1 Fajir karuumaab ifagiiriya isuurkinaawwa oodehayi eegrimaawwa kassaah eeyaaniit immakakaarna, aree Yasuuꞌi madar niyaamiyaan. 2 Baraah Yasuuꞌaab yhaakwirniit Biilaatoos whaakim haay ibeeniit nuuniyaan.

3 Yahuuda Yasuuꞌaab nuuniyaab, baruuh Yasuuꞌaab igwabab isꞌabikneet toona imaasiwihoob, tuubiyaayt imhallaga mhay tamuun ashteetiib iiktiin ifagiiriya isuurkinaawwa yꞌeegrimaawwa dehaay yꞌagir. 4 Baruuh "Ani maagnaayt sakan, nhas booy atil." idi.

Baraah "Beet tuuna tꞌa naanaatu? Abiiyeek tikteena." idiin.

5 Aflaay Yahuuda imhallaga Ukwaasanaay gawi tehooyteeb igidaayt yꞌish giigiya. Malya baruuh giigiyaayt ugarooyooh iskit.

6 Ifagiiriya isuurkina imhallaga yakisiyaaniit "Een ubooyi mhallaga udiini gawi miraayi tehooyteeb idaasti hag kiiki." idiin. 7 Malya een imhallaga, oodehay igirbaani miimashaayi mhiin ikatiini jillaay, oothiin haathkiit dirꞌa haay dilbi miyaay imkirna. 8 Toon tunaati sabbii aree oon amsi ookiik Ubooyi Haash ittiyoodi. 9 Aflaay unabi Irmiya diyaab iiktiyeeb ibhali sidik iiktiina, "Baraah imhallaga imhay tamuun iyheen, Israaꞌiileeb uudehay bariiyooh dehaay kwisuuy agbilyaaneeb, imhallaga ikatiina, 10 aree baraah een imhallaga suur Wꞌankwana anii dehaay diyaab ikatiyeet tunaatiit, oothiin haathkiit dirꞌa haay idlibna." diyaabi.

11 Beenhoob Yasuuꞌa whaakimi suurii isingadna. Whaakim aree barooh raatiya, "Baruuk Iyahuudi hadꞌaawwa han?" idi.

Yasuuꞌa "Awooh, baruuk tindiyeeb akati." idi.

12 Ifagiiriya isuurkinaawwa yꞌeegrimaawwa atehimiyaanihoob, baruuh naat diyaab kiiki. 13 Malya Biilaatoos bariiyooh dehaay, "Aan baraah kehook ibadehaneet tibadeha kitmaasiwa han?" idi. 14 Laakiin Yasuuꞌa naat han diyaab kiiki. Aree whaakim winneet ajjabamiya.

15 Oontꞌa whaakim aadaat iibri, wꞌiidi doorka abuukiib gaal uudehay waasiiniyiibka iifdig. 16 Been oodoor atookkina amaag tak abuukiib Baarabaas iidneeb iibriin. 17 Aflaay uudehay igwida immararaayna, Biilaatoos bareeh raatiya, "Keeyaab dehookna fiduug hoosu tehariwna? Baarabaas han Yasuuꞌaab beeb Umasiih ittiyoodiib?" idi. 18 Biilaatoos baraah Yasuuꞌa hasaadaateeb haay yꞌaa barooh nuunaab iiktiineet toona iktiin.

19 Biilaatoos ugaadiit taawlaatiib iistꞌa, tutakatuuh toon tudiigwat dehaay tifdig, "Been ootak oonhas naat baaweera! Ani amsi bariiyooh sabbii amagt hawsa hawsooyan." tidi.

20 Laakiin ifagiiriya isuurkinaawwa yꞌeegrimaawwa oodehay igwidaab bhaliisamiyaaniit, Baarabaas fidigtiit Yasuuꞌi madar hooy yhariwna.

21 Biilaatoos "Een bareeh mhalleesoohna keeyaab dehookna fiduug hoosu tehariwna?" idi.

Baraah "Baarabaas!" idiin.

22 Biilaatoos "Shaawti Yasuuꞌa beeb Umasiih ittiyoodiib, kak awari?" idiit raatiya.

Baraah kassaah "Barooh sallabaa!" idiin.

