1 Fariisi galwa whaggi koojaawwa Yasuuꞌaab raatiini jillaay Algudusee eeyaan. 2 Baraah "Ikwiriyaatayaak hoobeeteen tꞌaada naanhooy katꞌeena? Baraah tumꞌariiti hankaay yꞌayeehna kiishigwidhna!" idiin. 3 Yasuuꞌa "Tꞌaadaateeyookna jillaay baraak naanhooy Ukwaasanaayt tiwasi tikatꞌana? 4 Ukwaasana ‘Baabookwa deetookwa hamooysa. Baabooh tari deetooh inꞌiitka ituudir indi.’ diyaabi. 5 Laakiin tak ubaaba tari tundeetii dehaay, ‘Anii manriyeet tushamaam Ukwaasanaay dehaay attiyeewiya miyaaw ikati.’ baraak tiyadna. 6 Baraak uun uutak ubaabaawwa toondeewwa biihamooysayeet toona tehariwna. Baraak tꞌaadaateeyookna jillaay Ukwaasanaay ibhali khaalafteena. 7 Baraak wharaay dehay! Unabi Isyaas bareeyookna iisridihoob sidkiibu: 8 ‘Aan baraah iyafaayeesoohna aneeb yhamidna. Laakiin iginꞌaayaahna anii winneet sagiiba. 9 Baraah nafꞌaat baabariint ibaada yꞌabidnaheeb. Allameena laakiin dehayiit aada allameen.’ diyaabi." idi.

10 Yasuuꞌa oodehay barooh beeti waliikiyaayt, "Sinaakirna malya afhamaana. 11 Wꞌaadami yaf shuumtiniit tuuna barooh kayiwaashiista. Laakiin uyafii eetniit tuuna beet yiwaashiistini." idi.

12 Malya ikwiriyaatay Yasuuꞌii dehaay eeyaaniit "Ifariisi een ibhali imaasiwnihoob yhaseeneet toona tikana?" idiin. 13 Yasuuꞌa "Yhindi Baabu tibreeteeb eefi adiyaab biikaayeeb igadamaayee fatakami iyadna. 14 Bareeh ishna dꞌiina, baraah hamashayaaba aree hamashayaab salooleen. Tak hamashay weer hamashay salooliiniyeek, mhallaahna deelaay dhibi iyadna." idi. 15 Bitrus aree "Eemtaal dehoon fassara." idi. 16 Yasuuꞌa bareeh raatiya, "Baraak masi afhamaab kitteena han? 17 Ooyaf shuumtiniit tuuna kastuuh oofꞌi teebiyeet toona karhitaana han? Malya aree ugarooy titfarꞌeet toona karhitaana han? 18 Laakiin taana uyafii yꞌeent uginꞌii yꞌeena, aree taan bataah wꞌaadami nhas baakaay ikwasiin. 19 Uginꞌii titfarꞌi tuuna maagti kwoonti ikati, madarwa, jikuunwa, mꞌateeb hawriiktiibwa, gwihartwa, gwisreet badehaatwa, gwisirwa, neewwa ikatiin. 20 Taan bataah aree wꞌaadami nhas baakaay ikwasiin. Laakiin yꞌayi baashagwiidh mꞌariiti tamti wꞌaadami nhas baakaay kitkwaas." idi.

21 Yasuuꞌa been whaash hooy giigiyaayt, Tiirooswa Siidoonwa haash ibi. 22 Takat Kanꞌaaniit been whaashii waawee bariiyooh dehaay eetaayt, "Wꞌankwana Daawidi Oor, anii dehaay nꞌakwmanaaya. Tꞌootu winneet amag jin hooy eefeen." tidi.

23 Yasuuꞌa kalmaat han diyaab kiiki. Aflaay ikwiriyaatayaah dehaay eeyaaniit, "Tootakat giigsa, harꞌoon waawi tindi." idiin. 24 Yasuuꞌa "Ani Israaꞌiileeb wꞌargin ukwidhaab oobhaanaay dehaay diigwatamaabu." idi. 25 Tutakat eetaayt bariiyooh suurii tignaf, "Wꞌankwana, awayaheeb!" tidi. 26 Yasuuꞌa "Inisrikaayi hadhi yaksiit iyasee dehaay uugaad daayiina kitti." idi. 27 Batuuh "Awooh Wꞌankwanaay, laakiin aayas han yꞌankwanaayeet taawlaatii dhibeen ifirkak tameen." tidi. 28 Malya Yasuuꞌa "Yhayi! Batuuk akra iimaan tibarii! Batuuk harriiweet tuuna iikti tindi." idi. Aflaay beet toosꞌa tookna tꞌootuuh mheelamta.

29 Yasuuꞌa beentooysii giigiyaayt, Jaliileeb ubharii giigiya. Malya ribaab reewiyaayt nꞌati isꞌa. 30 Barooh gwida dehay dehaay eeyaana, yꞌankwalanaawwa, yhamashayaawwa, igaraabayaawwa, igilluusiyaawwa, gwida waribwa, haay eeyaaniit bariiyeeh iragadaayi whii bꞌasiyaan. Aree baruuh bareeh mheeliya. 31 Igilluusiya hadiidiyaana, igaraabaya inꞌirna, yꞌankwaliin daayiib hiireeriyaana, aree yhamashaya rhiyaan. Uudehay toon toona rhiyaanihoob ajjabamiyaana aree Israaꞌiileeb Ukwaasana yhamidna.

32 Yasuuꞌa ikwiriyaatayeeh marooh waliikiyaayt, "Ani oon oodehay dehaay nꞌakwmanaayani, baraah suur akay mhayt yiina geebu ibariina aree naat han tamaab kiikeen. Ani bareeh hargwaa giigsi kaadi tari baraah usalaliib dhibi iyadna." idi. 33 Ikwiriyaatayaah igwibiina, "Oon umingaayiib oodehay kassooh mheen hadhi naad nimeer?" idiin. 34 Yasuuꞌa bareeh raatiya, "Naaka hadhi tibariina?" idi. Baraah "Asarama hadhiiwwa shalik dadis aashoowwa nibari." idiin. 35 Yasuuꞌa uudehay whaashiib nꞌati eesitꞌaneet toona sooya. 36 Malya baruuh yhadhi yꞌasaramaawwa yꞌaashoowwa iyhaayt, Ukwaasana yhamidayt harꞌii, bareeh katꞌiya. Malya ikwiriyaatayeeh yhii, aree ikwiriyaatay oodehay yhiin. 37 Baraah kassaah tamiyaaniit gabiyaan. Malya ikwiriyaatay biileeb yakisiyaaniit toodhikw yhadhiyi firkak asarama biili hooy toobiyaan. 38 Timꞌari tamiyaan uudehay fadhig alfa iiktiina, aree mꞌatwa nisrikaabwa geeb iifiin. 39 Yasuuꞌa oodehay giigisiyaayt harꞌii, tufalluuka yꞌamaayt Majdaani haash ibi.