1 ଶଲୋମନତେ ସାୟେତ୍ ଶିକ୍ଷା । ଜ୍ଞାନବାନ୍‌ ମାର୍‌ ବାବାନ୍‌ ୱେଡ଼୍‌କେ ଜନ୍ମମାଡ଼ିତଣ୍ଡ୍‌; ବେଲା କି ବୁଦ୍ଦଇଲ୍‌ୱେ ମାର୍‌ ଅନ୍‌ ୟାୟ୍‌ ଚିନ୍ତେତ୍‌ତେ କାରଣ ଆଦ୍‌ତେ । 2 ଦୁଷ୍ଟତେ ଗାଡ଼୍‌ସ୍‌ତେ ଦନ୍ ବାତେ କାମ୍‌ ଇୱ୍‌; ମାତର୍‌ ଦାର୍ମିକତା ଡ଼ଲାନାଗାଙ୍କ୍‌ ଉଦ୍ଦାର୍‌ ମାଡ଼ିତେ । 3 ସଦାପ୍ରବୁ ଦାର୍ମିକ୍‌ତେ ଜିଉତିଙ୍କ୍‌ କାର୍ୱିନ୍ ଆଦାନଙ୍କ୍ ଇୱଣ୍ଡ୍‌; ମାତର୍‌ ଅଣ୍ଡ୍‌ ଦୁଷ୍ଟନ୍‌ ପାଡ଼ିୟ୍‌ଦିଙ୍କ୍‌ ପୁରା ମାଡ଼ଣ୍ଡ୍‌ । 4 ବେନ୍‌ ନାରୁଡ଼୍‌ ଜେୟି କାଇଦେ ପାଡ଼୍‌ୟି ମାଡ଼ିତଣ୍ଡ୍‌, ଅଣ୍ଡ୍‌ ଗରିବ୍‌ ଆଦ୍‌ତଣ୍ଡ୍‌; ମାତର୍‌ ପାଡ଼୍‌ୟି ମାଡ଼ାନ୍‌ କାଇ ସାଉକାର୍‌ ମାଡ଼ିତ୍‌ । 5 ଏଦ୍‌କାଲାତେ ବେନ ଗୁଡ଼୍‌ପିତଣ୍ଡ୍‌, ଅଣ୍ଡ୍‌ ବୁଦ୍ଦ୍‌ମାନ୍ଦାନନ୍‌ ମାର୍‌; ମାତର୍‌ ଫସଲ୍‌ ସମୟତେ ବେନ ଉଞ୍ଜିମାନ୍‌ତଣ୍ଡ୍‌, ଆ ମାର୍‌ ସିଗ୍‌ତେବିଷୟ୍‌ । 6 ଦାର୍ମିକତେ ତାଲ୍‌ତାଗ୍‌ ଆଶିର୍ବାଦ୍ ଆଦ୍‌ତେ; ମାତର୍‌ ଦୁଷ୍ଟନଡ଼୍‌ ମକମ୍‌ତାଗାଙ୍କ୍‌ କାରାପ୍‌ କାମ୍‌ତାଗାଙ୍କ୍‌ ମୁସିତ୍‌ । 7 ଦାର୍ମିକତେ ଏର୍କେ ମାଡ଼ାନାଦ୍‌ ଦନ୍ୟ, ମାତର୍‌ ଦୁଷ୍ଟନ୍‌ ପେଦେର୍‌ ମାୟି ଆଦ୍‌ତେ । 8 ବେନ୍‌ ହୃଦୟ୍‌ତାଗ୍‌ ଜ୍ଞାନି, ଅଣ୍ଡ୍‌ ଶିକ୍ଷା ନେଃତିତଣ୍ଡ୍‌; ମାତର୍‌ ମୁର୍କଡ଼୍‌ ଡ଼ଲିତଡ଼୍‌ । 9 ଲେକେତ୍‌ ନାରୁଣ୍ଡ୍‌ ସାୟେତ୍ ଆର୍ଦାଗ୍ ତାକିତଣ୍ଡ୍‌, ମାତର୍‌ ୱାଙ୍କ ଆର୍‌ଦାଗ୍ ତାକାନଙ୍କ୍‌ ପୁନ୍ଦାଙ୍କ୍‌ ଆଦ୍‌ତେ । 10 ବେନ କଣ୍ଡେ ରେଃତିଣ୍ଡ୍‌, ଅଣ୍ଡ୍‌ ଦୁଃକାମ୍‌ ଜନମ୍‌ମାଡ଼ିତଣ୍ଡ୍‌, ମେଣ୍ଡେ, ଜ୍ଞାନ୍‌ଇଲ୍‌ୱେ ଗଟିକେତାନଣ୍ଡ୍‌ ଡ଼ଲିତଣ୍ଡ୍‌ । 