23 Biilaatoos "Naanhooy? Baruuh amaagna naan gwibbaabu?" idi.

Laakiin baraah tageegsiyaani waliikiyaana, "Barooh sallabaa!" idiin.

24 Biilaatoos shaawti naan iiwiriyeeb igamihoob, uudehay winneet yhaseena aree jawiyaan. Baruuh yam yakisiyaayt oodehayi suurii yꞌayeeh ishaagwidh, "Ani oon ootaki booyii nhasu, baraak haay raatamamteena!" idi.

25 Kassaah uudehay bhaliiyaana, "Bariiyuuh uubooy hini kehii badaayi, aree yꞌareeyoon kehii badaayi!" idiin.

26 Malya baruuh bareeyooh dehaay Baarabaas ifdig. Laakiin Yasuuꞌaab kwirbaajii ishoothꞌa, aree barooh sallabiini jillaay nuuniya.

27 Malya whaakimi kajar Yasuuꞌaab whaakimi gaw haay shuumiyaaniit, kassaah kehii idbalna. 28 Malya barooh yhalaka hooy ifirꞌaniit, adaarhamaash halak istookwna. 29 Malya ikajar kwiluuliit naweetee idꞌiiniit Yasuuꞌiib ugirmaay kehii daasiyaan. Kwoolay wꞌayiib idꞌiiniit bariiyooh suurii ignafniitka haay kashiyaan. Malya baraah "Iyahuudi hadꞌa, dabaaywa?" idiin. 30 Ikajar Yasuuꞌi kehii tifiyaana, ukwoolay hooy iyheeniit haay ithꞌana, doorka ugirma haay ithꞌana. 31 Ikajar barooh haay kashiyaani harꞌii, whalak hooy giigisiyaaniit barooh ugamiisooh kehii idꞌiin. Malya sallabiini jillaay haay giigiyaan.

32 Baraah itfirꞌanihoob, Geerawaanee iikti tak bareeh imꞌashaash. Barooh Siimoon iidna, ootak ginuuf aduuyii usaliib isfayikna. 33 Malya baraah Goolgoota iidni mhiin eeyaan. Goolgoota, girmaayt miitaat miyaadi. 34 Beentooy baraah Yasuuꞌa haab gwꞌamiiniib yhiin, aree wha hamiinaayt hooy shaawaaba. Laakiin baruuh dꞌamisiyaayt ugwꞌiti irib. 35 Malya ikajar Yasuuꞌaab sallabiyaani harꞌii, bariiyeeh yhalaka gurꞌaat igidniit imꞌadhdhaadhna. 36 Malya baraah nꞌati isꞌaniit beentooy barooh igwꞌadna. 37 Yasuuꞌiib ugirmaay kehii bak iktibna: Uun baruuh Yasuuꞌaab Iyahuudi hadꞌa ikatiibi. 38 Bariiyooh geeb malu gwihara sallabiyaana, gaal umaygwadii dehaay weer aree utarhagwadii dehaay sallabiyaan. 39 Uudehay yhasamiin barooh neewiyaana, kashaatiib igirmaayeehna iigidna. 40 Baraah "Baruuk Ukwaasanaay ugawi katꞌiti harriiwa, mhayt yinaateeb tindꞌiira, ugarooyook shidhhana! Ukwaasanaay Oor tikatiyeek usaliibii nꞌati tikwaa!" idiin.

41 Ifagiiriya isuurkinaawwa, whaggi koojaawwa, yꞌeegrimaawwa barooh haay kashiyaan. 42 Baraah "Baruuh oodehay eeraw ishidhhan, laakiin ugarooyooh ishidhhin kiidi! Baruuh Israaꞌiili Hadꞌa ikati! Oontꞌa usaliibii batikwi! Malya hinin barooh aamani niyad. 43 Baruuh Ukwaasana aamaniini, Ukwaasana oontꞌa barooh harriiweek baꞌishidhhin, baruuh ‘Ani Ukwaasanaay Ooru.’ iid." idiin. 44 Igwihara bariiyooh geeb sallabamiyaan han bak barooh amaag iidna.

