1 ଇୟାୱାଜା ଏସ୍ତିୱାଲେ ଦୁନିଆଦୁ ଲୋକା ଇସାପ୍ ନାଣ୍ତ ଆତାର୍‌ ମାରି ୱାରି ନାଣ୍ତ ଆଇଲିକ୍‌ ଜନମ୍‌ ଆତେ; 2 ନାସ୍ତିୱାଲେ ମାପୁରୁଦି ମାରିସିର୍‌ ଲୋକା ଆଇଲିକା ସୁନ୍ଦର୍‌ ସୁଡ଼ୁଜି, ୱାର୍ ଏମେୱାନିକାଙ୍ଗ୍‌ ବଦା କିତାର୍‌, ଆୟା ୱିଜୁ ଆଇଲିକାଙ୍ଗ୍‌ ପେଡ଼ି ଆଦେଙ୍ଗ୍ ଆସ୍‌ତାର୍‌ । 3 ଆବେଟ୍‍କୁ ସଦାପ୍ରବୁ ଇର୍ହାନ୍‌, "ମା ଆତ୍ମା ଲୋକା ମୁସୁକୁ ୱିଜୁଦିନ୍ ତେବାଦେଙ୍ଗ୍‌ ଆଟ୍ଏତ୍‌, ଏଣ୍ତେସ୍‌କି ୱାର୍ ତାଗ୍‌ଇସାରିଦାନ୍ ସନାର୍‌ ୱାର୍ କାଣ୍ତା ମାତର୍‌; ଇୟାଉଣ୍ତିଙ୍ଗ୍ ୱାରି ବେଡ଼ା ସହେ କଡ଼େ ବାର୍ସେକ୍‌ ଆନାତ୍ ।" 4 ଆୟା ବେଡ଼ାଦୁ ଦୁନିଆଦୁ ପେରିପେରି ଲୋକ୍‌ ମାର୍ହାର୍‌; ମାରି ଆୟା ୱେନ୍‌କା ମାପୁରୁଦି ମାରିନ୍‌କା ଲୋକାରି ଆଇଲିକା ୱାଲେ ଡରିତାର୍‌, ୱାରିମାଣାନ୍‍କୁ କଡ଼ର୍ ଆଇଲିକ୍‌ ଜନମ୍‌ ଆତାର୍‌; ୱାର୍ ବା ପୁର୍ବେକାଡ଼ାଦି ପେରିକାର୍‌ ମାର୍ହାର୍‌ ।

5 ଇୟାୱେନ୍‌କା ସଦାପ୍ରବୁ ସୁଡ଼ୁତାନ୍‌ ଜେ, ଦୁନିଆଦୁ ଲୋକ୍‌ତି ତାଗ୍‌ଇପାଣି ନାଣ୍ତ ପେରିକା, ମାରି ୱାରି ମୋନ୍‌ତୁ ଅଡ଼୍‌ବିନିକା ୱିଜୁ ବେଡ଼ାଦୁ ତାଗ୍‌ଇ ମାତର୍‌ । 6 ଇୟାଉଣ୍ତିଙ୍ଗ୍ ସଦାପ୍ରବୁ ଦୁନିଆଦୁ ଲୋକ୍‌ତିଙ୍ଗ୍‌ ତିଆର୍‌ କିନି ଉଣ୍ତିଙ୍ଗ୍‌ ଅଡ଼୍‌ବିଜି ମୋନ୍‌ତୁ ଆଡ଼ାବାତାନ୍‌ । 7 ଆବେଟ୍‍କୁ ସଦାପ୍ରବୁ ଇର୍ହାନ୍‌, "ନାନୁ ବୁମିଦାନ୍ ନିଜେଦି ତିଆର୍‌ ଆତି ଲୋକ୍‌ତିଙ୍ଗ୍‌, ମାରି ଲୋକ୍‌ତି ୱାଲେ ଜାତୁ ମାରି ଉଜ୍‌ନି ଜାତୁଙ୍ଗ୍‌ ମାରି ପଟିଆଙ୍ଗାଁ ନାଷ୍ଟୁ କିନା; ଇରିଙ୍ଗ୍‌ ନାନୁ ୱାନିକାଙ୍ଗ୍ ତିଆର୍‌ କିତିମାଡ଼ାନ୍ ନାନୁ ଅଡ଼୍‌ବିଦେଙ୍ଗ୍‌ ଆଜିନାତ୍ ।" 8 ମାତର୍‌ ନୋହ ସଦାପ୍ରବୁଦି ଆଗିଡ଼ି ଦୟା ପୟ୍‌ତାନ୍‌ ।

