1 Ësaribi ka naíkamëonu ꞌiti ax ꞌikën mëkën rabë́ xanu xuntaku ka aín tirí tuia chikikin, aín mërati aia bikësa ꞌikën.

2 Mëkën achúshi manúkë, ꞌimainun ka mëkën achushiribi manúkëma ꞌiakëxa.

3 Mëkën achúshi ax manúkë akaman ka aín tiríkëñun xëni a ꞌaruti ubama ꞌikën.

4 Usa ꞌainbi ka ax manukëma kama an ꞌain tiríkëñun xëni a këñutia ꞌaruti a këñubi ubankëxa.

5 Aín mëráti ꞌitsaíira panakëbë ka ꞌatsani ꞌuxkënan tënankëx ꞌuxakëxa.

6 Imë́naëx ꞌuxunbi ka kuënkëni sharatia kuakëxa: "¡An xanu biti uni ka aia bitsi ka chikit!".

7 Xanu xuntakukaman ka bësui nirukin aín tirí mëniokëxa.

8 Usa ꞌain ka mëkën achúshi xanu xuntaku manukëkama an manukëmakama a kakëxa: "Nukama kamina min xëni chukumashi ꞌinanti ꞌain, nun tirí ka bënamëtia".

9 Manukëmakama an ka kakëxa: —Nun xëni ka mitsu ꞌinanti sënëma ꞌikën. Minabi kamina marui kuanti ꞌain, anuxua marukë anua, ankëtima kupí.

10 Akamaxa xëni marui kuankëbë ka ꞌain mërati ubaxa, ukëbë ka axa mëniókakë akama anuxun xanu biti anu atsinkin xëpuaxa.

11 Usai ꞌikëbë ka mëkën achúshi xanu xuntakukama an nukuti sharakin "¡ꞌËn ꞌIbu, ꞌën ꞌIbu, nu ka xëokaxun kixun kaxa!".

12 ꞌAibi ka kakëxa: "Asérabi kana uinsarabi mikama ꞌunama ꞌain".

13 Usa ꞌain kamina mëniokakë ꞌiti ꞌain, uinbi ka anun ëx unin bëchikë ꞌaish uti nëtë ꞌunanima.