እሳያሳ ማፃፋ 55

ሳሞትዳ ኡባይ ዮ

1 ህንተኖ፥ ሳሞትዳይሳቶ፥ ኡባይ ታኮ ሃ ዪተ፤

ሚሸይ ባይናይሳቶ፥ ሃ ዪተ።

ሻምድ ሚተ፤

ሃ ይድ፥ ሚሸ ቃንፆና

ጮ ዎይነ ኡሽነ ማ ሻምተ።✝55:1 ቆን 21:6፤ 22:7.

2 ካ ግዶናባስ ህንተ ሚሽያ አይስ ከሴቲ?

ካልሶናባን ህንተ ዎልቃ አይስ ዉርሴቲ?

አነ ታና ስእተ፥ ታኒ ኦደይሳ ሀይዝተ፤

ሎኦ ካ ሚተ፤

ሎኦ ካን ህንተ አሳተ ኡፋይስተ።

3 "ህንተ ሀይ ታኮ ዛሪድ ታና ስእተ፤

ደኦን ዳናዉ ታ ኦደይሳ ስእተ፤✝55:3 ሀዋ 13:34.

ታኒ ዳዊታስ ገልዳ ኡፋይሳ ቃላን ህንተና አንጃና።

4 ሄኮ፥ ታኒ እያ ካዎተታስ ማርካ፥

ካለይሳነ ሀላቃ ኦስ።

5 ጎዳይ፥ ነ ፆሳይ፥ እስራኤለ ጌሻይ

ነና ቦንችዳ ግሾ፥

ኔኒ ኤሮና ካዎተታ ፄጋና፤

ነና ኤሮና ካዎተት ኤለስድ ኔኮ ያና።"

6 "ጎዳይ በንትያ ዎደ እያ ኮይተ፤

ማታን ደእያ ዎደ እያ ፄግተ።