1 Yasuuꞌa Beetlaham Yahuudaay ifrayeenaay harꞌii, whadꞌa Heeroodisiib udamaaniib, Majuusi gali uyintalawii Algudus beeti eeyaaniit, Heeroodis raatiyaan. 2 Baraah "Iyahuudi hadꞌa ikatiyi jillaay faraay wꞌoor keeya? Whayuukwooh uyintalawiib rhina, aree hinin barooh nꞌabidi jillaay yꞌaaba." idiin. 3 Whadꞌa Heeroodis een ibhali imaasiwihoob winneet gadabiya. Alguduseeb iifiin uudehay kassaah han bariiyooh geeb yhaseen. 4 Heeroodis ifagiiriya isuurkinaawwa whaggi koojaawwa kasseeh hiddaab waliikiyaayt raatiya, "Umasiih naad itfir indi?" idi. 5 Baraah "Beetlaham Yahuudaay itfir indi." idiin. Suur toon toona unabi kitbaabu:

6 "Batuuk Beetlaham, Yahuudaay whaashiib teefeet, Yahuudaay yhadꞌaayeeka dhibakaat kittaayii, batiisook aree hadꞌa yꞌiini. Been baruuh udehayu Israaꞌiili shakwa iikti indi." diyaabi.

7 Malya Heeroodis Imajuusi diiseet waliikiyaayt, whayuukw naadoor ikayeeb bareeh raatiya. 8 Bareeh Beetlaham beeti ifdigaayt, "Difnaat wꞌoor daayiib hariwna. Barooh willa timeernihoob, sooyaanheeb, aflaay ani han bayiit barooh ibid andi." idi.

9 Baraah whadꞌaay bhali imaasiwniit harꞌii, usalaloohna isoorarimna. Aree uyintalawiib rhiyaaneeb whayuukw, been wꞌoor iifiyeeb oomhiin iktimeeb hadiit bareeyooh suurii sakiya. 10 Baraah whayuukw rhiyaanihoob, winneet afirhiyaan. 11 Baraah oogaw shuumee, wꞌoor toondi Maryami geeb rhiyaana, aree kuuramiyaaniit barooh yꞌabidna. Malya tishantaateehna ifdigniit wꞌoor dimꞌaraawwa, libaanwa, mirwa miyaaw yhiin. 12 Baraah hawsooteeb Heeroodis beeti biikiraafneet toona soomamiyaan. Aree weer salalii whaashoohna beeti yꞌagarna.

13 Baraah giigiyaanihoob, Wꞌankwanaay malak hawsooteeb Yuusifii dehaay lawiyaayt, "Yakaa, wꞌoorwa toondeewwa yaksaat Masir beeti foora. Ani sooyaniyook ookiik beentooy hagita. Heeroodis wꞌoori madar niyaamiini akay, barooh harriiw." idi. 14 Aflaay baruuh yakiyaayt, wꞌoorwa toondeewwa whawaadi door Masir beeti haay idif. 15 Heeroodis iyaneeb ookiik aree beentooy isꞌa. Aflaay Wꞌankwana unabi miidalaabii diyaab iiktiyeet tuuna sidik tiikti, "Wꞌooru Masree waliikan." diyaabi. 16 Heeroodis Imajuusi itilneet toona ikanihoob, gadabiyaayt Beetlahamwa yhadabeeyoohwa iifiin yꞌar malu hawlaawwa eedhoomwa iiktiin kassaah itoodiirneet toona amir hassiya. Beet toona baruuh Imajuusee kanaa iifi. 17 Malya unabi Irmiyaay miidalaabii attiyoodiyaat tuuna sidik tiki:

18 "Raamaay hiss itmassaaw,

waawtiiwwa akra gadabtiiwwa hiss,

Raaheel yꞌareeyooh jillaay waawtini,

aree baraah ayaabayt,

wꞌallaayrahamoomti tinriib." diyaabi.

19 Heeroodis iyaayt harꞌii, Wꞌankwanaay malak Yuusifii dehaay hawsooteeb Masreeb lawiya. 20 Umalak "Yakaa, wꞌoorwa toondeewwa yaksaat Israaꞌiileeb whaash beeti giigaa. Baliin wꞌoori madar yhiriw, oontꞌa ayaaba." idi.

21 Aflaay Yuusif yakiya, wꞌoorwa toondeewwa iyhaayt Israaꞌiileeb whaash beeti giigiya. 22 Laakiin Yuusif Arkhiilaawoos ubaaba Heeroodisi mhiin hadꞌaab Yahuudaay iikti indiyeet toona imaasiwihoob, beentooy oogiig irkwi. Baruuh hawsooteeb soomamiyaayt, Jaliileeb whaash beeti yꞌagar. 23 Aree baruuh giigiyaayt Naasiraab iidneet madiinaatiib ikwiri. Aflaay inabiyaayi miidalaabii attiyoodiyaat tuuna sidik tiikti, "Baruuh Naasiraayi ittiyuud indi." diyaaba inabiya.