Êxodo 12

Erobha ch’Pasova

1 Wa Ọvaar Ubinọkpaabyi obeni Mosẹs, ọttạra Aarọn k’Ijip bẹ́, 2 "Ophye nwa m’ode ocheden-phye, ocheden-phye kwabạnga kw’icho. 3 Tek anạng p’Israẹl phyi-phyibh bẹ́, k’iwu jobh s’ophye nwa, ujunung kwidede m’utima ọrạkhạmaan-nwa wạnọ ukwu k’echo ch’ẹchọhmfhạr chẹ, ẹchọhmfhạr chidede m’ẹkhaama ọrạkhạmaan-nwa wạnọ. 4 De ẹchọhmfhạr nạnẹ́bạra ebenga k’oche kw’abẹ m’akke ọrạkhạmaan-nwa k’ubungu achi, tte ichọhmfhạr ifa ifhunu, itor k’ubhik kw’anạng ade, itor k’okhebh f’ọnạng-ọnạng m’uchi. 5 Nten s’abạnga m’atekha, ibaan bẹ́ ide adimpẹ p’ade cho gwạnọ, s’nạ́n ekhem ẹkhaam. Atekha sẹ k’arạkhạmaan, de ọbạra ọdaakhẹ bạnga k’avukpokha o, abạnga atekha. 6 Ado arạkhạmaan mbọ akkeri tạrr ukpira k’ẹchọhkha ch’ettong iwu sọnachi ch’ophye nwa, kw’ọnạng kwidede kw’ubin ẹkhạma ch’Israẹl m’ọyẹk ọrạkhạmaan kwẹ ẹdwạngọ. 7 Ma wọ abẹ m’atạkha isẹ rạnẹ afokha k’ọkhaan-ọkhaan, ọttạra k’ẹrạng-ẹrạng kw’mkpọmmachi s’ammakhubh p’ichọhm sabẹ m’aninga achi nten oyeni. 8 Ma irungu njọ, abẹ m’atima akwongutọhng p’ajobh-ojobhu achi nten nnọ sabẹ abhaabh-ọbhaabh. Abẹ m’achi sẹ ọttạra brẹd kw’abẹ nạn yist nágia. 9 Abạnga chẹ ikhikhebhi káchi, abạnga asi kátima awọhn chẹ. Okhenka, abhaabh chẹ tạma k’echo kpira k’mfhok, tạrr oseng k’afhạrọ. 10 Abạnga achi chẹ phyibh bạrasẹ iwu echobha, chidede ch’irikhi, de iwu echobh, ọbaan bẹ́ abạnga akạmọ chẹ ọkkạmọ. 11 Oche kw’abạnga m’achi chẹ ode bẹ́, abạnga m’akpa adikhikpa k’nwuru sabạnga, age akpafhok, atima achikwura pabạnga k’mbọhk. Abạnga achi chẹ k’ẹbhạr-k’ẹbhạr, ukwuru bẹ́, ma wọ ode erobha ch’Pasova ẹnạng amma Ọvaar Ubinọkpaabyi.

12 "Ma irungu njọ, m’nsenga k’Ijip mfhọ achedenva p’ayokhanạng bẹ́ phyibh, ọttạra acheden-dim p’nten sidede. M’mbạra mkpaara iponga s’m’ipyibh akha p’Ijip phyi-phyibh. Amma wọ nde Ọvaar Ubinọkpaabyi. 13 Isẹ nnọ m’ide ẹkhọhkha inạng bạnga k’ichọhm s’abạnga aning. Okpe kw’m’nse isẹ nnọ, m’njekha bạnga ojekha. Nkwuru nnọ s’obo bạnga mítwu k’okpe kw’m’nkhibhi Ijip.

