1 ବେନ ଗରିବ୍‌ ନିଜର୍‌ ସତ୍ଆର୍‌ ଚାଲେମ୍‌ ଆଦ୍‌ତଣ୍ଡ୍, ଅଣ୍ଡ୍‌ ରାକାପ୍‌ ରାମ୍‌କିନାଗାଙ୍କ୍‌ ନୁ ମୁର୍କ ନାରୁଣ୍ଡ୍‌ ବାଦୁଲ୍‌ତେ ସାୟେ । 2 ବେନ ଜିଉତେ ଜ୍ଞାନ୍‌ ଇଲ୍‌ୱେନଣ୍ଡ୍‌ ଆଦାନାଦ୍‌ ସାୟେ ଆୟ; ମେଣ୍ଡେ, ବେନ ଦାନ୍ଦେଆସ୍‌ ପାଦାମ୍‌ ୱାଟିତଣ୍ଡ୍‌, ଅଣ୍ଡ୍‌ ପାପ ମାଡ଼ିତଣ୍ଡ୍‌ । 3 ନାରୁଡ଼୍‌ ମୁର୍କ ଅନ୍‌ ଆଦାନାଦ୍‌ ନଷ୍ଟ ମାଡ଼ିତ୍‌, ମେଣ୍ଡେ, ଅନ୍‌ ମନ୍‌ ସଦାପ୍ରବୁନ୍‌ ବିରୁଦ୍ଦ୍‌ତେ କିଜ୍‌ରା ଆଦ୍‌ତେ । 4 ଦନ ନାର୍ଗେ ସାଙ୍ଗ ଲାବ୍‌ ମାଡ଼ିତଣ୍ଡ୍‌; ମାତର୍‌ ଗରିବ୍‌ ନାରୁଡ଼୍‌ ନିଜର୍‌ ସାଙ୍ଗନାଗାଙ୍କ୍‌ ୱେର୍‌ ଆଦ୍‌ତଣ୍ଡ୍‌ । 5 ମିଚ୍‌ସାକ୍ଷି କେତାନଣ୍ଡ୍‌ ଦଣ୍ଡ ପାହେମ୍‌ ଆଦ୍‌ତଣ୍ଡ୍‌; ମେଣ୍ଡେ, ମିଚ୍‌ କେତାନଣ୍ଡ୍‌ ରକ୍ଷା ପାହେମ୍‌ ଆୟଣ୍ଡ୍‌ । 6 ନାର୍ଗେ ଦୟାତେ ମାଡ଼ାନ୍‌ ନାରୁନ୍‌ ଆଶିର୍ବାଦ୍‌ତେ ପାର୍ତନା ମାଡ଼ିତଣ୍ଡ୍‌, ମେଣ୍ଡେ, ସାରେତଡ଼୍‌ ଦାନ ଇଦାନଡ଼୍‌ ନାରୁଙ୍କ୍‌ ସାଙ୍ଗ ଆଦ୍‌ତଡ଼୍‌ । 7 ଗରିବ୍‌ତେ ସାରେ ଦାଦାଲଡ଼୍‌ ଅକିଙ୍କ୍‌ ପାସ୍କିତଡ଼୍‌; ଅନ୍‌ ସାଙ୍ଗନଡ଼୍‌ ଅନାଗାଙ୍କ୍‌ ବେସର୍‌ ନାର୍ଗେ ଦୁରାମ୍‌ ଆନଡ଼୍‌ ! ଅଣ୍ଡ୍‌ ତିର୍‌ୟାନଙ୍କ୍‌ ଚେଷ୍ଟା ମାଡ଼ିତଣ୍ଡ, ମାତର୍‌ ଅଡ଼୍‌ ଇଲାଡ଼୍‌ । 8 ବେନ୍‌ ନାରୁଣ୍ଡ୍‌ ବୁଦ୍ଦ୍ ଲାବ୍ ମାଡ଼ିତଣ୍ଡ୍‌, ଅଣ୍ଡ୍‌ ନିଜର ଜିଉତିଙ୍କ୍‌ ପ୍ରେମ ମାଡ଼ିତଣ୍ଡ; ବେନ ପୁନ୍ଦାନାଦିଙ୍କ୍‌ ବୁଜେମ୍‌ ଆସ୍‌ ରକ୍ଷା ମାଡ଼ିତଣ୍ଡ୍‌, ଅଣ୍ଡ୍‌ ଆଶିର୍ବାଦ ପାଏମ୍‌ ଆଦ୍‌ତଣ୍ଡ୍‌ । 9 ମିଚ୍‌ସାକ୍ଷି ଦଣ୍ଡ ପାହେମ ଆଦ୍‌ତଣ୍ଡ୍; ମେଣ୍ଡେ, ମିଚ୍‌କେତାନଣ୍ଡ୍‌ ନଷ୍ଟ ଆଦ୍‌ତଣ୍ଡ୍‌ । 10 ମୁର୍କନ୍‌ ସୁକାମ୍‌ତେ ମାନ୍ଦାନାଦ୍‌ ଇଲ୍‌ୱେ ମାନ୍ତେ; ସାଉକାରିଡ଼୍‌ ପର ଦାସନଡ଼୍‌ ଶାସନ ମାଡ଼ାନାଦ୍‌ ଟିକ୍‌ ଇଲ୍‌ଲେ । 