O Isus sikavela pi slava pe trine učenikonge
1 A palo šov dive o Isus lela peja e Petare e Jakove hem leskere phrale e Jovane hem gele ki uči gora, kote so ola sine korkori. 2 Adathe angli lende e Isuseskoro izgled promenisalilo. Leskoro muj svetinela sine sar o kham, a o šeja leskere ule parne sar i svetlina. 3 Togaš adathe pojavisalile angli lende o Mojsej hem o Ilija, so kerena sine lafi e Isuseja.
4 A o Petar phengja e Isuseske: "Gospode, šukar amenge te ova akate. Te mangeja, ka kera trin šatojra – jekh tuke, jekh e Mojsijaske, hem jekh e Ilijaske."
5 Dži kote o Petar kerela sine lafi, svetlinaja oblako učhargja len hem šundilo glaso taro oblako: "Akava tano mo manglo Čhavo, so leste tani mi vojla. Le šunen!"