Matiyu 25

Karishe Shiriya

31 <<Nde yaa nsebeki zo a siki girima, nja guru meleku e yi, yaa zunwa a kingbolo solota gizi bisi ni girima e yi. 32 Guru kesa ni durinya sua tala a geba e yi, anya ni e shi yaa laba ntani mbombom dege nki asu, kankye yiride nsu kiwo yaa laba timshiya dege akuya. 33 E shi yaa sa timshiya a nani dama e yi yaa sa akuya a nani guni e yi.

34 <<Se Seleki yaa gye worede su ma a nani dama e yi, <Zo, oku worede Adaa na sa ku anabirika ni solota bisi; Ku si gado ku, de su shiriya ku nshi tun kwanki de su yi durinya. 35 Sobon Na zi nyunwa ku ba ni mbosi de ni si, Na zi kishi ku ba ni riki de ni sha, Ni zo ku bakwee ku keleba ni a gizi aku, 36 Ni ma keikei ba ku ba ni, Ni ma yi suwo ku kula ni, Ni ma a jaru ku zo geshe ni.

37 <<Se ntani gangasi sua keleba e yi nkye, <Obagizi, woshe na mu geni ke ka zi nyunwa na mu ba ke mbo si, ko kaa zi kishi mu ba ke mbode sha,? 38 woshe na mu geni ke bakwe na mu keleba ke yuru a gizi, ko totombolo na mu ba ke keikei? 39 Woshe de mu geni ke yi suwo ko a jaru de mu te geshe ke?>

40 <<Seleki yaa keleba nkye, <Ni gye ku gaskye, du mbo kyakyawu de ki yi yayuwa na dende ni siki yawo na, E ni na ki yi ni nshi.>

41 <<Anya ni yaa gye worede su ma nani guni yi, <Dege anya mu, oku de su yi ku gbetuma, yuru a siki wuta ni dindindin de su shiriya ba obiri nja meleku yi. 42 De ni ma zi nyunwa ku ba ni mbosi ba, Ni ma bila de sha riki ku ba ni de ni sha ba, 43 Ni ma bakwe ku keleba ni yuru ni a siki gizi ku ba, Ni bila keikei ku ba ni keikei ba, Na yi suwo ni ma jaru ku zo anyana ba.>

44 <<Osu ma sua keleba nkye. <Obagizi, woshe na mu geni ke kaa zi nyunwa ko kaa bila sha riki ko ki zo mu bakwe ko ka bila keikei ko ki yi suwo ko ki ma jaru, mu sua ke nto ba?>

45 <<Yesu yaa keleba, Na gye ku gaskye, du mbode ku yi dende ni siki woromu ba, e ni na ku yi ni nshi ba.>> 46 <<Se sua la mungu ntani kutiri te anya ni zi nki ni dindindin, sede ntani gangasi sua ma ni leyi ni dindindin.>>