1 Fariisiiwwa Sadduukiiwwa Yasuuꞌii dehaay eeyaaniit barooh jarrabtiib yhariwna. Baraah tibreetee alaamaati rhisti hooy yhariwna.

2 Yasuuꞌa igwibi, "Tuuyin oodhib danwiilihoob ‘Tuuyin adaroot tikatiyeek uujaw ishbuub indi.’ tiyadna. 3 Fajir aree ‘Teebri adruur hooy eefi thibnamaata akay amsi biri yaami indi.’ tiyadna. Baraak teebri shibibtiit naan iikti tindiyeeb gidtiit tikteenna. Laakiin idamaneet alaama fassari kitdiina. 4 Amaag dehaywa wꞌiimaan baabariinwa alaamaat raateen! Laakiin unabi Yuunisiit tꞌalaama nuun weena soomami kitdi." idiit Yasuuꞌa yꞌish giigiya.

5 Baraah oobhar ikitꞌanihoob, ikwiriyaatay yhadhiyi yaksiti ibaadhinna. 6 Yasuuꞌa bareeyooh dehaay, "Digwagwna, igarooyeekna gwꞌadna, Ifariisiiwwa Isadduukiiwwa hamiir hooy sifanna." idi.

7 Baraah toon toona taktak haay sakanaayaana, "Tuun tuuna hadhiib yaksaab kinki akay tikati." idiin.

8 Yasuuꞌa ibhaliyeehna iktiinayt, bareeh raatiya, "Baraak ishalik iimaani, yhadhiyi naawiib naanhooy taktak sakanaateena? 9 Masi afhamaab kitteena han? Yhadhi yꞌay, ay alfa dehay tamiyaaneeb kashꞌitaana han? Aree naaka biili toobamaab tidbilneeb kashꞌitaana han? 10 Tari yhadhi yꞌasarama fadhig alfa dehayiib aree? Naaka biili toobamaab tidbilna? 11 Baraak kak kaꞌafhamtaana? Ani hadhiyeeb dehookna hadiidaab kaaki. Laakiin Ifariisiiwwa Sadduukiiwwa hamiirii sifanna. 12 Malya baruuh whamiir yhadhiyeeb daamiiniinaay gwꞌadaadtiib hadiidaab biikaayeet toona baraah ikanna. Laakiin Ifariisiiwwa Sadduukiiwwa tꞌaliimii sifanna miyaad iiktiyeet toona ikanna." idi Yasuuꞌa.

13 Yasuuꞌa Gaysariyaab Filiibusi haashiib eeyanihoob, ikwiriyaatayeeh raatiya, "Uudehay Wꞌaadami Oor aabu iyadna?" idi.

14 Baraah igwibiina, "Gwadi Yuuhanna umoosana iyadna, wari Eelyaab iyadna, masi wari Irmiyaab tari inabiyaayee gaalu iyadna." idiin.

15 Yasuuꞌa "Baraak aree? Ani aabu tiyadna?" idi.

16 Siimoon Bitrus igwibi, "Baruuk Umasiih tikatiya, Ukwaasana udhhaniinaay Oor." idi.

17 Yasuuꞌa bariiyooh dehaay, "Siimoon Yuunisi oor, baruuk baarakamaabwa, tuun tuuna dehayii dehook lawaat kitti. Laakiin Baabu tibreeteeb eefi dehook lawisiya. 18 Ani andi hook Bitrus baruuk liilaawwa, oon uliilaawi kehii aree tukaniisaatu iidꞌir andi, tuuyat tuukna han batooh iigrib kitdi. 19 Tibreeteet hadꞌaayeeti imiftaha iyaaw hook andi. Baruuk tubuutiib hankwiireet tuuna, tibreeteeb han itehikwir tindi. Tubuutiib fandiigeet tuuna aree tibreeteeb han itfidig tindi." idi. 20 Aflaay Yasuuꞌa ikwiriyaatayeeh baruuh Umasiih ikatiyeet toona dehay biisooyayneet toona sooya.

21 Been oodoori harꞌii, Yasuuꞌa Algudus bayiit yꞌeegrimaawwa, ifagiiriya isuurkinaawwa, whaggi koojaayi ayeebwa gwidaat lhanay ibakii lhami indiyeet toona, ikwiriyaatayeeh sooya. Ibakii itoodiireet toonaawwa, tooyin tumhayaatiib laakiin dhhantiit yakiiniyeet toonaawwa sooya.

22 Bitrus barooh haay itfalaayt dinneeb badooya, "Abadan Wꞌankwana! Tuun iikti kitdi!" idi.

23 Yasuuꞌa bariiyooh nakamiyaayt, "Yaa uubliis, hoosu sigiya! Baruuk usalaliib iigifheeb tindiya. Baruuk Ukwaasanaayt tinaateeb kitkwina, laakiin udehayiit tinaateeb tinkwiina." idi.

24 Malya Yasuuꞌa ikwiriyaatayeeh dehaay, "Anii harꞌii gaal han yꞌiiniyeek, ugarooyooh ibakii ankiriini aree usaliibooh ibakii yaksiini, malya eetriimheeb. 25 Umidhhanooh dibuuy harriiwka, umidhhan kwidhsi indi. Laakiin anii jillaay umidhhanooh kwidhsiiniibka, umidhhan imaar indi. 26 Tak kastooh tuduniya manriyeek, laakiin infiseeh eetniiweek, naan daayiina imaar indi? Tari uutak infiseeh naanaatiib bandiil? 27 Wꞌaadami Oor Baabiyooh umatuuniib, imalakeeyooh geeb yꞌi indi. Malya nafarka toona tidꞌiyaab ikatiyeet ijir dehaay iyaaw indi. 28 Ani oosdik andi hookna: gwadi tooy ingadiin eefeena, Wꞌaadami Oor tehadꞌaayeetiyooh yꞌee rhaab baakaay tooyat dꞌamsi kiidiin." idi.