Mateus 21

Jesus kjemt no Jerusalem

1 Un aus see sikj Jerusalem nodaden un no Betfage aun dän Oliewen-Boajch kjeemen, schekjt Jesus twee Jinja 2 un säd to äant: Got en daut Darp nenn, daut ver junt licht, un fuaz woa jie eene Äselin aunjebungen finjen un een Falm bie sikj; leest dee loos un brinjt Mie dee häa. 3 Un wan junt irjentwäa waut sajcht, dan sell jie sajen: De Har brukt dee; dan woat hee dee fuaz schekjen. 4 Dit es oba passieet, soo daut erfelt wort, waut derch dän Profeet jesajcht es, dee doa säd: 5 "Sajcht de Dochta Zion: Kjikj, dien Kjennich kjemt saunftmootich no die un rittat opp eene Äselin un opp een Falm, daut Lausttia äa Junget."

6 Un de Jinja jinjen han un deeden, soo aus Jesus äant befolen haud, 7 un brochten de Äselin un daut Falm un läden äare Kjleeda opp dee un saden Am doanopp*21:7 opp de Kjleeda.. 8 Oba väle von de Volkjshäad spreeden äare Kjleeda opp dän Wajch; aundre hakten Asta von de Beem un streiden dee opp dän Wajch. 9 Un de Volkjshäaden, dee veropp jinjen un nofoljden, schrieejen un säden: Hosiana*21:9 Een hebräischet Wuat, daut meent: Rad, ekj bedd die., David sien Sän! Jeloft es dee, dee em Nomen vom Harn kjemt! Hosiana em Hechsten! 10 Un aus Hee en Jerusalem nenkjeem, wia de gaunze Staut oppjeräajcht un säd: Wäa es disa? 11 Un de Volkjshäaden säden: Disa es Jesus, de Profeet von Nazaret ut Galiläa.