11 ନାରୁଡ଼୍‌ଡ଼ାଦ୍‌ ସାୟେତ୍‌ ବୁଦ୍ଦ୍ ଅକିଙ୍କ୍‌ କପାମ୍‌ ଆଦାନାଗାଙ୍କ୍‌ ଜେୟି ମାଡ଼ିତଣ୍ଡ୍‌; ମେଣ୍ଡେ, ଦୋଷ ୱିଡ଼୍‌ସିଦାନ୍‌ ଅକିଙ୍କ୍‌ ସାୟେ । 12 ରାଜାନ୍‌ କପାମ୍‌ ସିଂହଡ଼ୁୱ୍‌ଦେ ଲେଙ୍ଗ୍‌ ଇନା; ମାତର୍‌ ଅନ୍‌ ଦୟା ଗାଡ଼୍‌ତେ ପର ମାନ୍ଦାନ୍‌ ମାସ୍ଏର୍‌ ଇନା । 13 ମୁର୍କ ମାର୍‌ ତାମ୍‌ ବାବାନ୍‌ ଦୁଃକାମ୍‌; ମେଣ୍ଡେ, ନାଟାଡ଼୍‌ତେ ରାମ୍‌କ୍‌ ମକତ୍‌ ଏର୍‌ ବଟ୍‌ ଇନା । 14 ଲନ୍‌ ନୁ ଦନ ୟାୟ୍‌ ବାବାନାଗାଙ୍କ୍‌ ପାହେମ୍‌ଆତ୍‌ତେ ଅଦିକାର୍‌; ମାତର୍‌ ବୁଦ୍ଦ୍ ମାନ୍ଦାନ୍‌ ନାଟାଡ଼୍‌ ସଦାପ୍ରବୁନାଗାଙ୍କ୍‌ ପାହେମ୍‌ ଆଦ୍‌ତେ । 15 ମଣ୍ଡିନ୍‌ ଲନ୍‌ ଉସ୍‌କାଡ଼୍‌ ମାନ୍ତେ; ମେଣ୍ଡେ; ମଣ୍ଡିନ୍‌ ନାରୁଣ୍ଡ୍‌ କାର୍‌ୱିନେ ମାନ୍ତେ । 16 ପରମେଶ୍ୱର୍‌ତେ ଆଦେଶ୍‌ ମାନେମ୍‌ ଆଦାନଣ୍ଡ୍‌ ନିଜର୍‌ ଜିଉଣ୍ଡ୍‌ ରକ୍ଷା ମାଡ଼ିତଣ୍ଡ୍‌; ମାତର୍‌ ନିଜର୍‌ ଆର୍‌ ବିଷୟତେ ବେନ୍‌ ତିଆର୍‌ତେ ମାନଣ୍ଡ୍‌, ଅଣ୍ଡ୍‌ ଡଲିତଣ୍ଡ୍‌ । 17 ବେନ ଗରିବ୍‌ତିଙ୍କ୍‌ ଦୟା ମାଡ଼ିତଣ୍ଡ୍‌, ଅଣ୍ଡ ସଦାପ୍ରବୁଙ୍କ୍‌ ଋଣ ଇଦ୍‌ତଣ୍ଡ୍‌; ମେଣ୍ଡେ, ଅଣ୍ଡ୍‌ ଅନ୍‌ ସାୟେତ୍‌ ପାଡ଼୍‌ୟିଦେ ଦାନ ଇଦ୍‌ତଣ୍ଡ୍‌ । 18 ନିଜର୍‌ ମାରିଙ୍କ୍‌ ସାୟେତ୍‌ ଶିକ୍ଷା ଇମୁଟ୍‌, ବାତେଙ୍କ୍‌ଇତ୍କେ ଅନ୍‌ପରୁ ଆଶେ ମିନ୍ଦେ; ମେଣ୍ଡେ, ନିୟାଦ୍‌ ମନ୍‌ ଅଂକିଙ୍କ୍‌ ନଷ୍ଟ ଆଦାନଙ୍କ୍‌ ଇଚ୍ଛା ମାଡ଼୍‌ମାକି । 19 ଗାଟି କପାତେ ନାରୁଣ୍ଡ୍‌ ଦଣ୍ଡ୍‌ ପାହେମ୍‌ ଆଦ୍‌ତଣ୍ଡ୍‌, ବାତେଙ୍କ୍‌ଇତ୍କେ ମିଡ଼୍‌ ଅକିଙ୍କ୍‌ ଅଣ୍ଡୟ୍‌ଦାମ୍‌ ଉଦ୍ଦାର୍ ମାଡ଼୍‌କେ, ଆଦ୍‌ ମିକିଙ୍କ୍‌ ମେଣ୍ଡନ୍‌ଦାମ୍‌ ମାଡ଼ାନଙ୍କ୍‌ ଆଦ୍‌ତେ । 