33 Na viwavikile hanhu hokemigwa fuvu da ditwi, baho hawamuwambile Yesu hamwe na waja wabananzi waidi, imwe ubanzi wake wa kulume na imwenga ubanzi wake wa kumoso. 34 Yesu kalonga, "Go Tata ugele kumgongo kwa vija hamanyile goyotenda!"

Waigolela vivalo vake kwa kutowa simbi. 35 Wanhu wema baho kuno womlola, nao Vilongozi wa Wayahudi wamzeha wolonga; "Kawahonya wamwenga, hebu na yaihonye mwenyego, kama iyo Kilisito yasaguligwe na Mulungu.

36 Na wamilizi nao weza na kumzeha, wamgalila divai isasile yang’we. 37 Nao wamlongela, "Kama gweye iyo Mfaume wa Wayahudi, ilohole mwenyego"'

38 Haja hamsalaba, hachanha ya ditwi jake, hakala mayandiko yandikigwe, "INO IYO MFAUME WA WAYAHUDI."

39 Munhu imwe mwa waja wabananzi yawambigwe hamgwazo ha msalaba wa Yesu, kamliga Yesu kalonga, "Kama gweye iyo Kilisito ilohole mwenyego na uchilohole na cheye."

40 Mbali ija mbananzi imwenga kamkomhokela miage kalonga, "Gweye humdumba Mulungu hata chidogo? Gweye ivija kwamuibung’hukila? 41 Gweye na nie hachioneligwa, chilamuligwa kwa gaja gachibanange. Mbali munhu ino habanange mbuli yoyose. 42 Amala ija mbananzi kamlonga, "Go Yesu sekeunisemwe vuukwingila Muufaume wako."

43 Yesu kamwidika kamlongela, "Nokulongela kweli, lelo vino kokua hamwe na niye hanhu hali na unovu hanogile hoyakala Mulungu."