1 ଅବ୍ରହାମ କଟୁରା ଦର୍‌ତି ମାରି ଉଣ୍ତ୍ରି ଆଇମାଦିଙ୍ଗ୍‍ ପେଡ଼ି ଆତାମାର୍ହାନ୍‌ । 2 ୱାଦ୍ ତାନି ଉଣ୍ତିଙ୍ଗ୍ ସିମ୍ରନ୍ ମାରି ଜକ୍‍ସନ୍ ମାରି ମଦାନ୍ ମାରି ମିଦିୟନ୍‌ ମାରି ଜିସ୍‍ବକ୍‌ ମାରି ସୁହ, ଇୟାୱେରିଙ୍ଗ୍ ଜନମ୍‌ କିତାନ୍ । 3 ଆୟା ଜକ୍‍ସନ୍ ସିବା ମାରି ଦଦାନ୍‍ଦିଙ୍ଗ୍‌ ଜନମ୍‌ କିତାନ୍ । ଦଦାନ ଅସୁରିୟ ମାରି ଲଟୁସିୟ ମାରି ଲିୟମ୍ମିୟ ଲୋକାରି ଡକ୍ରା ବୁବା । 4 ମିଦିୟାଦି ମାରିନ୍‌ ଏପା, ଏପର, ହୋନକ, ଅବିଦ୍ ମାରି ଇଲଦାୟା; ଇୟା ୱିଜେରେ କଟୁରାଦି ମାରିନ୍‌କୁ ।

5 ତାନିୱେନେକା ଅବ୍ରହାମ ଇସ୍‍ହାକ୍‍ଦିଙ୍ଗ୍‌ ନିଜେଦି ୱିଜୁ ଦନ୍‌ ସିତାନ୍; 6 ମାତର୍‌ ଅବ୍ରହାମ କଗରି ଆଡ଼ିଦି କଡ଼ରିଙ୍ଗ୍‌ ଅଡ଼ପ୍ ଅଡ଼ପ୍ ସିଜି ନିଜେଦି ଜିବନ୍‌ ମାନିସାନ୍ଦି ଇସ୍‍ହାକ୍ ଲାକୁତୁରାନ୍‌ ୱାରିଙ୍ଗ୍ ଆଗିଡ଼ି ତରିନ୍‌ଟି ଦେସ୍‍ତୁ ମାନ୍‍ଡ୍ରେଙ୍ଗ୍‌ ପୋକତାନ୍ ।

7 ଅବ୍ରହାମ ସହେ ସତୁରି ପାସ୍‌ ବାର୍ସୁ ସାନ୍ଦି ଜିତା ମାର୍ହାନ୍‌ । 8 ତାନିୱେନେକା ଅବ୍ରହାମ ସାମାନ୍‌ ଡକ୍ରା କାଡ଼ାଦୁ ଡକରା ମାରି ପୁରା ଆଜି ସାତା ସର୍ହାନ୍; ମାରି ନିଜେଦି ଆଗ୍‌ଡ଼ି ସାତି ଲୋକା ଲାକୁତୁ ମିସାତା ସର୍ହାନ୍ । 9 ମାରି ୱାନି ମାରିନ୍‌ ଇସ୍‍ହାକ୍ ମାରି ଇସ୍ମାଏଲ ମମ୍ରିଦି ଆଗ୍‌ଡ଼ି ହିତିୟ ସୋହରଦି କଡ଼ ଇପ୍ରୋଣଦି କିଡ଼ିଇଦୁ ମକ୍‍ପେଲା ଦରୁଦି ସାର୍‌ରାଦୁ ୱାନିଙ୍ଗ୍ ମୁସ୍‍ତାର୍ । 10 ଏଣ୍ତେସ୍ ଅବ୍ରହାମ ହେତିୟ ମାରିନ୍‌କା ଲାକୁତୁରାନ୍‌ ଆୟା କିଡ଼ିଇ କଟା ମାର୍ହାନ୍‌ । ଆୟା ଜାଗାଦୁ ଅବ୍ରହାମଦି ମାରି ୱାନି ଆଡ଼ି ସାରାଦି ସାତି ମାଡ଼ା ମୁସ୍‍ତା ମାର୍ହାର୍‌ । 11 ଅବ୍ରାହାମ ସାତି ୱେନେକା ମାପୁରୁ ୱାରି ମାରିନ୍‌ ଇସ୍‍ହାକ୍‍ଦିଙ୍ଗ୍‌ ଆର୍ସିବାଦ୍‌ କିତାନ୍; ମାରି ଇସ୍‍ହାକ୍‌ ବେର ଲହୟ ରୋୟି ଦରୁଦି ଜାଗାଦୁ ବାସା କିତାନ୍ ।

