Mbwanga mzenzi
16 Munhu imwe mzenzi kamuwinza Yesu kamuuza, "Mfundaji, nh’ende choni chinogile ili mhate ugima ulibule uhelelo?" 17 Yesu kamlongela, "Habali koniuza kwa mbuli ya dinogile? Hana munhu imwe tu yanogile. Wahalonda kwingila muugima ulibule uhelelo goga ndagizi za Mulungu."
18 Ija mbwanga mzenzi kamuuza, "Ndagizi zilihi?" Yesu kalonga, "Sekeukome, Sekeutende ugoni, Sekewibe, Seke ulonge uvwizi, 19 Wategeleze tata yako na mami yako na mwing’he wende miyago kama vuuwigesa mwenyego."
20 Ija mbwanga kamlongela, "Gago gose nigagoga, nh’ende choni chimwenga?" 21 Yesu kamlongela, "Kama uhalonda kutogoligwa ng’hani na Mulungu, genda ukagule vinhu vako uweng’he vikumbi muyega sente izo, na gweye kokua na usigavu Kuulanga kwa Mulungu amala izo uniwinze." 22 Mbwanga iyo viyahulike gago, kasegela yeli na giogio, kwa vija kakala na uzenzi mkulu ng’hani.
23 Baho Yesu kawalongela waluko wake, "Nowalongeleni kweli yokua vidala ng’hani kwa mzenzi kwingila muu Ufaume wa Mulungu. 24 Kaidi nowalongeleni, ibuha ng’hani kwa mnyama ngamia kwingila mdizonzo da sindano, kubita mzenzi kwingila muufaume wa Mulungu."
25 Waluko waja viwahulike ivo, wakanganya ng’hani, wamuuza, "Ivo yelihi yodaha kuloholigwa?" 26 Yesu kawalola kalonga, "Kwa wanhu mbuli ino haidahika, mbali kwa Mulungu mbuli zose zodahika."