11 ଦାର୍ମିକ୍‌ତେ ପାୟୁର୍‌ ଜିଉନ୍‌ତେ ଇଡ଼୍‌ପାମ୍‌ ଏର୍‌, ମାତର୍‌ ଦୁଷ୍ଟନ୍‌ ପାୟୁତେ କପାମ୍‌ତିଙ୍କ୍‌ ମୁସିତ୍‌ । 12 ହିଂସା ରାମ୍‌କ୍‌ ଜନମ୍‌ମାଡ଼ିତ୍‌, ମାତର୍‌ ପ୍ରେମ ସାରେ କାରାପ୍‌ତିଙ୍କ୍‌ ମୁସିତ୍‌ । 13 ସାୟେତ୍ ବିଚାର୍‌ତେ ପାୟୁର୍‌ତାଗ୍‌ ଜ୍ଞାନ୍‌ ମାନ୍‌ତେ, ମାତର୍‌ ମୁର୍କନ୍‌ ମେନ୍ଦୁତ୍‌ତେ ମାଇଦିଙ୍କ୍‌ ଡ଼ୁଡ଼୍‌ । 14 ଜ୍ଞାନିଡ଼୍‌ ବୁଦ୍ଦ୍‌ ଗୁଡ଼୍‌ପିତଡ଼୍‌, ମାତର୍‌ ମୁର୍କନ୍‌ଡ଼୍‌ ପାୟୁର୍‌ତେ ଗଟ୍ ଦଂସ ଇନା ଆଦ୍‌ତେ । 15 ସାୱୁକାରିଡ଼୍‌ ଦନ୍‌ ଅଡ଼୍‌ ଢାଟାମ୍‌ ନଗର, ଗରିବ୍‌ନଡ଼୍‌ ଅଡ଼୍‌କିଙ୍କ୍‌ ନଷ୍ଟ ମାଡ଼ିତେ । 16 ଦାର୍ମିକ୍‌ନଡ଼୍‌ ପାଡ଼ିୟ୍‌ ଜିଉ ଲେକ୍‌ତାଦ୍‌, ମେଣ୍ଡେ, ଅଦାର୍ମିକ୍‌ତେ ବାଦ୍‌କାନାଦ୍‌ ପାପ୍‌ ଲେକ୍‌ତାଦ୍‌ । 17 ସାୟେତ୍‌ ଶିକ୍ଷା ବେନ ମାନେମ୍‌ ଆଦ୍‌ତଣ୍ଡ୍, ଅଣ୍ଡ୍‌ ଜିଉନ୍‌ତେ ଆର୍‌ଦାଗ୍‌ ତାକିତଣ୍ଡ୍‌; ମାତର୍‌ ବେନ ନିୟମ୍‌ ୱିଡ଼୍‌ସିତଣ୍ଡ୍‌, ଅଣ୍ଡ୍‌ କାୱୁଡ଼୍ ଆଦ୍‌ତଣ୍ଡ୍‌ । 18 ବେନ ହିଂସା ମୁସିତଣ୍ଡ୍‌, ଅନ୍‌ ପାୟୁର୍‌ ମିସ୍‌ ଗଟିନଣ୍ଡ୍‌; ମେଣ୍ଡେ, ବେନ ଅପ୍‌ମାନ୍‌ ମାଡ଼ିତଣ୍ଡ୍‌, ଅଣ୍ଡ୍‌ ବୁଦ୍ଦ୍‌ ଇଲ୍‌ୱେନଣ୍ଡ୍‌ । 19 ନାର୍ଗେ ବାକ୍ୟ ଅଦର୍ମତେ ନିଣ୍ଡି ମାନତେ, ମାତର୍‌ ବେନ୍ ନିଜର ପାୟୁର୍‌ତିଙ୍କ୍‌ କଟ ମାଡ଼ିତଣ୍ଡ୍‌, ଅଣ୍ଡ୍‌ ବୁଦ୍ଦିମାନ୍‌ । 20 ଦାର୍ମିକତେ ୱାଞ୍ଜେର୍‌ ଏଞ୍ଚ୍‌ତେ ରୁପା ଇନା, ମାତର୍‌ ଦୁଷ୍ଟନ୍‌ ହୃଦୟ କମ୍‌ଦାମ୍ । 21 ଦାର୍ମିକ୍‌ତେ ପାୟୁର୍‌ ନାର୍ଗେ ନାରୁଡ଼୍‌କିଙ୍କ୍‌ ପଡ଼୍‌ପିତଣ୍ଡ୍‌, ମାତର୍‌ ବୁଦ୍ଦ୍‌ଇଲ୍‌ନଡ଼୍‌ ମୁର୍କଡ଼୍‌ ମାଇଦିଙ୍କ୍‌ ଡଲିତଡ଼୍‌ । 22 ସଦାପ୍ରବୁନ୍‌ ଆଶିର୍ବାଦ ସାୱୁକାର୍‌ ମାଡ଼ିତ୍‌, ମେଣ୍ଡେ, ଅନ୍‌ ତଡ଼୍‌ ଦୁଃକ କାଲ୍‌ପଣ୍ଡ୍‌ । 