12 ସାରାଦି ସାକର୍‌ ମିସରିୟା ହାଗାର ଅବ୍ରହାମ ଉଣ୍ତିଙ୍ଗ୍ ଏମେୱାନିଙ୍ଗ୍‌ ଜନମ୍‌ କିତାମାର୍ହାତ୍‌, ଅବ୍ରହାମତି ଆୟା ମାରିନ୍‌ ଇସ୍ମାଏଲତି କୁଟୁମ୍‌ ଇକା । 13 ଦରୁ ମାରି କୁଟୁମ୍‌ ଅନୁସାରେ ଇସ୍ମାଏଲଦି ମାରିନ୍‌କା ଦରୁ ଇକା । ଇସ୍ମାଏଲତି ପେରି ମାରିନ୍‌ ନବାୟୋତ୍; ଆୟା ୱେନେକା କେଦାର, ଅଦ୍‍ବେଲ, ମିବ୍‍ସନ୍, 14 ମିବ୍‍ସନ୍, ଦୁମା, ମସା, 15 ମାରି ହଦଦ, ତେମା, ଯିଟୁର, ନାପିସ୍ ମାରି କେଦମା । 16 ଇୟା ୱିଜେରେ ଇସ୍ମାଏଲଦି ମାରିନ୍‌କୁ, ମାରି ୱାରି ଦରୁ ଇସାପ୍‍ତାନ୍ ୱାରି ନାରୁ ମାରି ଗୁଡ଼ା ମାର୍ହାତ୍‌; ମାରି ୱାର୍ ନିଜେ ନିଜେ କୁଟୁମ୍‌ ଇସାବ୍‌ତାନ୍‌ ବାର ପେରିଲୋକୁ ମାର୍ହାର୍‌ । 17 ଇସ୍ମାଏଲ ସହେ ତିରିସ୍‌ ସାତ୍ ନମ୍ୱର୍‌ତି ବାର୍ସୁ ଜିତା ମାର୍ହାନ୍‌; ଆବେଟ୍ ୱାନ୍ ସାତାନ୍‌; ମାରି ୱାନ୍‌ ନିଜେଦି ସାତିଲୋକା ଲାକୁତୁ ମିସାତାନ୍‌ । 18 ତାନିୱେନେକା ୱାନି ମାରିନ୍‌କୁ ହବିଲା ମାରି ମିସରଦି ଆଗ୍‌ଡ଼ିତରିନ୍‌ ସୁରଦାନ୍‌ ଅସୁରିୟା ତରିନ୍‌ ବାସା କିତାନ୍ । ଇୟାୱାଜା ୱାନ୍ ନିଜେଦି ତଡ଼ାନ୍‌କା ୱାଲେ ୱେରେଏ ବାସାନି ଜାଗା ପୋଇତାନ୍‌ ।

