1 Bale, ə̈bə̈ koshe ə̂në əɨrɨ ye kə də̂ Ananiasə kɔ də əwɔ nə, Safira, kâ ə̈bə̈ ashɔ nə̂ əndje. 2 Əndje də əwɔ nə nə djî tə̂ əndje ə kô ə̈bə̈ ngendja nə tʉ ə nâ də ə̂dû nə kə azü-awla nə. 3 Bale, Piarə pâ kə ətshə ə pa: «Ananiasə, mbrə yekɔ də̂ bə kâtə̂ äwä kə Sataa â tshə lî lɔsu zə gâ ye kɔ? Bə pâ əterə kə Âgbɔ̂ Yîrə̂ gâ ye, bə kô ə̈bə̈ ngendja nə tʉ gâ ye. 4 Angbʉlînə ndə kə pa bə kâ kəndɨ səkɔ, kəndɨ nə sə̂ sə̂ tə ənə̂ zə ne a? Ə̂në bə kâ gâ ye kɔ, ngendja nə sə̂ sə̂ tə ənə̂ zə ne a? Mbrə yekɔ də̂ bə lî tshelə zə ndə kə mbrə marä tə̂ ərə rə kɔ? Ə də̂ azü də̂ bə pâ əterə kə əndje kɔ ne, bə pâ kə Ndjapä â pâ kɔ.»

5 Alɔ ə̂në Ananiasə djî əpʉ səkɔ, tshə tê ə tshû. Âgbɔ̂ awa zâ azü nɔ̂ ə̂në əndje djî ndə əpʉ səkɔ. 6 Amɔdɔ nâ ə wôle ətshə də ləba ə nâ də ətshə ə shî ətshə.

7 Ə mbrə̂ ə̈nü alɔ mata vəta mandânə, əwɔ nə nâ ə wûsə̂ ərə ə̂në ə mbrə̂ kɔ wû ne. 8 Piarə nə yû ətshə ə pa: «Pä əpʉ kə əmə, ngendja nə ə̂në e kâ kəndɨ nə də nə kɔ kə səye a?» Yashe nə pâ kə ətshə ə pa: «Ayî, ngendja nə kə sə̂.» 9 Bale, Piarə nə pâ kə ətshə ə pa: «E djî tə̂ e atâ ndə kə pa e tra Yîrə̂ nə̂ Âgbɔ̂ Əyïngerə kɔ? Wü-a, azü ə̂në əndje shî äkɔ̈ zə kɔ sə lə manda. Əbə ndje, əndje sə kə ro də əbə.»

10 Kʉ pə kôto, yashe nə tê gâ tshekudu əzü-awla nə ə tshû. Amɔdɔ nə lî ə wû ə pa tshə tshû gâ ye; əndje zâ ətshə ə rô də ətshə ə shî ətshə gâ ngotə̂ äkɔ̈ nə. 11 Awa zâ azü Laglizə nə nɔ̂ də azü nɔ̂ ə̂në əndje djî ndə əpʉ səkɔ ro pâ nə.

12 Azü-awla nə sə̂ kə mbrə aərə ə̈lü də aərə ə̂në ə rô pâ kumu azü kɔ lə takpa tə̂ azü əgɔ nə. Azü nə ə̂në əndje zâ lɔsu əndje kə Jezu nə kɔ, əndje ngbô tə̂ əndje gâ tə̂ nə bale lə Tshekudu anda nə̂ Salomɔ. 13 Ə̈bə̈ əzü kpî mâ mâ əgo ndə kə na gâ tə̂ əndje ne; bale, azü əgɔ nə sə̂ kə pa ə̂rɔ̂ əpʉ nə̂ əndje. 14 Ə̂kpû akoshe də ayashe ə̂në əndje ngba ə ngba kɔ zâ lɔsu əndje kə Âgbɔ̂ Əyïngerə â tê gâ ndə əndje. 15 Azü nâ də alayïrəka ə kô əndje gâ ala äwä, gâ pâ aklekpa də akondja ndə kə pa alɔ ə̂në Piarə nə â sə kə ro nə, srɨyʉ ye ro pâ alabə̈ əndje. 16 Ə̂kpû alabə̈ azü nə âfɔ lə aəgɔ ə̂në ə sə̂ trö də Jeruzalamə kɔ ə nâ. Əndje nâ də alayïrəka də azü ə̂në aafrɔ ayirə̂ sə̂ lə əndje kɔ â arəka nə̂ əndje nə nglɔ̂.

