Mateus 26

E Isuseskiri molitva ki Getsimanija

36 Togaš o Isus gelo pe učenikoncar ko than so vikinela pe Getsimanija, i phengja lenge: "Bešen akate dži kote me džava adathe te molina man."

37 Lela peja e Petare hem Zavedejeskere duje čhaven. Hem počmingja te ovel tažno hem te ovel le pharipe. 38 Togaš phengja lenge: "Doborom mange pharo so osetinava deka mi duša ka phajrol! Ačhoven akate hem oven džangavde mancar."

39 I gelo hari podur, pelo mujeja dži ki phuv hem molingja pe vakerindor: "Mo dad, te šaj, cide mandar akaja čaša e pharipaja, ama neka ovel ti vojla, a na mli."

40 Togaš irangja pe ko učenikija hem arakhla len sar sovena, hem phengja e Petareske: "Našti li sine jekh sati te oven džangavde mancar? 41 Oven džangavde hem molinen tumen te na peren ko iskušenie. O duho mangela te kerel adava soj šukar, ama o telo tano slabo."

42 I gelo dujto puti te molinel pe vakerindor: "Mo dad, ako našti cideja akaja čaša e pharipaja, te na pijav latar, neka ovel ti vojla."

43 Koga irangja pe, palem arakhla len sar sovena, soske phandlona sine lengere jakha. 44 Ov mukhla len hem gelo panda jekh puti, i trito puti molingja pe vakerindor ista lafija.

45 Togaš irangja pe ko učenikija hem phengja lenge: "Panda li sovena hem odmorinena? Akje alo o sati hem o Čhavo Manušeskoro ka ovel predajmo ko vasta e grešnikonge. 46 Ušten! Te dža! Akje, paše tano mo predavniko."