19 ଅବ୍ରହାମଦି ମାରିନ୍‌ ଇସ୍‍ହାକ୍‌ତି କୁଟୁମ୍‌ । 20 ଆୟା ଇସ୍‍ହାକ୍ ଚାଲିସ୍ ବାର୍ସୁ ବୟସ୍‌ତାନ୍ ପଦନ ଅରାମିୟ ବତୁୟେଲ୍‌ଦି ଆଇଲି, ଆରାମିୟ ଲାବନ୍‌ତି ତାଙ୍ଗିଁ ରିବିକେଙ୍ଗ୍‌ ପେଡ଼ି କିତାନ୍ । 21 ଇସ୍‍ହାକ୍‌ତି ଆୟା ଆଡ଼ି ବାଞ୍ଜି ଆତିଙ୍ଗ୍ ୱାନ୍ ତାନି ଉଣ୍ତିଙ୍ଗ୍‌ ମାପୁରୁ ଲାକୁତୁ ପାର୍‌ତନା କିତାନ୍; ଆବେଟ୍ ମାପୁରୁ ୱାନି ପାର୍‌ତନା ୱେରାନ୍, ୱାନି ଆଡ଼ି ରିବିକା ମେନ୍ଦଲତୁ ତେବାତାତ୍ । 22 ତାନିୱେନେକା ତାନି ପଟାଦୁ କଡ଼ପିଲାର୍‌ ଲେମିତାର୍‌ ଆକା, ନାଙ୍ଗିଁ ଏନ୍ଦା ଇୟାୱାଜା ଆତାତ୍ ? ଇୟାୱାଜା ତ ଆନାମାନାତ୍‍ ? ଇକା ଅଡ଼୍‌ବିଜି ୱାଦ୍‌ ପ୍ରବୁଦି ଲାକୁତୁ ୱେନେବାଦେଙ୍ଗ୍ ସର୍ହାତ୍‌ । 23 ଆବେଟ୍ ସଦାପ୍ରବୁ ତାନିଙ୍ଗ୍ ଇର୍ହାନ୍‌, "ନି ପଟାଦୁ ରୁଣ୍ତି କୁଟୁମ୍‌ ମାନାର୍ ମାରି ରିଏର୍‌ କୁଟୁମ୍‌ ନି ପଟାଦାନ୍‌ ନାଣ୍ତ ଆନାର୍; ମାରି ଉଣ୍ତ୍ରି କୁଟୁମ୍‌ ଆଇ କୁଟୁମ୍‌ଦାନ୍‌ ସାକ୍ତି ଆନାର୍, ମାରି ପେରିକାନ୍ ଇସ୍ରରି ୱାନି ସେବା କିନାନ୍ ।" 24 ତାନିୱେନେକା ଜନମ୍‌କିନି ବେଡ଼ା ପୁରା ଆଜି ୱାତିଙ୍ଗ୍‌ ତାନି ପଟାଦାନ୍‌ ଜାଡ଼୍‌ୱା କଡ଼ର୍ ଜନମ୍‌ ଆତାର୍‌ । 25 ତାନି ପେରି ମାରିନ୍‌ ନେତେର୍‌ ୱାଜା ମାରି ମେନ୍ଦଲ ବୁରୁବୁସେଙ୍ଗ୍ ଆଙ୍ଗିଁ ୱାଜା ମାର୍ହାତ୍‌; ଆବେଟ୍ ୱାନି ଦରୁ ଏସ ସିତାର୍ । 26 ଆବେଟ୍ ଏସଦି ପାଦାମ୍‌ ଆସ୍‌ସି ୱାନି ତଡ଼ାନ୍‌ ମାଡ଼ିସ୍ କିତାନ୍‌; ଆଦେଙ୍ଗ୍‌ ୱାନି ଦରୁ ଜାକୁବ*25:26 ଜାକୁବ ଅର୍ତାତ୍‌ ଏସଦି ପାଦାମ୍‌କୁ ଆସ୍‌ସି ଜନମ୍‌ ଆତାନ୍‌ ସିତାର୍ । ଇସ୍‍ହାକ୍‍ଦି ସାଟେ ବାର୍ସୁ ବୟସ୍‍ତାନ୍ ଇୟା ଜାଡ଼୍‌ୱା କଡ଼ର୍ ଜନମ୍‌ ଆତାର୍‌ ।

