Atos 16

10 Kwaivo Paulo viyaonile maloleso gago, chiisasala hima kuita Makedonia, chikala chivimanya kua Mulungu kachikema chiwaligulile Usenga Unogile.

Lidia komtogola Kilisito

11 Chilawa Tiloa, chiita kwa ngalawa dimwe kwa dimwe mbaka chisiwa cha Samotileke, na igolo yake chivika kae ya Neapoli. 12 Vichilawile uko, chiita mbaka Filipi, kae ng’hulu ya isi ya Makedonia, uja ukalile wolongozigwa na Walumi. Chikala muiisi iyo kwa mazua madodo. 13 Zua da kuhumula chilawa kunze haikae, chiita hamgwazo ya lwanda haja hachigesile kua iyo hanhu ha kufufugama. Chikala baho na kulongelela na wanachike wakalile hanhu baho.

14 Baho wanhu mmwao waja wachitegeleze, ivija kakala mwanachike imwe yokemigwa Lidia mwenekae ya Suatila yomtogola Mulungu, iyo yakalile mgula vivalo va bei ng’hulu va zambalau. Mndewa kautanda moyo wake utogole mbuli zija ziyalongile Paulo. 15 Mama iyo hamwe na waukae yake viwabatizigwe kachigoneka muing’anda yake kalonga, "Kama mhaniona nie nomtogola Mndewa, izoni mkale muing’anda yangu." Kachishwangiza chiite.

Paulo na Sila wogeligwa mdigeleza

16 Zua dimwe vichiitile hanhu hahaja hakufugamila, chiiting’hanila na biti imwe mtumwa yakalile yambule chinyamkela wa kulagula. Kubitila biti iyo wakulu wake wakala woipatila sente nyingi. 17 Baho, iyo biti kamuwinza Paulo na cheye ivija kuno yoguta nyangi na yolonga, "Wano wanhu ni wasenga wa Mulungu mkulu ng’hani. Wowalongeleni vija vumdaha kuloholigwa."