1 Yasuuꞌa teen teena idiit harꞌii, Jaliilee giigiyaayt, Urduni bhar oodar ooraaw iifiib Yahuudaay whaash ibi. 2 Gwida dehay barooh iramna, aree baruuh bareeh beentooy mheeliya.

3 Fariisi gwadi jarrabiini jillaay bariiyooh dehaay eeyaan. Baraah barooh raatiyaana, "Uutak takatooh ikati sababiika fandiigeet tuuna halaalu?" idiin.

4 Yasuuꞌa "Ukhaalig whankaay kwaabwa rabaabwa akhligiyaneet toona baraak agriiyaab kitteena han? 5 Malya Ukhaalig, ‘Oon usabbii uutak ifarooyeeh ishti dꞌiit, takatiyooh geeb gaal ikati, mhallaahna aree hiddaab gaal bashar ikatiin.’ diyaabi. 6 Aflaay baraah maloob kiikeena, laakiin gal ikatiin. Shaawti Ukwaasana shaawawiyaab ikatiyeet toona, wꞌaadami biisehaggiil." idi.

7 Baraah raatiyaana, "Aflaay unabi Muusa: tak takatooh fandiigihoob, fadageet waragt iniiwka giigsiini naanhooy diyaabu?" idiin.

8 Yasuuꞌa igwibi, "Bareek iginꞌaayaakna akraabayt Muusa ifadag dehookna ajjasiya. Laakiin whankaay bak kiiki. 9 Ani andi hookna: tootakat tootkaal aagib nuun weer sabbii fidigtiit takat weet indꞌiir uutak jiknaab ikati." idi.

10 Ikwiriyaatay bariiyooh dehaay, "Aflaay ootakwa tootakatwa eebtik bak tikatiyeek, shaawti idꞌari naaw hanyiis." idiin.

11 Yasuuꞌa igwibi, "Laakiin baliib Ukwaasana hiiyyaab ikatiyeeb nuun, een ibhali uudehay kassaah kaꞌagbiliyaan. 12 Uudehay gwadi eedꞌar kaꞌadgiriyaana, baraah kooteeb akay faraya. Gwadi aree dehay wari kooteeyaaba. Aree wari eedꞌar tibreeteet hadꞌaayeeti jillaay kiidꞌirna. Teen bateeh agbiliiniib uutak, toon toona basaki." idi.

13 Malya uudehay Yasuuꞌii dehaay dabalooya ar haay eeyaaniit, bareeyooh kehii yꞌayeeh daaseetiit baarakiiniyeet toona isehariwna. Laakiin ikwiriyaatay oon oodehay bareeh haay eeyaan idaaninna.

14 Yasuuꞌa "Yꞌar idabalooya haay mꞌaanaheeb, baaꞌafiina! Tibreeteet hadꞌaayi een bareetooh tikati." idi. 15 Baruuh bareeyooh kehii yꞌayeeh daasiyaayt harꞌii, beentooysii giigiya.

16 Oontꞌa tak Yasuuꞌii dehaay eeyaayt, "Seedna, umidhhan udaayim amanriyi jillaay ibakii naan daayiina sakaniyeet toonaatu?" idi.

17 Yasuuꞌa bariiyooh dehaay, "Naanhooy daayiinaayt raattiniyaheeb? Udaayi Oongaal oobhaat ikati. Umidhhani shuumti harriiweek, tiwasi sinaakira." idi.

18 Uutak "Tiwasi keeyaanta?" idi.

Yasuuꞌa "Baadiira, baajakiina, baagwihara, gwisreet badeha baabideha, 19 Ifarooyeek hamooysa, ushawawook ugarooyiitook areeya" idi.

20 Wꞌoor wꞌadhami, "Teen teena kasteeh sakan, masi weena naan nakwisu." idi.

21 Yasuuꞌa "Winneet timmiimi tindiyeek, tibariiyeenaaka dilibaat imiskiina hiiyya. Aree tibreeteeb miraay imaar tindiya. Malya mꞌaat, ramaheeb." idi.

22 Wꞌoor wꞌadhami een ibhali imaasiwihoob, baruuh gwida miraay iibri akay, gadabaa fidnaab giigiya.

23 Malya Yasuuꞌa ikwiriyaatayee dehaay, "Ani oosdik andi hookna: tibreeteet hadꞌaayi gaba taki ishuumti akraanaati. 24 Masi andi hookna; gaba tak Ukwaasanaayt hadꞌaayeeti ishuumtiika, kaam ibraatiit tilꞌiitii ishuumsiti laamakaabi." idi.

25 Ikwiriyaatay toon toona imaasiwnihoob, winneet ajjabamiyaaniit, "Aflaay aaw iidhhan indi?" idiin.

26 Yasuuꞌa bareeyooh nakamiyaayt, "Naat gat Ukwaasana baakaay uudehay biiꞌadgirayneet eefeena, laakiin Ukwaasanaay dehaay naatka laamaati." idi.

27 Bitrus bariiyooh dehaay igwibi, "Hinin naatka ningad nidꞌiit barook niram. Aree hinin beentooy naan dehoon iikti tindi?" idi.

28 Yasuuꞌa bareeyooh dehaay, "Ani oosdik andi hookna: Wꞌaadami Oor umatuuniit tehadꞌaayeetiyooh eesitꞌihoob taan taana masi gayiimi iyadna. Baraak aneeb iram han tamna maloot hadꞌaayeeteeb iistꞌa tiyadna. Tigabiila titamna malu Israaꞌiileet hikimi tiyadna. 29 Igawaayeeh tari isanaayeeh tari tikwaateeh tari baabooh tari deetooh tari areeh tari dirꞌaateeh, anii jillaay yꞌish uudehay kassaah sheeb haddiina gwidakaat ittiyiw iyadna. Aree umidhhan udaayim kwasaami iyadna. 30 Laakiin gwida awwal iifiin, wꞌagiya iikti iyadna. Aree gwida wꞌagiyaay iifiin, awwal iikti iyadna." idi.