Mateus 20

Bashingi Muminda Wonzhambi

1 "Bushe bwedenga bunokwejaniswa nomweni wominda wakabhuda zhingwanangwana kunopyanga bashingi kuti bende kuminda uwe wonzhambi. 2 Paakati avumilana nabashingi kuti unobalipa idinali pezhuba, wakabasenga kuminda uwe wonzhambi. 3 Wakabhuda kabili zhingwanangwana nonshaji weshanu notuna akenda pamusika, akanowana bamwe belimile pesina zwabanota, 4 wakati kuna ibo, ‘Namwibo indani kuminda wangu wonzhambi ndomupa indipo ilokwelela.’ Akale bakenda. 5 Wakenda akale masikati nonshaji wegumi linatubili, wakata alo akale masikatideko nonshaji wegumi notushanu. 6 Madekwana nonshaji wegumi linatushanu tunatubili, wakabhuda akawana bamwe belimile pesina zwabanota, wakababhuza eti, ‘Ini mulimile zwenu pesina zwamumuta izhuba lyose?’ 7 Bakonshandula beti, ‘Apana unhu watipa unshingo.’ Akati kwabali, ‘Namwibo indani kuminda wangu wonzhambi.’ "

8 "Pakwakati kwaswibha, mweni wominda wonzhambi wakati kuntungamili uwe, ‘Ishoba bashingi ubape indipilo yabo, utange nabomushule upejeleje nabokutanga.’ 9 Bakatangisa unshingo madekwana nonshaji wegumi linatushanu notubili, pabakaswika, bakapiwa umwe noumwe idinali. 10 Pakwakezha bokutanga, bakayeya kuti banopiwa inji, koga bakapiwa bo indipilo yedinali umwe noumwe. 11 Pakutambula, bakanyunyuta kumweni wominda, 12 beti, ‘Yaba bopejeleja bashinga iawa limwempela, koga mwabapa indipilo ilokwelana neyedu, isu tata unshingo unji wezhuba lyose tikapiswa kasa nezhuba.’ 13 Iye wakashandula kumwe wabo eti, ‘Nkwaina, andijakubipisila, aujavumilana nami idinali na?’ 14 Tola chicho, unde azwo. Kuda kwangu kupa womushule zwilokwelana nezwandakupa iwi. 15 Anditovumilwa na kuta madilo pezhulu pemali yangu na? Kana unefupa nomwoyo wangu umbuya?"

16 "Nokudalo bopejeleja banooba bokutanga, nabokutanga banooba bokupejeleja."