27 ତାନିୱେନେକା କଡ଼ପିଲାର୍‌ ପିରିତି ୱେନେକା ଏସୌ ବନ୍‍ତି ବନୁୱାଏନ୍‌ ଆତାନ୍; ମାତର୍‌ ଜାକୁବ ଡାଟ୍‌ ଲୋକୁ ମାରି ଗୁଡ଼ାଦୁ ତେବାତାନ୍‌ । 28 ଇସ୍‍ହାକ୍ ବନ୍‌ଗରିଆ କାଣ୍ତା ବେସି ସାୱି ଉଣ୍ତିଙ୍ଗ୍ ଏସୌଙ୍ଗ୍ ଜିବନ୍‌ନୋତାନ୍ । ମାତର୍‌ ରିବିକା ଜାକୁବଦିଙ୍ଗ୍ ଜିବନ୍‌ନୋତାତ୍ ।

29 ଉଣ୍ତ୍ରି ନାଣ୍ତିଙ୍ଗ୍ ଜାକୁବ ଡାଲି ୱାର୍‌ଜିମାର୍ହାନ୍‌, ଆୟା ବେଡ଼ାଦୁ ଏସୌ ବାଙ୍ଗାଁ ଆଜି କିଡ଼ିଇଦାନ୍ ୱାତାନ୍; 30 ମାରି, ୱାନ୍ ଜାକୁବଙ୍ଗ୍ ଇର୍ହାନ୍‌, "ନାନୁ ବାଙ୍ଗାଁ ଆତାମାନା, ୱେର୍‌ସିନା, ଆୟା ୱାରିତିମାନି ମୁସୁରି ଡାଲି ସିଜି ଉଟ୍‍ପିସ୍‍କିଆ," ଇୟା ଉଣ୍ତିଙ୍ଗ୍ ୱାନି ଦରୁ ଇଦୋମ ରଙ୍ଗା ୱେଙ୍ଗିଁତାନ୍‌ ।

31 ନାସ୍ତିୱାଲେ ଜାକୁବ ଇର୍ହାନ୍‌, "ଜଦି ନିନୁ ନାଙ୍ଗିଁ ନିଜେଦି ପେରିଅଦିକାର୍ ପର୍‍ଆ ।" ଆର୍‌ତିଙ୍ଗ୍‌ ନାନୁ ସିନା ।

32 ଏସୌ ଇର୍ହାନ୍‌, "ସୁଡ଼ୁଆ, ନାନୁ ସାତି ୱାଜା, ପେରି ଅଦିକାର୍ ନା ଇନି ଲାବ ?"

33 ଜାକୁବ ଇର୍ହାନ୍‌, "ନିନୁ ନେରୁ ନା ଲାକୁତୁ ପାର୍‍ମାଣ୍ କିଆ," ଆବେଟ୍ ୱାନ୍ ୱାନି ଲାକୁତୁ ପାର୍‍ମାଣ୍‌ କିତାନ୍; ଇୟାୱାଜା ୱାନ୍ ନିଜେଦି ପେରିଅଦିକାର୍ ଜାକୁବଙ୍ଗ୍‌ ପର୍‍ତା ସିତାନ୍ । 34 ଆବେଟ୍ ଜାକୁବ ଏସୌଦିଙ୍ଗ୍‌ ରୋଟି ମାରି ୱାରିତି ମୁସୁରି ଡାଲି ସିତାନ୍, ୱାନ୍ ଉଣିଜି ତିନିଜି ୱିସ୍‍ସି ନିଙ୍ଗିଁତା ସର୍ହାନ୍‌ । ଇୟାୱାଜା ଏସୌ ନିଜେଦି ପେରି ଅଦିକାର୍‌ଦିଙ୍ଗ୍‌ କାଡ଼ିତାନ୍ ।