Lucas 7

Nogoli ya afisa wa Loma

1 Yesu viyakomeleze kugalonga gose gago kwa wanhu wakalile womtegeleza, kaita Kapelenaumu. 2 Na mtumigwa imwe yakalile Mkulu wa bumbila da jeshi wa Kilumi iyo yakalile na wende nayo, kakala mtamu ng’hani behi na kudanganika. 3 Iyo Jemedali viyahulike mbuli za Yesu, kawalagiza Wavele wa Kiyahudi waite kumpula Yesu yaite kumhonya ija mtumigwa wake. 4 Viwavikile kwa Yesu wampula ng’hani yamtaze ija Jemedali walonga, "Munhu ino kweli kolondeka yatazigwe mbuli ino na gweye. 5 Kwa vija iyo kowatogola wanhu wetu, ivija kachizengela kae ya kuiting’hanila."

6 Ivo Yesu kailongoza nawo. Viyawile behi na kuvika muikae ya ija Jemedali, ija afisa kalagiza mbwiga zake kumwake walonga, "Mndewa, seke ugae. Manake niye sifaya hata gweye wingile muikae yangu, 7 ivo nie mwenyego niiyona silondeka hata kwiza kumwako. Mbali longa mbuli imwe kumwake nayo mtumigwa wangu kohona. 8 Manake niye mwenyego nna mkulu wangu, na ivija nna wamilizi weli hasi yangu wonitegeleza malagizo gangu. Nihamlongela imwe ‘Genda!’ Nayo koita, nihamlongela imwenga ‘Izo hano!’ Nayo kokwiza; na iyo mtumigwa wangu, ‘Sang’hana chinhu chino!’ Nayo kosang’hana.’'

9 Yesu viyahulike mbuli izo kakanganya, amala kadihindukila bumbila da wanhu wakalile womuwinza, "Nowalongeleni, sinaiona nhogoli ng’hulu kama ino, hata mui Izilaeli!’'

10 Na waja wanhu wakalile walagizigwe kwa Yesu viwabwelile ukae wamvika ija mtumigwa kahona.