1 Reis 2

दाऊदो री मौत ओर सुलैमानो रे राज्य री शुरूआत

1 दाऊद जाणो था कि तेसरे मरने रा बखत नेड़े आई गा रा ए, तेबे तिने आपणे पाऊ सुलैमानो खे सारी जिम्मेबारी देंदे ऊए बोलेया, 2 "आऊँ दुनिया छाडी की जाणे वाल़ा ए जेती सबी खे एक दिन जाणा पड़ोआ, इजी री खातर तूँ याओ बानी की काम कर। 3 ओर जो कुछ तेरे यहोवा परमेशरे तांगे सम्बाल़ी राखेया, तेतेरी रक्षा करी की तेसरी बाटा दे चलेया करना ओर जेड़ा मूसे रे बिधानो दे लिखी राखेया, तेड़ा ई तेसरी बिधि, आज्ञा, नियम ओर आज्ञा रा समजदारिया ते पालण करदे रणा; जेते कि जो कुछ तूँ करे ओर जेती केथी तूँ जाए, तिदे तूँ सफल ओए; 4 ओर यहोवा आपणा से वादा पूरा करो जो तिने मेरे बारे दे बोलेया था, जे तेरी ल्वाद आपणी चाला रे बारे दे एड़ी सावधान रओ कि आपणे सारे मन ओर आपणे सारे प्राणो ते सच्चाईया साथे हमेशा मां सामणे चलदे रओ तेबे तो इस्राएलो री राजगद्दिया पाँदे बैठणे वाल़े री, तेरे कुल परिवारो दे कमी कदी नि ऊणी। 5 तेबे तूँ आपू जाणेया कि सरूयाह रे पाऊ योआबे मां साथे क्या-क्या कित्तेया! मतलब तिने नेरो रे पाऊ अब्नेर ओर येतेरो रे पाऊ अमासा, इस्राएलो रे इना दुँईं सेनापतिया साथे क्या-क्या कित्तेया। तिने यो दोनो काये ओर मेलो रे बखते युद्धो रा खून बाह्यी की तिजी साथे आपणे लको रा कमरबंद ओर आपणे पैरा रे जोड़े सेड़ी ते। 6 इजी री खातर तूँ आपणी बुद्धिया साथे काम लया ओर से सफेद बाल़ा वाल़ा अधलोको दे शान्तिया साथे उतरने नि देणा। 7 फेर गिलाद इलाके रे बर्जिल्लै रे पाऊआ पाँदे दया राखणी ओर सेयो तेरी मेजा पाँदे खाणे वाल़े रओ, कऊँकि जेबे आऊँ तेरे पाई अबशालोमो रे सामणे ते नठी गा था, तेबे तिने मांगे आई की तेड़ा ई कित्तेया था। 8 तेबे सुण, तांगे बिन्यामीनी गेरो रा पाऊ बहूरीम शईरो रा शिमी रओआ, जेस दिने आऊँ महनैम शईरो खे गया था तेस दिने तिने माखे कड़काईया साथे स्राप दित्तेया था, पर जेबे से माखे मिलणे यरदन नदिया गे आया, तेबे मैं तेस साथे यहोवे री ये कसम खाई कि मां तूँ तलवारी साथे नि काणा। 9 पर एबे तैं से निर्दोष नि ठईराणा, तूँ तो अक्लमंद मर्द ए; ताखे पता ऊणा कि तेस साथे क्या करना चाईयो ओर तेस सफेद बाल़ो वाल़े रा खून बाह्यी की से अधलोको दे उतारी देणा।" 10 तेबे दाऊद मरीगा ओर तेसखे दाऊदो रे शईरो दे माट्टी दित्ती। 11 दाऊदे इस्राएलो दे चाल़िया साला तक राज कित्तेया, सात साल तो तिने हेब्रोनो दे ओर तेत्ती साल यरूशलेम शईरो दे राज कित्तेया था।

सुलैमानो रा राज्य

12 तेबे सुलैमान आपणे बाओ दाऊदो री गद्दिया पाँदे बैठेया ओर तेसरा राज्य बऊत मजबूत ऊआ।

