Barena yedersseedda Abimeleeka sintsappe gooyiyaawaa malatiide beedda wode, Daawita mazamuriyaa

1 Taani Med’inaa Godaa ubbaa wode galatana;

Aa galatay ay wodenne ta doonaappe pac’c’enna.

2 Taani Med’inaa Godaan c’eek’ettay;

naak’etteeddawanttu hewaa sisiide nashetino.

3 Taananna gidiide, Med’inaa Godaa gitayite.

Ane ittippe Aa suntsaa d’ok’k’u d’ok’k’u ootsoytte.

4 Taani Med’inaa Godaa koyaad;

I taw zaareedda;

taani yayyiyaawaa ubbaappe taana I ashsheedda.

5 Neekko s’eelliyaawanttu nashettiino;

unttunttu som"ii ubbakka yeellatenna.

6 Ha hiyyeesaa bitanii waasseedda;

Med’inaa Goday Aa waasuwaa siseedda;

Aa metuwaa ubbaappe Aa ashsheedda.

7 Med’inaa Godaa kiitanchchay Aa yayyiyaa asatuwaa naagee;

I unttunttu yuushshuwaan gidiide, unttuntta ashshee.

8 Med’inaa Goday keeka gidiyaawaa s’eelli be’ite.✝34:8 1 P’es'. 2:3

Aakko bak’atiyaa Asay anjjetteeddawaa.

9 Hinttenoo, Aa geeshsha asatoo, Med’inaa Godaw yayyite;

ayaw gooppe, aw yayyiyaa ubbatoo ayaynne pac’c’enna.

10 Gaammotuukka miyaawe d’ayina koshshatiino;

shin Med’inaa Godaa koyiyaawanttoo lo"obay pac’c’enna.

11 Ta tamaaretoo, haa yiite; sisite;

Med’inaa Godaa yashshaa taani hinttena tamaarissana.

12 Lo"o de’uwaa de’anawunne

keekkabaa be’ana mala,✝34:12-16 1 P’es'. 3:10-12

bare laytsay aduk’k’anaw koyiyaa Asay oonee?

13 Ne ins’s’arssay iitabaa haasayennaadan,

ne doonaykka c’immeenaadan te"a.

14 Iitaappe shaaketta; lo"obaa ootsa;

sarotetsaa loytsa koyaadde kaala.

15 Med’inaa Godaa ayifii s’illotuwaakko s’eellee;

k’ay Aa haytsaykka unttunttu waasuwaa hayzzee.

16 Unttuntta hassayissiyaawaa biittaappe d’ayissana mala,

Med’inaa Goday iitaa ootsiyaawantta,

bare hank’k’uwaa som"uwaan s’eellee.

17 S’illotuu waassiino;

Med’inaa Goday unttunttu waasuwaa sisee.

I unttunttu metuwaa ubbaappe ashshee.

18 Med’inaa Goday wozanay me"eeddawanttoo mataana;

k’ay barenttu hidootaa k’ans’s’eeddawantta ashshee.

19 S’illo asaa metuu dara;

shin Med’inaa Goday Aa he ubbaappe ashshee.

20 S’oossay Aa mintsi naagiyaa diraw,✝34:20 Yoh. 19:36

Aa mek’etsaappe ittuunne me"enna.

21 Iitatuwaa iitatetsay wod’ana;

s’illotuwaa is’s’iyaawanttu pirddettana.

22 Med’inaa Goday bare k’oomatuwaa ashshee.

Aakko bak’atiide ooninne pirddettenna.