Lucas 7

Yesu ekumnanicha mnyigendwa mkomi va vapuga va ku Lumi

1 Yesu peasindile kulonga gala geasakile vanu va pulike, akahele mwani va Kapelinaumu. 2 Ukoya kukali na mkomi yumwi va vapuga va ku Lumi yeakali na mnyigendwa vake yeamkelile hilo. Mchulila yula akali mtamwa agehe pepi kufuwa. 3 Yula mkomi va vapunga peapulike luchowo lwa Yesu, akavalagiche vamonga lya vavaha va Kiyawudi vahele vakamsuke ache kumnanicha mchulila vake. 4 Pevafikile kwa Yesu, vamsukile hilo, vakilonga, "Munu uyu ndi unofu atangwe, 5 kwakuva akuvakela vanu vetu na atuchengie kaye lyetu lya kutang’anila."

6 Baho, Yesu akahele pamwi navo. Peakali pepi kufikila kukaye lya mkomi va vapuga, yula mkomi va vapuga akavalagiche vaganja vake vamlongie Yesu, "Mtwa ubihile kwisumbula, kwakuva nene sendidikilwa uwingile kukaye lyangu. 7 Ndi mana sendayiwene ndidikilwa kwacha kwa veve. Ila longe luchowo hela, mchulila vangu inana. 8 Kwakuva nene ndi munu yendigehe panyi lya umwimike, ila ndinago na vapuga yevagehe panyi lyangu. Ndikimlongea yumwi, ‘Helele!’ Mwene ihelela na ndikimlongela yungi, ‘Wache!’ Mwene ekwacha na pendikumlongela mchulila vangu, ‘Gite kinu ikyo!’ Mwene igita."

9 Yesu peapulike njowo icho, akadudwive hilo, akausedukie wula lipinga lya vanu lelikali lilongochana, akalongile, "Ndakyene ndikuvalongela sendimuwene munu yeyonda mu Isilaeli yeali na mbatwa ngita iyi!"

10 Vala vanu vevalagichwe pevawuyile kwa mkomi va vapuga va ku Lumi, vamuwene yula mchulila ananile.