9 ନୋହଦି କୁଟୁମ୍‌ ଇକା । ନୋହ ନିଜେ ଆୟା ବେଡ଼ାଦି ଲୋକା ଲୋଇ ଦାର୍ମୁ ନି ସାଦୁ ଲୋକ୍ ମାର୍ହାନ୍‌; ନୋହ ମାପୁରୁଦି ୱାଲେ ବୁଲାସାଲା କିତାନ୍ । 10 ନୋହ, ସେମ, ମାରି ହାମ ମାରି ଜେପତ୍‌, ଇୟା ମୁଏର୍‌ କଡ଼ରିଙ୍ଗ୍‌ ଜନମ୍‌ କିତାନ୍ । 11 ଆୟା ବେଡ଼ାଦୁ ଦୁନିଆ ମାପୁରୁଦି ଆଗିଡ଼ି ନାସ୍ଟୁ ଆତାମାର୍ହାତ୍‍ ମାରି ଦୁନିଆ ପାପ୍‌ଦୁ ପୁରାପୁରି ବର୍ତି ମାର୍ହାତ୍‌ । 12 ମାରି, ମାପୁରୁ ଦୁନିଆଦୁ ନେଗେନ୍‌ତାନ୍‌ ସୁଡ଼ୁତାନ୍ ଜେ, ଆକା ନାଷ୍ଟୁ ଆତାମାନାତ୍; ଏଣ୍ତେସ୍‌କି ଦୁନିଆଦି ୱିଜୁ ଜିତିମାନି ଲୋକୁ ତାଗ୍‌ଏନ୍‌ ଆତାମାନାର୍‌ ।

13 ଆବେଟ୍ ମାପୁରୁ ନୋହଙ୍ଗ୍ ଇର୍ହାନ୍‌, ନା ଲାକ୍‌ତୁ ୱିଜୁ ଲୋକା ସାନିଦିନ୍‌ ଇଗା ୱାତାତ୍‌ନି; ଏଣ୍ତେସ୍‌କି ୱାରି ମାଡ଼ାନ୍‌ ଦୁନିଆ ପାପ୍‌ଦୁ ପୁରାପୁରି ବର୍ତି ଆତାମାନାତ୍; ମାରି, ସୁଡ଼ୁଦୁ, ନାନୁ ଦୁନିଆଦି ୱାଲେ ୱାନିକାଙ୍ଗ୍‌ ନାସ୍ଟୁ କିନା । 14 ମିରୁ ନିଜେଦି ଉଣ୍ତିଙ୍ଗ୍‌ ଦେବଦାରୁ ପେରି ମାରାନ୍‌ତାନ୍‌ ଉଣ୍ତ୍ରି ଜାହାଜ୍‌ ତିଆର୍‌ କିଆ; ଆବେଟ୍‌ ଆୟା ଲୋଇ ଆଇଆଇ ବାକ୍‌ରେଙ୍ଗ୍‌ ତିଆର୍‌ କିଜି ଆବେଣି ଆୟା ଲୋଇରି ପାଡ଼ାକା ମାରି ଆତ୍ରେରି ପାଡ଼ାକା ଦୁପ୍‌ଣିଦି ଅଟାଦାନ୍‌ ତିର୍‍ପାଦୁ । 15 ଆକା ଇୟାୱାଜା ତିଆର୍‌ କିନିଦେର୍‌; ଲମ୍ୱାଦାନ୍‌ ତିନିସୋ ଗୋଟା ମୁରେଙ୍ଗ୍‌, ଅସାର୍‌ତାନ୍‌ ପଚାସ୍‌ ଗୋଟା ମୁରେଙ୍ଗ୍‌, ଉଚ୍ଚାଦାନ୍‌ ତିରିସ୍‌ ଗୋଟା ମୁରେଙ୍ଗ୍‌ ଆନାତ୍‌ । 