13 एक दिन हग्गीतो रा पाऊ अदोनिय्याह, सुलैमानो री माये बतशेबा रे नेड़े आया, बतशेबे पूछेया, "क्या तूँ मेल-जोल करने रे नाते आई रा?" 14 तिने ज्वाब दित्तेया, "आ, दोस्तिया रे नाते ते आई रा!" तेबे से बोलणे लगेया, "मां ताखे एक गल्ल बोलणी।" तेसे बोलेया, "बोल!" 15 तिने बोलेया, "ताखे तो पता ए कि राज्य मेरा ऊईगा था ओर सारे इस्राएली मां कनारो खे ऊईगे थे कि आऊँ राज करुँ; पर एबे राज्य बदली की मेरे पाईए रा ऊईगा रा, कऊँकि से तेसखे यहोवे रिया तरफा ते मिली रा। 16 इजी री खातर आऊँ एबे तांते एक चीज माँगुआ, माखे ना नि करनी।" तेसे बोलेया, "बोलदा रओ।" 17 तिने बोलेया, "सुलैमान राजे ताखे ना नि करनी; इजी खातर तेसखे बोल कि से मां साथे शूनेमिन शईरो री अबीशगो रा ब्या करवाई देयो।" 18 बतशेबे बोलेया, "अच्छा, आऊँ तेरिया तँईं राजे गे बोलूँगी।" 19 तेबे बतशेबा अदोनिय्याह रिया खातर राजा सुलैमानो साथे गल्ल बात करने खे गई ओर राजा तेसा साथे मिलणे खे उठेया ओर तेसा गे माथा टेकी की आपणे सिंहासनो पाँदे बैठी गा, तेबे राजे आपणी माया खे एक सिंहासन राखी ता ओर से तेसरी दाँणी तरफा खे बैठी गी। 20 तेबे से बोलणे लगी, "आऊँ तांते एक छोटा जा वरदान मांगू ई इजी री खातर माखे ना नि करनी" राजे बोलेया, "ओ आम्मा, माँग; मां ताखे ना नि करनी।" 21 तेसे बोलेया, "तेसा शूनेमिन अबीशगा रा ब्या तेरे पाई अदोनिय्याह साथे कराई दे।" 22 सुलैमान राजे आपणी माया खे ज्वाब दित्तेया, "तूँ अदोनिय्याह खे शूनेमिन अबीशगा खे ई कऊँ माँगणे लगी री? तेसरिया तँईं राज्य बी माँग, कऊँकि से तो मेरा बड़ा पाई ए ओर तेसखे ई क्या! एब्यातार पुरोईत ओर सरूयाह रे पाऊ योआबो खे बी माँग।" 23 ओर सुलैमान राजे यहोवे री कसम खाई की बोलेया, "जे अदोनिय्याहे ये गल्ल आपणे प्राणो पाँदे खेली की नि बोली ओ तो परमेशर मां साथे तेड़ा ई बल्कि तिजी ते बी जादा करो। 24 एबे यहोवे जिने आऊँ स्थिर करी राखेया ओर मेरे बाओ दाऊदो री राजगद्दिया पाँदे बठयाल़ी राखेया ओर आपणे वादे रे मुताबिक मेरा कअर बसाई राखेया, तेसरी जिन्दगिया री कसम अदोनिय्याह आज ई काया जाणा।" 25 तेबे सुलैमान राजे यहोयादा रा पाऊ बनायाह पेजीता ओर तिने से जाई की एड़ा काया कि से मरी गा।

26 तेबे एब्यातार पुरोईतो खे सुलैमान राजे बोलेया, "अनातोत शईरो दे आपणी जमीना खे जा, कऊँकि तूँ बी मौता री सजा जोगा ए, आजके दिने मां तूँ नि काणा, कऊँकि तूँ मेरे बाओ दाऊदो रे सामणे प्रभु यहोवे रा सन्दूक चकेया करो था; ओर तिना सारे दु:खो रे जो मेरे बाओ पाँदे पड़े थे, तूँ बी दु:खी था।" 27 तेबे सुलैमान राजे एब्यातारो खे यहोवे रे पुरोईत ऊणे रे पदो ते टाईता इजी खे जो वचन यहोवे एलीए रे कुलो रे बारे दे शीलो दे बोलेया था, से पूरा ऊईगा।

