O čačutne hem o hovavne prorokija
15 "Arakhen tumen taro hovavne prorokija. Ola avena ki tumende ki bakhrani koza, ama andral tane diva ruva. 16 Taro lengere plodija ka pendžaren len. Dali šaj o manuša te kheden drakha taro kare, ili smokve taro bocke? 17 Agjar, sekova šukar kaš dela šukar plodija, a o lošno kaš dela lošna plodija. 18 O šukar kaš našti te del lošna plodija, ni o lošno kaš našti te del šukar plodija. 19 Sekova kaš so na dela šukar plodi činela pe hem frdela pe ki jag. 20 Agjar, taro lengere plodija ka pendžaren e hovavne prorokon."
Nikat na pendžargjum tumen
21 "Na sekoj so ka vakerel: ‘Gospode, Gospode’, ka khuven ko nebesno carstvo, nego okova so kerela i vojla me Dadeskiri soj ko nebo. 22 But džene ka vakeren ko sudno dive: ‘Gospode, Gospode, na prorokujngjem li ko to anav? Hem na ikalgjem li demonen ko to anav? Hem na kergjem li but čudija ko to anav?’ 23 Hem togaš me ka phenav lenge: ‘Nikat na pendžargjum tumen. Našen mandar dur, tumen so phagena o Zakoni e Devleskoro!’"