1 Tusabti harꞌii, tꞌasaramaatiit yint tehankaaneet fajir karuumaab, Maryam Majdaleenaawwa Maryam tuuraawwa umiimash iishbibni jillaay giigiyaan. 2 Gaal door beentooy tuubuut winneet katatta. Wꞌankwanaay malak tibreetee tikwiyaay eeyaayt, umiimash shuumiya. Wꞌawi harꞌa kwaaleelisiyaayt kehii isꞌa. 3 Baruuh utalaw tꞌiiteebu, yhalakaayaah aree ibꞌaluukiit eeraaba. 4 Ikajar igwꞌaadiiga winneet barooh irkwiina, idhiyaaniit aya da tꞌiiteeb iiktiin. 5 Umalak timꞌatee dehaay, "Biirakwiina, bataak Yasuuꞌaab isallabamiyaab tehariwneet toona akteen. 6 Baruuh tooy kiihaay, baruuh suur diyaab iiktiyeet tunaatiit yakamiya. Mꞌaanaat baruuh hooy daasamaab iiktiyeeb oomhiin shibibna. 7 Aflaay willa difnaat ikwiriyaatayeeh sooyaana, ‘Baruuh tooyat hooy yakiya, suurookna aree Jaliil ookiik saki indi. Beentooy barooh rhi tiyadna.’ diina. Oontꞌa sooyan hookna." idi. 8 Shaawti taamꞌat umiimashii isgiini sakiyaana, irkwiina laakiin firhaat itabna. Malya dhaabiyaaniit ikwiriyaatay sootiib yhariwna. 9 Gaal door Yasuuꞌa bateeh imriit, "Shoob" idi. Bataah bariiyooh dehaay eeyaana, iragada yꞌabikniit barooh yꞌabidna. 10 Yasuuꞌa bateeh infaraad, "Biirakwiina! Difnaat aniib isana Jaliil eebiineet toona sooyaana! Beentooy baraah rhiheeb iyadna." idi.

11 Taamꞌat masi usalaliib sakee, igwꞌaadiigaayee gwadi tumadiina ibeeniit toona turhiyaaneet ifagiiriya isuurkina naatka sooyaan. 12 Ifagiiriya isuurkina yꞌeegrimaayi geeb immararaayniit mikir imkirna. Ikajar gwida mhallaga balsaat yhiin. 13 Baraah ikajaree dehaay, "Baraak bak diina ‘Ikwiriyaatayaah whawaad eeyaaniit hinin diwee barooh igwiharna.’ diina. 14 Aan ibhali whaakim ikatimneek, hinin barooh agbilisnay, aree bareek igwirhaayee iifrꞌa hookna indi." idiin. 15 Aflaay ikajar imhallaga iyheena, aree toona baraah soomamiyaaneet idꞌiin. Aree aan ibhali Iyahuudi bitik oon amsi ookiik hadiidameen.

16 Malya ikwiriyaatay itamna malu Jaliil ibeena, Yasuuꞌa beena diyaab iiktiyeeb oorba ibeen. 17 Baraah barooh rhiyaanihoob, barooh yꞌabidna, gwadi laakiin eetehakiyaan. 18 Malya Yasuuꞌa dehaay eeyaayt, "Kastuuh tehadꞌaayi toobuutwa tibreeteebwa teefeet aneeb attiyeewiyaatu. 19 Shaawti difnaat kasseeh yhasheeb gwida kwiriyaatay dꞌiina. Bareeh Ubaabaawwa, Wꞌoorwa, Eeshuuk Imugaddasaayeewwa simii misna. 20 Ani sooyaneetookna toona aree kastooh bareeh allamaana. Ani han sidik diimaab geebookna eefi, tuduniyaati agiya ookna ookiik geebookna eefi." idi.