23 କାରାପ୍ କାମ୍‌ ମାଡ଼ାନ୍‌ ବୁଦ୍ଦ୍‌ଇଲ୍‌ୱେନଣ୍ଡ୍‌ ୱେଡ଼୍‌କେ ଆଦ୍‌ତଣ୍ଡ୍‌, ମାତର୍ ବୁଦ୍ଦ୍‌ମାନ୍ଦାନଣ୍ଡ୍‌ ନାରୁନ୍‌ ଜ୍ଞାନ୍ ଲାବ୍‌ମାଡ଼ି ୱେଡ଼୍‌କେ ଆଦ୍‌ତଣ୍ଡ୍‌ । 24 ଦୁଷ୍ଟ ନାରୁଡ଼୍‌ ବାତେ ୱେର୍‌ଦ୍‌ତଣ୍ଡ୍‌, ଆଦେ ହିଁ ଅନ୍‌ ପର; ମାତର୍‌ ଦାର୍ମିକ୍‌ତେ ମନ୍‌ଦେବିଷୟ ଅକିଙ୍କ୍‌ ଇଦ୍‌ତଡ଼୍‌ । 25 ଉର୍‌ଗାଲ୍‌ ୱାତ୍‌କେ ଦୁଷ୍ଟଡ଼୍‌ ମେଣ୍ଡେ ମାନ୍‌ନଡ଼୍‌, ମାତର୍‌ ଦାର୍ମିକ ସାରେଦିନାତ୍‌ ମାଇଦିଙ୍କ୍‌ ଡ଼ୁଟାଙ୍କ୍‌ ପାଣ୍ଡେସନ୍‌ ଲେକାମ୍‌ ନିସ୍‌ ମାନ୍ଦାନ୍‌ତଡ଼୍‌ । 26 ବେଲାନେ ପାଲ୍‌କିଙ୍କ୍‌ ପୁଲ୍‌ସ୍ତେ ରସ୍‌ ନୁ କଣ୍ଡାଙ୍କ୍‌ ଉମେ, ଆଦ୍‌ଲେକାମ୍‌ ନିଜେତ୍‌ ରତାନଡ଼୍‌ ଗଟିନ୍ ସେଙ୍ଗେ ମଣ୍ଡି । 27 ସଦାପ୍ରବୁନ୍‌ ବିଷୟକି ୱେର୍‌ଦାନ୍‌ ଦିନାମ୍‌କ୍‌ ନାର୍ଗେମାଡ଼ିତଣ୍ଡ, ମାତର୍‌ ଦୁଷ୍ଟନ୍‌ ୱାଡ଼୍‌ସା କମ୍‌ ମାଡ଼ିତଣ୍ଡ୍‌ । 28 ଦାର୍ମିକତେ ଆଶେ ୱେଡ଼୍‌କେତାଦ୍ ଆଦ୍‌ତେ, ମାତର୍‌ ଦୁଷ୍ଟନଡ଼୍‌ ବରସା ନଷ୍ଟ ଆଦ୍‌ତେ । 29 ସଦାପ୍ରବୁନ୍‌ ଆର୍‌ ସାୟେତ୍ ନାରୁଡ଼୍ ମାଇଦିଙ୍କ୍‌ ଢାଟାମ୍ ଗୁଞ୍ଜେ; ମାତର୍‌ କାରାପ୍‌ନଡ଼୍‌ ପର ଆଦ୍‌ ଦଂସତାଦ୍ ଆଦ୍‌ତେ । 30 ଦାର୍ମିକ୍‌ନଡ଼୍‌ ବେସୁଙ୍କ୍‌ ମିକା ଗୁଞ୍ଚେମ୍‌ ଆୟିଡ଼୍‌; ମାତର୍‌ ଦୁଷ୍ଟ ଦେଶ୍‌ତେନଡ଼୍‌ ଆୟିୟଡ଼୍‌ । 31 ଦାର୍ମିକ୍‌ନଡ଼୍‌ ପାୟୁର୍‌କଞ୍ଜ୍‌ ଜ୍ଞାନ ପେୟିତିତେ, ମାତର୍‌ କାରାପ୍‌ ଗଟି କେତାନଡ଼୍‌ ୱାଞ୍ଜେର୍‌ କୟିସିଦାନାଦ୍‌ । 32 ଦାର୍ମିକନଡ଼୍‌ ପାୟୁର୍‌ ପିନ୍ଦ୍‌ୱାଉ ଗଟିଙ୍କ୍ ପୁନ୍ଦ୍‌ତଣ୍ଡ୍‌, ମାତର୍‌ ଦୁଷ୍ଟନଡ଼୍‌ ପାୟୁର୍‌ କାରାପ୍‌ ଗଟି କେତିତ୍‌ ।