileelti gaw ittiyoodi.’ diyaabu uuktaab. Laakiin baraakna igwiharaayi amar tikwasiina." idi.

14 Yhamashayaawwa yꞌankwalanaawwa Ukwaasanaay gawiib bariiyooh dehaay eeyaana, aree baruuh bareeh mheeliya. 15 Laakiin ifagiiriya isuurkinaawwa, whaggi koojaawwa teen teena tꞌajiibi baruuh idꞌiyeet rhiyaana, aree yꞌar Ukwaasanaay ugawiit hooyteeb waliikee, "Hoosaana Daawidi Oorii dehaay" diyee rhiyaanihoob, baraah haagamiyaan.

16 Baraah "Aan yꞌar iyadneet toona teemsiiwa?" idiiniit barooh raatiyaan.

Yasuuꞌa "Awooh eemsiiw. Ooktaab agriiyaab kitteena han?

Uuktaab ‘Yꞌarwa inisrikaayi yafaayee

hamaadiit kaft tisoomira.’ diyaabi." idi.

17 Malya Yasuuꞌa bareeh yꞌish giigiyaayt, tumadiina Beetaanyaab ibi. Aree whawaad beentooy naaya.

18 Fajir karuumaab Yasuuꞌa tumadiina agaree yharagw. 19 Usalaliib tiini hindi rhiya. Been whindi laakiin teerat nuun naat han hooy miraab kiiki. Malya whindii dehaay, "Shaawti door han firaay baayaksaa!" idi. Whindi willa balamiya.

20 Ikwiriyaatay toon toona rhiyaanihoob, ajjabamiyaaniit, "Utiini hindi kak willa bak balamiya?" idiin.

21 Yasuuꞌa igwibi, "Ani oosdik andi hookna: iimaan tibariineek, malya aree eetehak bitbariineek, baraak tidꞌaneet tuuna oon ootiini hindii dehaay tikeet toonaati dꞌuuy oobhaat kiiki. Laakiin baraak oon oorbaay dehaay, ‘Difaat oon ubhariib dhibaa!’ tiyadneek, baruuh saki indi. 22 Baraak aamanteeneek, siileelteenihoob raatteeneet toona kastooh imaar tiyadna." idi.

23 Yasuuꞌa Ukwaasanaay oogaw shuumiyaayt allamee, ifagiiriya isuurkinaawwa oodehayi eegrimaawwa bariiyooh dehaay eeyaaniit, "Teen teena aayt hadꞌaayeetii saktiniya? Aaw aree toon tehadꞌaayi yhii hook?" idiin.

24 Yasuuꞌa igwibi, "Ani han gaana raati hookna andi. Een tigweebneek, ani han aayt hadꞌaayeetii teen teena akwasiyeeb sooyi hookna andi. 25 Yuuhanna umoosana umaasiit tehadꞌaayi aay dehaay eeta? Tibreetee yꞌaatu han tari dehayii yꞌaatu?" idi.

Baraah toon toona ibtikeehna haay infaraadniit, "Tuun batuuh tibreetee niyadeek, baruuh masi raati hoon indi, ‘Naanhooy aree aamanaab kitteena?’ iyaad hoon indi. 26 Laakiin ‘Dehayii yꞌaatu’ niyadeek aree, oodehay nireekw. Baraah kassaah Yuuhannaab unabiit iyayna." idiin.

27 Aflaay baraah Yasuuꞌii dehaay, "Hinin kinkan." idiin.

Malya baruuh "Ani han teen teena aayt hadꞌaayeetii akwasiyeeb sooyi hookna kaadi." idi.

28 Yasuuꞌa "Baraak naan hiisteena? Tak malu ar iibri iifi. Wꞌoor usuurkina ibaayt, ‘Wꞌooru, amsi giigaat tudirꞌaatiib shagaama.’ idi.

