1 Yasuuꞌa oorbaay darii nꞌati tikwiyanihoob, gwida dehay barooh imooraamna. 2 Tak bhadh iibriib bariiyooh dehaay eeyaayt whii ignaf malya, "Wꞌankwanaay, sinhasaheeb, harriiweek sinhasooyti adgirtiniya." idi.

3 Yasuuꞌa wꞌayooh ibriraayt ootaki kehii daasiyaayt, "Aharriiw, nhas akaa!" idi. Igidiyeesooh uubhadh ootakii giigiya aree baruuh inꞌir 4 Malya Yasuuꞌa ootakii dehaay, "Toon toona tak han baasooyaa, laakiin ugarooyook ufagiiri rhisaa, aree Muusa sooyaab iiktiyeeb oomiyaaw firꞌa. Malya baraah baruuk tinꞌireet toona iikan iyadna." idi.

5 Yasuuꞌa Kafarnaahuum shuumiyanihoob, Roomaani daabit dehaay eeyaayt, shamaamt hooy yhariw, 6 "Seedna, ukishiyaayu amꞌadhdhaabu, ugawiib bꞌiini aree winneet lhaabu." idi. 7 Yasuuꞌa bariiyooh dehaay, "Ani diftiit barooh mheeli andi." idi.

8 Udaabit "Wꞌankwanaay, baruuk aniib ugawiib ishuumti kaꞌastehalan. Laakiin gaat kalma diyaa, shaawti ukishiyaayu iinꞌir indi. 9 Ani uknaayu hadꞌaayeeti whii shagaamani taku, aree kajar anii whii shagaameen abari. Oon barooh sooyiit ‘Difaa!’ andiyeek indiif. Been barooh aree ‘Mꞌaa’ andiyeek yꞌiini. Ukishiyaayu ‘Toon sakaa!’ andiyeek sakiini." idi.

10 Yasuuꞌa een ibhali imaasiwihoob, ajjabamiyaayt barooh iitram oodehayii dehaay, "Oosdik andi hookna: Israaꞌiileeb bak win iimaan iibriib gaal han miraab kaaki. 11 Toon toona aree andi hookna: gwida dehay uyintalawiiwwa uyindhibiiwwa yꞌi iyadna, Ibraahiimi geeb iistꞌa iyadna, Isehaagi geebwa, Yaaguubi geebwa, tibreeteet hadꞌaayeetiib firhiib iistꞌa iyadna. 12 Laakiin tehadꞌaayi shuumeen ikatiin baliin barraab uthibniib ituugid iyadna. Beentooy waawi iyadna, lhamiit tikwileeteehna ishuuthithꞌa iyadna." idi.

13 Malya Yasuuꞌa udaabtii dehaay, "Difaa! Oontꞌaaneet baruuk aamantaneet tunaatiit iikti tindi." idi. Aree ukishiyaayuuh beet toosꞌa tookna inꞌir.

14 Yasuuꞌa Bitrusiib oogaw eeyanihoob, Bitrus tehamtuuh abaakiyaa nꞌaaliib bꞌee rhiya.

15 Yasuuꞌa batooh wꞌayi yꞌabikihoob, yꞌabaaki hooy giigiyaan. Batuuh asti yaktaayt bareeh shagaamta.

16 Whawaad eeyanihoob, gwida dehay jin hooy iifiineeb bariiyooh dehaay haay eeyaan. Baruuh eejin kalmaatii hooy ifirꞌat, aree kasseeh eelhaab mheeliya. 17 Tuun tuuna Unabi Isyaasi geebii hadiidamaat toona sidik tiikwsi:

"Baruuh udehayoon eelhaab isikw iyhi,

aree tilhanayteen ifyak" diyaabi.

18 Yasuuꞌa oodehay igwidaab udarooh rhiyanihoob, oobhar oodar ooraaw beeti ikatꞌaneet toona sooya. 19 Malya haggi kooja gaal bariiyooh dehaay eeyaayt, "Seedna, baruuk teebiyi mhiinka iitram hook andi." idi.

20 Yasuuꞌa igwibi, "Tibꞌashu deeb ibariina, aakilay tibreeteeb dhaabeen gawaab ibariin. Laakiin Wꞌaadami Oor ugirmaayooh hooy shuumsiiniyi mhiin kiibari." idi.

21 Weer kwiriyaataayi bariiyooh dehaay, "Wꞌankwanaay, hankaab diftiit baabu ayaabuuyt iibis andi, wꞌidin hiiyyaheeb." idi.

22 Laakiin Yasuuꞌa bariiyooh dehaay, "Ramaheeb, yꞌaya udehayoohna yꞌayaab aakna baꞌiibisna." idi.

23 Malya tufalluuka yꞌam, ikwiriyaatayaah han iramna. 24 Gaalhoob akra baraam oobhariib eeya. Aflaay uumooj tufalluuka oomamiya. Laakiin Yasuuꞌa diwi. 25 Ikwiriyaatay giigiyaaniit barooh isibꞌarna, "Wꞌankwana, shidhhana hoon! Aayam iyaay hoon iyadna." idiin.

26 Yasuuꞌa igwibi, "Baraak ishalik iimaani, naanhooy tirkwiina?" idi. Malya asti yakiyaayt ubaraamwa oomoojwa idaanin shaawti baraah ingadna.

27 Uudehay ajjabamiyaaniit raatiyaana, "Uun kak eefi taku? Ubaraamwa uumoojwa han barooh isnaakiirna!" idiin.

28 Baruuh oobhar oodar ooraaw Gadareeni haash iktimihoob, malu da jin hooy iifiineeb miimashaayee yꞌee barooh imriin. Baraah winneet ribshaayt iikwsiinayt, uudehay gaal han been usalalii kasakiyaan. 29 Aanda aadhiyaaniit, "Ukwaasanaay Oor, naan hoon harriiwa? Uudoor wꞌattiyoodiyaab yꞌaab baakaay tooy hini lhastii dehaay eeta han?" idiin.

30 Bareesooh sagi mhiin gwida khansir ikwiir iifiin. 31 Aajin Yasuuꞌaab inꞌalna, "Iifirꞌa hoon tindiyeek, ikhansir shuumsaa hoon." idiin.

32 Baruuh bareeyooh dehaay, "Difna" idi. Aajin ifirꞌaniit ikhansireeb shuumiyaan. Ikhansir kassaah oorbaay nꞌati dhaabiyaaniit ubhariib dhibiyaan, malya iiyaan. 33 Baliin ikhansir iishkwiin aanda dhaabiyaaniit tumadiina ibeen. Kastooh toona aree oodehay sooyaan. Aajin hooy iifiineeb eenda han naan dehaay tikayeeb kastooh oodehay sooyaan. 34 Malya kastuuh tumadiinaati dehay ifirꞌaniit Yasuuꞌi ashuush yhariwna. Aree barooh rhiyaanihoob, whaashiisoohna giigiiniyeet toona bariiyooh yhariwna.