योआबो खे काणा

28 इजी रे बारे दे जेबे योआबो खे पता लगेया; योआब अबशालोमो पीछे तो नि गया था, पर अदोनिय्याह पीछे ऊईगा था। तेबे योआब यहोवे रे तम्बूए खे नठी गा ओर बेदिया रे सींग पकड़ी ते। 29 जेबे सुलैमान राजे खे ये सन्देश मिलेया, "योआब यहोवे रे तम्बूए खे नठी गा रा ओर से बेदिया गे ए, तेबे सुलैमाने यहोयादो रे पाऊ बनायाहो खे ये बोली की पेजीता कि तूँ जाई की तेसखे कायी दे।" 30 तेबे बनायाहे यहोवे रे तम्बूए गे जाई की तेसखे बोलेया, "राजे री ये आज्ञा ए कि निकल़ी की आओ।" तिने बोलेया, "ना, मां एथी मरी जाणा।" तेबे बनायाहे वापस ऊई की ये सन्देश राजे खे दित्तेया, "योआबे माखे एड़ा बोलेया।" 31 राजे तेसखे बोलेया, "तेसरे कईणे रे मुताबिक तेसखे कायी दे ओर तेसखे माट्टी दे; एड़ा करी की निर्दोषो रा जो खून योआबे करी राखेया, तिजी रा दोष तां मां पाँदा ते ओर मेरे बाओ रे कराने पाँदा ते दूर करना। 32 ओर यहोवे तेसरे सिरो पाँदे से खून वापस करी देणा, कऊँकि तिने मेरे बाओ दाऊदो ते बिना पूछे आपू ते जादा तर्मी ओर पले दो मर्दा पाँदे, मतलब इस्राएलो रा परदान सेनापति अब्नेर ओर यहूदा रा परदान सेनापति येतेरो रे पाऊ अमासा तलवारी साथे कायी ते थे। 33 ईंयाँ योआबो रे सिरो पाँदे ओर तेसरी ल्वादा रे सिरो पाँदे खून सदा तक रणा, पर दाऊद ओर तेसरे कुल ओर तेसरे कराने ओर तेसरे सिंहासनो पाँदे यहोवे रिया तरफा ते शान्ति सदा तक रणी।" 34 तेबे यहोयादा रे पाऊ बनायाहे जाई की योआब कायी ता ओर तेसखे उजाड़ जगा दे तेसरे ई कअरे माट्टी दित्ती।

35 तेबे राजे तेसरी जगा पाँदे यहोयादा रा पाऊ बनायाह परदान सेनापति ठराया ओर एब्यातारो री जगा पाँदे सादोक पुरोईत ठराया। 36 तेबे राजे शिमिये खे सन्देशा पेजेया ओर तेसखे बोलेया, "तैं यरूशलेम शईरो रे आपणा कअर बणाई की तेथी रणा ओर शईरो ते बारे केथी नि जाणा। 37 तूँ पक्का जाणी लो कि जेस दिने तूँ निकल़ी की किद्रोन नाल़े ते पार उतरेया, तेस दिने तूँ पक्का काया जाणा ओर तेरा खून तेरे ई सिरो पाँदे पड़ना।" 38 शिमिये राजे खे बोलेया, "गल्ल ठीक ए; जेड़ा मेरे प्रभु राजे बोली राखेया, तेड़ा ई तेरे दासो करना।" तेबे शिमी बऊत दिना तक यरूशलेम शईरो दे रया।

39 तीन साल बीतणे ते बाद शिमिये रे दो दास, गत शईरो रे राजा माका रे पाऊ आकीशो गे नठीगे ओर शिमिये खे ये सन्देश मिलेया, "तेरे दास गत शईरो दे ए।" 40 तेबे शिमी उठी की आपणे गह्दे पाँदे काठी गूड़ी की, आपणे दासा खे टोल़ने खे गतो रे आकीशो गे गया ओर आपणे दासा खे गतो ते ली आया। 41 जेबे सुलैमान राजे खे ऐतेरा सन्देश मिलेया, "शिमी यरूशलेम शईरो ते गतो खे गया ओर फेर वापस आई गा रा," 42 तेबे राजे शिमिये खे सन्देशा पेजेया, ओर तेसखे बोलेया, "क्या मैं ताखे यहोवे री कसम नि खुल़ाई थी? ओर ताखे चिताई की नि बोलेया था कि तूँ पक्का जाणी लो कि जेस दिने तूँ निकल़ी की केथी चली जाए, तेस दिने पक्का काया जाणा?" ओर क्या तैं माखे नि बोलेया था, "जो गल्ल मैं सुणी से ठीक ए?" 43 तेबे तैं यहोवे री कसम ओर मेरी पक्की आज्ञा कऊँ नि मानी? 44 तेबे राजे शिमिये खे बोलेया, "तूँ आपू ई आपणे मनो रे से सारी दुष्टता जाणेया, जो तैं मेरे बाओ दाऊदो साथे कित्ती थी? इजी री खातर यहोवे तेसरे सिरो पाँदे तेरी दुष्टता वापस करी देणी। 45 पर सुलैमान राजा तन्य रणा ओर दाऊदो रा सिंहासन यहोवे रे सामणे सदा बेकसूर रणा।" 46 तेबे राजे यहोयादा रे पाऊ बनायाहो खे आज्ञा दित्ती ओर तिने बारे जाई कि से एड़ा मारेया कि से मरीगा ओर इजी बजअ ते सुलैमानो रे आथो दे राज्य मजबूत ऊईगा।