17 Bale, âgbɔ̂ awotokrɔ nə gâ ndə azü tshe ngotə̂ ye, ə̂në əndje sə̂ tə azü aangbɔ nə̂ Asadusa kɔ, zâ tshelə əndje tə bandanə gâ tə̂ azü-awla nə. 18 Əndje âfɔ ə têgbɔ azü-awla nə â kô əndje gâ lə âgbɔ̂ anda kânga. 19 Bale, də tsheləbu nə, ə̈bə̈ trawaya nə̂ Əyïlingû krɔ̂ amanda kânga nə ə wûtu də əndje gashu ə pâ kə əndje ə pa: 20 «E nä ə kä mâ lə Anda Ndjapä ə yisə̂ aəpʉ nɔ̂ gâ pâ tafa sorô kə azü.»

21 Azü-awla nə djî əpʉ ama trawaya nə̂ Ndjapä səkɔ, pə də əzɨ, əndje nâ ə lî mâ lə Anda Ndjapä ə vɔ̂tə̂ kə yisə̂ əpʉ kə azü.

Bale, âgbɔ̂ awotokrɔ nə gâ ndə azü tshe ngotə̂ ye nə yî kumu əndje ə ê aangbɔ ngbanga gâ ndə aâgbɔ̂ azü nə̂ Ajuwufu nə nɔ̂. Mandânə, əndje wlâ alabə̈ azü mâ lə anda kânga nə je ndə kə pa əndje gu də azü-awla nə. 22 Bale, alɔ ə̂në atrugu nə nâ mâ je, əndje wû azü-awla nə wû mâ lə anda kânga nə ne. Əndje dô tə̂ əndje ə gû ə pâ ndəma əpʉ nə kə alayïngbanga nə ə pa: 23 «Ä wû amanda kânga nə, əndje tshû gâ tə̂ nə, ə kânga də äwänə, atrugu sə̂ gashu gâ pâ amanda nə, ə sə̂ kə bata nə. Bale, alɔ ə̂në ä krɔ̂ amanda nə, ä sɔ̂tə̂ ə̈bə̈ əzü sɔ̂ bale lə anda nə ne.»

24 Alɔ ə̂në kapita nə̂ atrugu Anda Ndjapä nə gâ ndə aâgbɔ̂ azü nə̂ aawotokrɔ nə djî əpʉ səkɔ, əndje wû âdâ kumu əndje wû gâ pâ əpʉ nə̂ azü-awla nə ne â yû tə̂ əndje ə pa: «Əpʉ səkɔ sə kə sə atâ?» 25 Bale, ə̈bə̈ əzü nâ ə pâ kə əndje ə pa: «E wü-a, akoshe səkɔ ə̂në e kô əndje gâ lə anda kânga kɔ, əndje sə mâ lə Anda Ndjapä ə sə kə yisə̂ əpʉ kə azü.»

26 Bale, kapita nə də atrugu nə̂ ye nə nâ mâ je ə gû də azü-awla nə ə mbrə̂ awlra mbrə̂ tə̂ əndje ne mbrə ə̂në əndje mâ awa ndə kə pa azü gbo alane də badja.