29 Wꞌoor ‘Ani shagaami kaadi.’ idi. Malya laakiin baruuh ibhaliyeeh hooy yꞌagaraayt giigiya.

30 Malya ubaaba wꞌoor ooraaw ibaayt oon han oontꞌaaneet sooya. Wꞌoor ‘Iidif andi, baaba.’ idi. Laakiin baruuh difaab kiiki.

31 Een yꞌar mhalleesoohna ubaaba yhiriweet toona naayuuh idꞌi?" idi Yasuuꞌa.

Baraah "Usuurkina idꞌi" idiin.

Yasuuꞌa bareeyooh dehaay, "Ani oosdik andi hookna: itilbaat lakkatanaawwa, tijakiinaawwa bareeyookna hankaay Ukwaasanaayt tehadꞌaayi shuumi iyadna. 32 Yuuhanna usalal eeshibooneeb rhisti jillaay eeya hookna. Aree baraak barooh aamanaab kitteena. Laakiin itilbaat lakkatanaawwa tijakiinaawwa aamaniyaan. Toon toona han rhitaani harꞌii, tuubaab kitteena, aamanaab kitteena." idi.

33 Yasuuꞌa "Wari mitaal sinaakirna. Tak dirꞌaati kina inab adiyaab iifi. Tudirꞌa heetaat hooy ikwilil idꞌir, reet wha hooy iidꞌeet ifrik, aree gwꞌaadiigaayi gaw idꞌir. Malya tudirꞌa dirꞌaatkinee dehaay ikiriit iibaabiya. 34 Uwaaki door idwilihoob, ishagaamanaayeeh been tudirꞌa hooy kiriyaab iiktiyeeb ishagaamanaayee dehaay diigwatiyaayt, wꞌinabii wꞌadhdhooh yakseeneet toona sooya.

35 Ikiraaykina laakiin bariiyeeh ishagaamana ikwilalniit, gaal ithabꞌana, weer idirna, umhaya aree geediyaan. 36 Malya masi suureeka gwidaka shagaamana bareeyooh dehaay diigwatiya. Ikiraaykina een han bak baliineeka amaagkaab iweerna. 37 Kasseeyooh wꞌagiyaay, wꞌoorooh bareeh beeti diigwatiya. Baruuh ‘Wꞌooru hamooysi iyadna.’ idi.

38 Laakiin ikiraaykina wꞌoor rhiyaanihoob, baraah taktakee dehaay, ‘Uun baruuh ukwasaamiiniib ikati, yakaana barooh niidir aree tikwasaateeh niyaay.’ idiin. 39 Aflaay barooh yꞌabikna, aree tudirꞌaati kwayaay igidniit idirna.

40 Malya tudirꞌaati kina eeyanihoob, een ikiraaykina naan iiwari indi?" idi Yasuuꞌa.

41 Baraah "Baruuh een ikiraaykina maagt yat iidri indi. Aree tudirꞌa wari dehayii dehaay ikaar indi, aree baraah uwaaki door barooh wharrooy wꞌadhdhooh iyaaw iyadna." idiin.

42 Yasuuꞌa bareeyooh dehaay, "Iktabeeb agriiyaab kitteena han? Aaktab:

‘Wꞌawi idꞌaariiga iribneeb,

urikwni awi udaayikaab ikati.

Wꞌankwana toon toona idꞌi,

aree hineeb igwꞌadeeb ajiibiit tikati!’ diyaabi.

43 Aflaay ani andi hookna: Ukwaasanaayt hadꞌaayi hookna giigi tindi, aree baliib batiisooh samaraat mhaleen oodehay ittiyiw tindi. 44 Oon wꞌawii kehii dhibiiniibka, katꞌamiit firkak iikti indi. Laakiin uun wꞌawi kehii dhibiiniyeebka, huugami indi." idi.

45 Ifagiiriya isuurkinaawwa Ifariisiiwwa Yasuuꞌiib eemtaal imaasiwnihoob, baruuh eemtaal bareeh haay isehiriweet toona ikanna. 46 Yasuuꞌaab haay yꞌibikni salal yhariwna. Laakiin uudehay barooh nabiib hiisiinayt, baraah oodehay igwidaab irkwiin.