45 Nabhoob, gaalhoob kastuuh tuubuur thibinamta. Kassuuh uumbꞌi wꞌasir ookiik thibin iki. 46 Himniit tuusꞌa mhayt tikayihoob, Yasuuꞌa tageega hissii aadhiya, "Eelooy, Eelooy, lamaa shagabtani." idi. Aan ibhali "Ukwaasanaayu, Ukwaasanaayu, naanhooy tꞌishaheeb?" miyaadi.

47 Shalik dehay beentooy ingid beet toona imaasiwnihoob, "Baruuh Eelyaab waliikiini." idiin.

48 Igidiyeesooh bareesooh gaal dhaabiyaayt asfoonjiib imri. Baruuh wꞌasfoonji haab hamiib itib, hindiib yhakwir. Malya Yasuuꞌa gwꞌiyi jillaay iyiw. 49 Uudehay aaraw "Oontꞌa barooh ookna isha dꞌiya, Eelya yꞌeetiit ishidhhiineek niishbib!" idiin.

50 Yasuuꞌa win hissii masi waliikiyanihoob, ishuukeeh sallamiya.

51 Been oodoor whalak Ukwaasanaay ugawiib salaaw mhakwaliisii eedhoom ookiik malu mhiin ishtat. Tuubuut katatta, iliilaw katꞌamiyaan. 52 Imiimasha katꞌamiyaaniit ingalna, gwida mugaddasa dehayi garu suur ayaab iiktiin, yakiyaaniit idhhanna. 53 Yasuuꞌiit tooyati yakti harꞌii, baraah imiimashaayee ifirꞌana. Malya tumadiina tumugaddas ibeena, aree gwida dehayii dehaay lawiyaan. 54 Udaabitwa ikajar geeb iifiinwa Yasuuꞌaab iigwꞌad baliin, tubuuti idhti rhiyaan. Kastooh toona tutikeet rhiyaanihoob irkwiiniit ajjabamiyaana, "Sidik uun baruuh Ukwaasanaay Ooru!" idiin.

55 Gwidaat mꞌat beentooy iifiint, sagi mhiinii iishbibna. Bataah Jaliilee Yasuuꞌaab iramna, baruuh yhirweet teena tikwuukw yhiriwna. 56 Bateeh Maryam Majdaleena hooy tiifi, Maryam Yaaguubwa Yuusifiit tuundeewwa, Sabadiib yꞌareet tuundeewwa, taan bataah iifiin.

57 Whawaad idwilihoob, gaba tak Raamaay iiktiib Yuusif iidneeb beentooy eeya. Baruuh uukna Yasuuꞌi kwiriya iikti. 58 Baruuh Biilaatoos ibaayt, Yasuuꞌiit tukinaaja hooy yhariw. Biilaatoos tukinaaja Yuusif iyawneet toona sooya. 59 Yuusif tukinaaja yakisiya, nhas halakiib ishaamim. 60 Malya barooh gayi miimashooh ooknaay, liilaawi bitik firkaab iiktiyeeb, bariiyooh daasiya. Umiimashi dheefaay aree win awi kehii kwaaleelisiyaayt hooy giigiya. 61 Maryam Majdaleenaawwa Maryam tuuraawwa umiimashi gidehii iistꞌana.

62 Tooyin tumalya sabtu, ifagiiriya isuurkinaawwa Ifariisiiwwa Biilaatoos ibeen. 63 Baraah "Seedna, baruuh masi dhhaniib iiktiyi door been wharaay tak, ‘Mhayt yinaati harꞌii, masi yaki andi.’ diyaabi. 64 Aflaay baruuk umiimash mhayt yina ookiik daayiib sigwꞌada. Bariiyaah ikwiriyaatay yꞌeetiit tukinaaja biigwihaarna, malya oodehay sooyiit, ‘Baruuh tooyat hooy idhhan’ iyaad iyadna. Aan aagwisir yꞌaakhar ikatiin aree eegwisir iraweeka amagkaab ikatiin." idiin.

65 Biilaatoos "Gwꞌadna, difnaat umiimash baraak tehariwneet tehayꞌaatii sigwꞌadna." idi. 66 Baraah umiimash aweeb kehii idꞌiiniit daayiib assiyaana, aree kajar isigwꞌadna.