20 ମାରେଙ୍କ୍‌ତେ ମିଡ଼୍‌ ବେଲାନେ ଜ୍ଞାନବାନ ଆୟ୍‌ମୁଟ୍‌, ଆଦିଙ୍କ୍‌ ଗଟ୍‌ କେଞ୍ଜାଟ୍‌ ନୁ ସାୟେତ୍‌ ଶିକ୍ଷା କେଞ୍ଜାଟ୍‌। 21 ନାରୁନ୍‌ ମନ୍‌ଦାଗ୍‌ ୱେରେ ୱେରେ ଚିନ୍ତା ମାନ୍‌ତେ, ମାତର୍‌ ସଦାପ୍ରବୁନ୍‌ ନିୟମ୍‌ତେ ଆଦ୍‌ତେ । 22 ନାରୁନ୍‌ ଇଚ୍ଛା ଅନ୍‌ ଦୟାତେ ଗୁନ୍ ଆଦ୍‌ତେ ନୁ ମିଚ୍‌ କେତାନଣ୍ଡ୍‌ ବାଦୁଲ୍‌ତେ ଗରିବ୍‌ ନାରୁଡ଼୍‌ ବାଡ଼ିୟଣ୍ଡ୍‌ । 23 ସଦାପ୍ରବୁନ୍‌ ବିଷୟକି ୱେର୍‌ଦେ ୱେର୍‌ଦେ ବାଦ୍‌କାନଣ୍ଡ୍‌, ଆଦ୍‌ ବେନ୍‌ ନାରୁନାଗ୍‌ ମାନ୍‌ତେ, ଅଣ୍ଡ୍‌ ତିଞ୍ଜ ପାଞ୍ଜି ମାନ୍‌ତଣ୍ଡ୍‌; ବିପଦ୍‌ ଅନ୍‌ ଗାରେ ଇସ୍‌ ଆନ । 24 ମଣ୍ଡି ନିଜର ତାଲିତାଗ୍‌ କାଇ ଲିଃକ୍‌କେ, ମେଣ୍ଡେ ଅଣ୍ଡୟ୍‌ଦାମ୍‌ ଆଦ୍‌ ନିଜର୍‌ ପାୟୁର୍‌ତାଗ୍‌ ଅଦାନଙ୍କ୍‌ ମିକା ଇଚ୍ଛା ମାଡ଼ଣ୍ଡ୍‌ । 25 ନିନ୍ଦେତଡ଼୍‌କିଙ୍କ୍‌ ରେଃତ୍‌କେ, ମଣ୍ଡି ନାରୁଡ଼୍‌ ଜାଗ୍ରତ୍‌ତେ ଶିକ୍ଷା ପାହେମ୍‌ ଆଦ୍‌ତଣ୍ଡ୍‌; ମେଣ୍ଡେ, ବୁଦ୍ଦିମାନିଡ଼୍‌ ଦେଞ୍ଜ୍‌କେ, ଅଣ୍ଡ୍‌ ଜ୍ଞାନ୍‌ ବୁଜେମ୍‌ ଆଦ୍‌ତଣ୍ଡ୍‌ । 26 ବେନ୍‌ ମାର୍‌ ନିଜର୍‌ ବାବାନ୍‌ ଦନ ନଷ୍ଟ ମାଡ଼ିତଣ୍ଡ, ମେଣ୍ଡେ, ନିଜର୍‌ ୟାୟଙ୍କ୍‌ ତଲିତଣ୍ଡ୍‌, ଅଣ୍ଡ ସିଗ୍‌ତେନଣ୍ଡ୍‌ ନୁ ଅପମାନ୍ ଆଦାନଣ୍ଡ୍‌ । 27 ହୋ ନା ମାର୍‌, ବେନ୍‌ ଶିକ୍ଷା ଜ୍ଞାନ୍‌ତେ ଗଟିନେ ମିକିଙ୍କ୍‌ ବୁଲ୍‌କାମାଡ଼ିତଣ୍ଡ୍‌, ଆୱୁ ଗଟି କେଞ୍ଜାନଙ୍କ୍‌ ୱେରେ ଆୟିମ୍‌ । 28 କାରାପ୍‌ ସାକ୍ଷି କାରାପ୍‌ ବିଚାର୍‌ତିଙ୍କ୍‌ ନିନ୍ଦେ ମାଡ଼ିତ୍‌ ନୁ ଦୁଷ୍ଟନଡ଼୍‌ ପାୟୁର୍‌ କାରାପ୍‌ତିଙ୍କ୍‌ ପ୍ରେମ ମାଡ଼ିତ୍‌ । 29 ନିନ୍ଦେତଡ଼୍‌ ମାଇଦିଙ୍କ୍‌ ଦଣ୍ଡ ନୁ ମୁର୍କନଡ଼୍‌ ମେନ୍ଦୁଲ୍‌ତେ ମାଇଦିଙ୍କ୍‌ ଦେବେ ତିଆର୍‌ତେ ମିନ୍ଦେ ।