1 Tibreeteet hadꞌaayi, whaashikina karuumaab yakeetiit tudirꞌaatiyooh shagaameen shagaamanaab harriiw ootak, tꞌiiteeti. 2 Baruuh bareeh oombꞌi diinaar kiraay iniiweet toona taafagsamiyaayt, shagaamiini jillaay barooh tudirꞌaatooh istoob.

3 Fajir tuusꞌa ashshadhig baruuh ifirꞌa, aree warib shagaab anu usuugi mhiin ingid rhiya. 4 Uutak bareeh infaraad, "Baraak han difnaat aniit tudirꞌaatiib shagaamaana, toona tꞌastehalteeneet aree iyaaw hookna andi." idi. 5 Aflaay baraah giigiyaan.

Aree baruuh masi toosꞌa tutamna malyaawwa tumhayaawwa ifirꞌa, aree tꞌa han beet toona tookna sakiya. 6 Himniit toosꞌa tꞌayya ifirꞌa, masi warib oodar gadee rhiya. Baruuh bareeh raatiya, "Kassooh oombꞌi shagaab anu tooy naanhooy tingadiina?" idi.

7 Baraah "Gaal han shagaasiisaayoon kiiki akay ningadi." idiin.

Baruuh bareeyooh dehaay, "Baraak han difnaat aniit tudirꞌaatiib shagaamaana." idi.

8 Whawaad eeyanihoob, tudirꞌaatikina uwakiiliyooh dehaay, "Ishagaamana waliika aree ukiraayoohna kwisiya, wꞌaakhar shagaamiyaanaay badooya malya whankaaneeb ookiik kwisiya." idi.

9 Ishagaamana toosꞌa tꞌayyaatiib shagaamiyaan eeyaaniit gaalka gaal diinaar imhallagaayeehna iyheen. 10 Aflaay hankaab shagaamiyaan eeyaanihoob, gwidaka mhallaga iyayneeb hiisiyaan. Laakiin baraah han gaalka eeraw tꞌiiti ijaar ikwiseen. 11 Baraah imhallaga iyheenihoob, shaawti udirꞌaatikinaay kehii ashkiimiyaan. 12 Baraah "Aan aanda aakhar shagaamiyaan gaat saaꞌa toobhaat shagaamiyaan. Laakiin baruuk bareeh hineet tikwisiya. Hinin ishaga rabeemna, tooyin nitoodaar." idiin.

13 Laakiin baruuh gaal oobhaanaay dehaay igwibi, "Wꞌaraawuun, ani adlimaayook kaaki. Baruuk gaal diinaarii ishagaamti taafagaab kitta han? 14 Baruuk imhallagaayeek ahaat difaa! Ootak aakhar shagaamiyaab han barook aniiweeb imhallaga aniiweet toona aharriiw. 15 Imhallagaayeesi toona teharriiweet sakaniyeet toona kitti han? Tari ani baakaash akatiyeet toonaati sabbii baruuk haasadtiniyaheeb han?" idi.

16 Yasuuꞌa "Aflaay wꞌagiyaay iifiib awwal iikti indi, awwal iifiib aree wꞌagiyaay iikti indi." idi.

17 Oontꞌa Yasuuꞌa Algudus beeti giigiyeet midda, ikwiriyaatay itamna malu haay itfalayt, 18 "Hinin asti Algudus beeti niibi niyad, Wꞌaadami Oor aree ifagiiriya isuurkinaawwa, whaggi koojaawwa nuuni iyadna. Baraah barooh yat haakami iyadna. 19 Aree baraah barooh ijintiili nuuni iyadna, aree ijintiili barooh haay kashi iyadna, iithꞌa iyadna, malya sallabi iyadna. Laakiin tooyin tumhaya tooyat hooy yaki indi." idi.

20 Malya Sabadiib yꞌareet tuundi yꞌareeyooh geeb Yasuuꞌii dehaay eetaayt, bariiyooh whii tignaf. Bariiyooh naat tehariw.

21 Yasuuꞌa "Naan harriiwii?" idi.

Batuuh "Tehadꞌaayeetiyook een yꞌari imalu gaal umaygwadook ooraaw aree utarhagwadiyook dehaay tisoosꞌeet toona waadiyaayaheeb." tidi.

22 Yasuuꞌa bareeyooh dehaay, "Naan raatteeneeb baraak kitkanna, ani gwꞌi andiyeeb ookaas igwꞌiti adgirteena han?" idi.

Baraah "Adgirnay" idiin.

23 Yasuuꞌa bareeyooh dehaay, "Baraak sidik aniib ookaas hooy gwꞌi tiyadna. Laakiin aniib umaygwad tari utarhagwadii dehaay imiisꞌa aneeb kaaki wꞌiniiw. Aan imhiinan Baabu dehaay soomraab ikatiyeeb baliineeb ikatiin." idi.

24 Ikwiriyaatay itamin toon toona imaasiwnihoob, isana imalooyee yhaseen. 25 Yasuuꞌa bareeh hiddaab waliikiyaayt, "Ijintiili haakma bareeyooh kehii ankwanaab ikatiineet toona yhariwna, aree idaabtaayaahna iwawin bareeyooh kehii hadꞌaameeneet toona baraak tikteenna. 26 Baraak bak kitteena. Bareekna gaal hookna irawi kehii matuun harriiweek, ibakii eeraw shagaamiini. 27 Suurii daamtiib harriiwka, ibakii eeraw shagaamiini. 28 Wꞌaadami Oor akhdimamiiniyee dehaay yꞌaab kiiki, laakiin akhdimiiniyee dehaay yꞌaabi. Aree gwidaana jillaay umidhhanooh iniiwee dehaay yꞌaabi." idi.

29 Yasuuꞌaawwa ikwiriyaatayaahwa Ariihaay giigeeneet midda, gwida dehay bareeh iramna. 30 Malu da hamashaya usalali dar iistꞌana, Yasuuꞌa hasamiini diyee imaasiwnihoob, baraah waliikiyaana, "Wꞌankwana, Daawidi Oor, dehoon nꞌakwmanaaya!" idiin.

31 Uudehay igwida bareeh idaaninna, aree tim ikatiineet toona sooyaan. Laakiin baraah masi tageegisiyaani waliikiyaaniit, "Wꞌankwana, Daawidi Oor, dehoon nꞌakwmanaaya!" idiin.

32 Yasuuꞌa ingadaayt bareeh waliikiya, "Naan dehookna sakaniyeet toona tehariwna?" idi.

33 Baraah "Wꞌankwanaay, rhinayeet toona nhariw." idiin.

34 Yasuuꞌa bareeh dehaay nꞌakwmanaayaayt eegwꞌad tehiya. Aanda willa aagwꞌad rhiyaaniit, barooh iramna.