1 Been oodoor whaakim Heeroodis Yasuuꞌiib usakana imaasiw. 2 Baruuh oodehay igeebooh iifiinnee dehaay, "Uun baruuh Yuuhannaab Umoosana ikati. Baruuh tuyatii yakiya! Toon tunaatii aree timꞌuujisaati akrir bariiyooh geeb shagaameen." idi.

3 Heeroodis oontꞌa Yuuhannaab yꞌabik, yhaakwir aree oosjin idꞌi. Baruuh Yuuhanna oosjin haay iidꞌeeb usabab Heeroodiyaas usanooh Fiilibusiit tootakati sabab iikti. 4 Yuuhanna bariiyooh dehaay, "Saniitook tootakati jikuun dehook halaal kiiki." diyaabi. 5 Heeroodis Yuuhannaay madar yhariw, laakiin oodehay irkwi. Uudehay Yuuhannaab nabiib hiisiin.

6 Heeroodisiit toofraytiit yinti wꞌiid iikti akay, Heeroodiyaasiit oot bareeyooh dehaay tilag. Heeroodis aree winneet afirhista. 7 Baruuh tꞌoor teharriiweet toona kastooh iniiweet toona halafooya. 8 Batuuh toondi timkaraayt, "Toon tukoobaatiib Yuuhannaab umoosanaay ugirma hiiyyaheeb." tidi. 9 Whadꞌa winneet gadabiya laakiin tehalafooytiyooh sabbiiwwa, udiraari kehii iifiin yꞌiibaabkinaayi sabbiiwwa, baruuh tꞌoor teharriiweet tuuna ibakii tikatiyeet toona sooya. 10 Yuuhannaayt tꞌala usijniib ikitꞌana. 11 Malya Yuuhannaayiib ugirma koobaatiib haay eeyaaniit tꞌoor yhiin. Tꞌoor toondi ookiik tukoobaatiib tifiyak. 12 Yuuhannaay ikwiriyaatay eeyaaniit tukinaaja yaksiyaaniit ibisna. Malya baraah giigiyaaniit Yasuuꞌaab sooyaan.

13 Yasuuꞌa toona tutikeet imaasiwihoob, falluukaat yꞌamaayt oodꞌooh nigiya mhiin ibi. Uudehay toon toona imaasiwnihoob, timadiinaatee ragadaayee barooh iramna. 14 Yasuuꞌa tufalluukaatii tikwiyanihoob, gwida dehay rhiya. Bareeh dehaay nꞌakwmanaayaayt udehayoohna eelhaab dehaay mheeliya.

15 Whawaad idwilihoob aree, ikwiriyaatayaah bariiyooh dehaay eeyaaniit, "Uun whaash mingaayamaabu, aree hawaad yꞌaabi. Oodehay fidnaab giigsaa, shaawti indhiwaayeehna bayiit mꞌariitoohna baꞌiidlibna." idiin.

16 Yasuuꞌa "Uudehay giigtiib shanha kiikeen. Baraak bareeh mꞌariit tamsaana." idi.

17 Baraah "Hinin tooy ay hadhiiwwa maloot aashooyaytwa nibari." idiin.

18 Yasuuꞌa "Bareeh tooy haay mꞌaanaheeb." idi. 19 Yasuuꞌa oodehay oosiyaami kehii isoosꞌa. Malya yhadhi yꞌaywa yꞌaashu imaloowwa iyhaayt teebri nakamiya. Ukwaasana yhamid aree yhadhi katꞌiya. Malya bareeh ikwiriyaatay nuunisiya, ikwiriyaatay aree oodehay yhiin. 20 Uudehay kassaah gabiyaaneeb ookiik tamiyaan. Aree ikwiriyaatay yhadhiyi firkakeet toodhikw tamna malu biileeb hooy toobiyaan. 21 Been uudehay timꞌari tamiyaan ay alfa da iiktiin. Mꞌatwa nisrikaabwa han geeb iifiin.

22 Malya Yasuuꞌa willa ikwiriyaatayeeh tufalluuka isooꞌamaayt eeyam oodar ooraaw ookiik bariiyooh suurii giigisiya. Aree baruuh oodehay igwidaab ibrir. 23 Oodehay giigisiyaayt harꞌii, baruuh siileelti jillaay ribaab reewiya. Whawaad eeyanihoob, beentooy oodꞌooh iifi. 24 Laakiin tufalluuka suur akay whaashii tisgi. Aree ubaraam batooh imꞌikirayt, uumooj batooh iithꞌa.

25 Fajir karuumaab Yasuuꞌa iyami kehii hiireeree bareeyooh dehaay eeya. 26 Ikwiriyaatay barooh iyami kehii hiireeree rhiyaanihoob, winneet irkwiina, "Tuun whiinaaytu." idiiniit, mirkwaayii aadhiyaan.

27 Laakiin Yasuuꞌa willa bareeyooh dehaay, "Ariknaa, uun aneebu! Baarakwiina." idi.

28 Bitrus "Wꞌankwanaay, uun barook tikatiyeek iyameeb yꞌi hook andi sooyaaheeb." idi.

29 Yasuuꞌa bariiyooh dehaay, "Mꞌaa!" idi.

Malya Bitrus tufalluukaatii yakiyaayt iyami kehii hiireeree Yasuuꞌaab beeti ibi. 30 Laakiin baruuh ubaraam rhiyanihoob, irkwiit aayam barooh miyaay yhariwna, baruuh aadhiya, "Wꞌankwana, shidhhanaheeb!" idi.

31 Yasuuꞌa willa iktimayt bariiyooh wꞌayi yꞌabik, "Baruuk ishalik iimaaniyaay, naanhooy eetehaktiniya?" idi.

32 Baraah tufalluuka yꞌamnihoob, ubaraam ingad. 33 Malya baliin tufalluukaatiib iifiin barooh yꞌabidna aree, "Baruuk sidik Ukwaasanaay Oor tikatiya." idiin.

34 Baraah oobhar ikitꞌanihoob, Ganneesaareetiib tikwiyaan. 35 Been whaashi dehay Yasuuꞌaab ikannihoob, yhash oodar iifiin kasseeh diigwataat dehaay ifdigna. Uudehay kasseeh udehayoohna eelhaab bariiyooh dehaay haay eeyaan. 36 Uudehay barooh inꞌalna, "Uudehay aalha whalakiitook shinki batehiin." idiin. Bariiyooh whalak tehiyaan aree kassaah inꞌirna.