27 Əndje gû də əndje ə kô əndje gâ ətshi aangbɔ ngbanga nə̂ Ajuwufu nə. Âgbɔ̂ awotokrɔ nə yû azü-awla nə də əpʉ ə pa: 28 «Ä shêra e gbrä ndə kə pa e yisə̂ əpʉ yi də əɨrɨ koshe səkɔ ne. Bale, e mbrə atâ â kə yisə̂ əpʉ nə̂ e zâ ətshe lə Jeruzalamə nɔ̂ gâ ye kɔ? Gâ pâ nə, e yində nə ə pa ə̈ndjï ye sə gâ lə kumu ä!» 29 Bale, Piarə nə gâ ndə ə̂dû azü-awla nə kîrə əpʉ ə pa: «Ə lï ndə kə pa ä dji əpʉ ama Ndjapä ə ro əpʉ ama azü. 30 Ndjapä nə̂ alätä əzə̂ shê Jezu ə̂në e kû ətshə gâ ala masheyɔ ə wô ətshə gâ ye kɔ. 31 Ndjapä, tə̂ äwä awlra nə̂ ye, zâ ətshə tɔ gâ lafɔ tə Əyïngerə də Awoshe azü ndə kə pa tshə za äwä kə azü əgɔ Isərayalə ndə kə pa əndje tshi äwä angbrɔ kə mbrə tə̂ əndje tʉ kanika tshelə anyaka nə̂ əndje gba. 32 Ä sə tə azü ə̂në ä wû aərə səkɔ də ala ä, ä-ä də Âgbɔ̂ Yîrə̂ ə̂në Ndjapä zâ ətshə kə azü ə̂në əndje sə kə dji əpʉ ama ye kɔ.»

33 Alɔ ə̂në azü aangbɔ ngbanga nə djî əpʉ səkɔ, tshelə əndje kô əndje tə bandanə â əndje yîndə kə wo azü-awla nə. 34 Bale, lə takpa tə̂ əndje, ə̈bə̈ koshe sə̂ je, tə Fariza, əɨrɨ ye kə də̂ Gamalialə, tə awoyisə̂ âgbɔ̂ əpʉ nə̂ Mayïzə, azü nɔ̂ yîndə ye. Tshə âfɔ lə aangbɔ ngbanga nə ə zâ ama ə pa əndje wûtu də azü-awla nə gashu teashe kane. 35 Mandânə, tshə pâ kə aangbɔ azü nə ə pa: «E-e, azü əgɔ Isərayalə, e lï tshelə e gâ pâ ərə ə̂në e yində kə mbrə nə gâ tə̂ akoshe səkɔ tə ə̂rɔ̂nə gâ ye kane. 36 Katshä katshä tə̂-e koye, Tədasə wûtu ə pa əne sə̂ tə ə̈bə̈ âgbɔ̂ əzü. Azü mata ngbangbo vəna (400) tê mandâ ye. Bale, azü wô ətshə â azü nɔ̂ ə̂në əndje zâ äwä ye kɔ, ndjɔ̂ tshelə əndje də ärɔ̈ â aangbɔ nə lîwu. 37 Mandâ ye, Judasə nə̂ əgɔ Galile âfɔ tə̂ alɔ kə dɨ azü, â ə̂kpû azü zâ äwä ye. Bale, azü wô ndje ətshə â azü nɔ̂ ə̂në əndje zâ äwä ye kɔ, ndjɔ̂ tshelə əndje. 38 Rəkɔ, kpəsəye, mə pa kə e: e wä ndə akoshe səye wä kwatə̂-e ne, e kätə̂ əndje, əndje gü na ye. Kədə ərə ə̂në əndje gâmba də kosəra ə̂në əndje sə kə mbrə nə kɔ kə sə tə ənə̂ azü, ə sə kə liwu. 39 Bale, kədə ə âfɔ mâ ndə Ndjapä, e lï lï ndə kə pa e kânga äwä tə̂ nə ne. E tëgbɔ kumu e kanika e mbrə awlra mbrə gâ tə̂ Ndjapä ne!»

Azü aangbɔ nə yîndə əpʉ nə̂ Gamalialə nə. 40 Bale, əndje ê azü-awla nə ə dâ əndje də djakwa ə shêra əndje ndə kə pa əndje pa əpʉ pa də əɨrɨ Jezu ne, â mandânə, əndje kâtə̂ əndje. 41 Azü-awla nə wûtu lə aangbɔ ngbanga nə gashu, tshelə əndje sə̂ də ə̂rû mbrə ə̂në Ndjapä wû ə pa əndje lï ndə kə pa əndje wu əyo mbrə əɨrɨ Jezu nə kɔ. 42 Alɔnɔ̂, lə Anda Ndjapä də aanda nə̂ azü, əndje kâ kâtə̂ kə yisə̂ əpʉ ə mʉ̂ Ə̂rɔ̂ Əpʉ nə̂ Jezu tə Kristə nə kə azü ne.