16 ମୁସ୍‌କୁରାନ୍‌ ଉଣ୍ତ୍ରି କିୟୁ ଡ଼ିସ୍‌ସି ଜରକା କିନି, ମାରି ଆୟାତାନି ଲାକୁତୁ ସେର୍‍ଲା ଇଡ୍‌ନି; ମାରି ଆବେନୁ ଆଡ୍‌ଗି, ମଜାୟ୍‌ ମାରି ମୁସ୍‌କୁ କିଜି ମହଲା ତିଆର୍‌ କିନି । 17 ମାରି, ବାଦଡ଼ ଆଡ୍‌ଗି ଜିବନ୍‌ମାନି ଏସ ଜାତୁଙ୍ଗ୍‌ ମାନେ, ଆୟାୱିଜୁ ନାସ୍ଟୁ କିନି ଉଣ୍ତିଙ୍ଗ୍, ନାନୁ, ସୁଡ଼ୁଦୁ, ନାନୁ ଦୁନିଆ ମୁସୁକୁ ଗାଲିପିରୁ କିନା, ଆବେଟ୍‍କୁ ଦୁନିଆଦି ମାନି ୱିଜୁ ଜାତୁଙ୍ଗ୍‌ ସାନେ ସନେ । 18 ମାତର୍‌ ନାନୁ ମି ୱାଲେ ନିଜେଦି ନିୟମ୍‌ ତିର୍ କିନିକା; ଆବେଟ୍ ମିରୁ ନିଜେଦି କଡ଼ରିଙ୍ଗ୍ ମାରି ଆଡ଼ିସିକାଙ୍ଗ୍‌ ମାରି ମାରିନ୍‌କା ଆଡ଼ିସିକାଙ୍ଗ୍‌ ଅର୍‌ସେ ଅସି ଜାହାଜ୍‌ଦୁ ଡ଼ୁଗୁନିଦେର୍‌ । 19 ମାରି ଜିବନ୍‌ ରକିୟା ଉଣ୍ତିଙ୍ଗ୍‌ ୱିଜୁ ଜାତିଦି ଜାତୁଦି ଉଣ୍ତ୍ରି ଉଣ୍ତ୍ରି ପତୁ ନି ତାଡ଼ି ନିଜେଦି ୱାଲେ ଅସି ଜାହାଜ୍‌ଦୁ ଡ଼ୁଗୁନିଦେର୍‌ । 20 ୱିଜୁ ଜାତିଦି ପଟିଙ୍ଗ୍‌ ମାରି ୱିଜୁ ଜାତିଦି ଜାତୁ ମାରି ୱିଜୁ ଜାତିଦି ଉଜ୍‌ନି ଜାତୁ ୱିଜୁ ଜାତି ଇସାବ୍‌ତାନ୍‌ ଉଣ୍ତ୍ରି ଉଣ୍ତ୍ରି ପତୁ ନି ତାଡ଼ି ଜିବନ୍‌ ରକିୟାକିନି ଉଣ୍ତିଙ୍ଗ୍ ମି ଲାକୁତୁ ୱାନେ । 21 ମାରି ମିରୁ ନିଜେଦିଙ୍ଗ୍‌ ମାରି ୱାନିକା କାଦି ଉଣ୍ତିଙ୍ଗ୍ ୱିଜୁ ରକମ୍‌ତି କାଦି ଜିନିସ୍‌ ତାସି ନିଜେଦି ଲାକୁତୁ ଉଣ୍ତା କିନିଦେର୍‌ । 22 ଆବେଟ୍ ନୋହ ଆୟାୱାଜା କିତାନ୍; ମାପୁରୁଦି ମାଟା ଇସାବ୍‌ତାନ୍‌ ୱାନ୍ ୱିଜୁ ପାଣି କିତାନ୍ ।