LUKA 2

Yosefi na Maliya banata Yesu ku nzo-Nzambi

22 Bilumbu bye vedisa nitu bu bilunga, bonso budi musiku wu Mose, Yosefi na Maliya banata mwana ku Yelusalemi, mwanki bamulonka ha ntadisi yi Mfumu, 23 bonso busonama mu Misiku mi Mfumu ti: «Wonso mwana wu bakala wa butuka wuntete wufweti ba mvwilu yi Mfumu.» 24 Mboki, mu haana mpe minkayulu mi bakwe yokanga: «biduka byole hoti mabembe mole», bonso bu misonimina mu Misiku mi Mfumu.

25 Ku Yelusalemi, kuba na muntu wumosi, nkumbu andi Simeoni, wuba muntu wusungama mpe wedi vuminanga Nzambi. Wedi kingilanga muntu waakwiza kuula Isaeli. Mpeve Yilongo yiba nandi, 26 mpe yimuteela ti kaakifwila ko, tekila kayena Mesiya wuna fidisa Mfumu Nzambi. 27 Mu ntwadusulu yi Mpeve Yilongo , Simeoni wuyenda ku nzo-Nzambi. Mu ntangu beyoyo, Yesu bamunata ku tata na ngudi andi, mwanki balungisa masonama mu Misiku mu dyambu dyandi. 28 Simeoni wubonga mwana mu moko mandi, wutonda Nzambi na wuta ebu:

29 Mfumu, biika bwabu kisadi kyaku,

kenda kavunda mu kiyenge, mu dyambu ti nsilulu zaku zi lungidi,

30 nyeni mpulusu mu mani meso,

31 yi wutambikidi ku makanda mamvimba,

32 kukya kwa sa ti makanda mamvimba ma mu nza ma kuzaba,

mpe nkembo ku Isaeli, mukangu aku.

Mbikululu yi Simeoni

33 Tata andi na ngudi andi bayituku mu misamu bemyomyo myedi ta Simeoni mu dyambu di mwana. 34 Simeoni wubasakumuna na wuteela Maliya, ngudi yi Yesu ti: «Tala, mwana bewuwu waabwisa, mpe waazangula babingi mu Isaeli. Wuna ba kidimbu ki Nzambi na kyaatwala nkabani ha kati di bantu, 35 na nge bende, mbele yi mvita ya tobola mutima aku, mpe mansweki ma bantu babingi mazabakana.»

Ana, mumbikudi

36 Kuba mpe mumbikudi wumosi wu mukento, nkumbu andi Ana, wuba mwana wu Fanueli mu kanda di Aseli. Wutoma nuna kumanima ma mvula nsambwadi zi kazakala na mulumi andi wedi mukwelanga, buna wakidi ndumba yilembolo zaba babakala, 37 mboki wusaala foola, mpe wuzinga mvula makumi nana na ya. Kedi biika mu kwenda ku nzo-Nzambi ko, kansi wedi sadilanga Nzambi mpimpa na mwini mu minunu yi nsoki na lusambulu. 38 Yandi mpe wutula hoho ntangu beyoyo, wukembila Nzambi mpe wedi zonzila Yesu ku bantu bedi kingilanga nkululu yi Yelusalemi.