14 "Maa wọ m’ode iwu ch’ijima, ch’igbọ s’iwu oro m’itima isi erobha inạng Ọvaar Ubinọkpaabyi ikpukpobha. Erobhawu nja m’ininga k’cho kwidede tạrr ipimmanitor. 15 K’iwu isenọfa, abạnga m’achi brẹd kw’abẹ nạ́n yist nágia. Abạnga arạbha yist k’abạnga k’ichọhm ma echedenwu, ukwuru bẹ́, ọnạng kwidede kw’uchi uchiattọhk f’abẹ age yist, tạma ma echedenwu njọ tạrr ukpira iwu nnọ isenọfa, oyonga abẹ m’akhubh-ẹ k’efhonfhạr ch’Israẹl. 16 Ma echedenwu, ọttạra iwu ch’ettong isenọfa, abạnga m’akhaama etobha ch’ikpukpobha ch’Ọvaar Ubinọkpaabyi. Abạnga ọtọhm vạnọ-vạnọ ma iwu nnọ kási, oyonga abạnga m’akhenka awọhn uchiattọhk f’ọnạng kwidede m’uchi.

17 "Abạnga m’asi Erobha ch’Brẹd kw’abẹ nạn yist nágia, ukwuru bẹ́, ma iwu njọ jọ ntim bạnga k’ikhaana sabạnga mbina k’Ijip. Abạnga m’asi erobha njọ ede erobha ch’m’ininga ẹnạng igbọ s’iwu oro. 18 Tạma k’ẹchọhkha ch’iwu sọnachi ch’ocheden-phye, abạnga m’achi brẹd kw’abẹ nạn yist nágia, tạrr ukpira k’ẹchọhkha ch’iwu ch’ettong iwu ẹrạbh ukuma jạnẹ. 19 K’iwu mạnna isenọfa, abạnga yist k’ichọhm sabạnga káchok. Ọnạng kwidede kw’uchi uchiattọhk f’abẹ age yist, ode ọmmaana, ọbạra ode ukhikhennạng, ọbaan bẹ́ abạnga akhubh-ẹ k’efhonfhạr ch’Israẹl. 20 Abạnga ọttọhk f’abẹ age yist káchi. K’ibyi sidede s’abạnga arukhu, ọbaan bẹ́ abạnga achi brẹd kw’abẹ nạn yist nágia."

21 Ma o, Mosẹs oyeri adennạng p’Israẹl phyibh otobha oben bẹ bẹ́, "Abạnga annemi eden ata atekha arạkhạmaan-va, anạng ichọhmfhạr sabạnga, abạnga afhọ atima asi erobha ch’Pasova. 22 Abạnga atạkha ẹsạsaarẹ-khe ch’hisobh, arạna k’isẹ s’abạnga age k’ọgbangbang. Atạkha isẹ rạnẹ afokha k’ẹrạng-ẹrạng ọttạra k’ọkhaan-ọkhaan kw’mkpọmmachi s’ammakhubh. Tte ọnạng wạnọ-wạnọ nạngẹ k’iyaan uyini tạrr iwu echobha. 23 Masẹ Ọvaar Ubinọkpaabyi m’osenga ma isek nnọ ọfhọ anạng p’Ijip, ọchọhm kw’ose isẹ k’mkpọmmachi ẹrạng-ẹrạng, ọttạra k’udimbọhk, ọttạra k’ọkwabọhk, m’ojekha kwẹ ojekha. Itọhmọ sẹ ọbọhk mótte bẹ́, inwa k’ichọhm sabạnga, ifhọ bạnga.

24 "Abạngama, ọttạra iva pabạnga m’achok erobhawu nja k’cho kwidede tạrr ipimmanitor. 25 De abạnga akpir k’isisek nnọ s’Ọvaar Ubinọkpaabyi ochekhi bẹ́, ọnạng bạnga, abạnga asi erobha njọ. 26 De kwạna iva pabạnga abạbhọ bạnga bẹ́, ‘Erobha nja iyini yạn o?’ 27 Abạnga akpaak bẹ bẹ́, ‘Achẹ ede erobha ch’ẹjafọhna ch’Pasova ẹnạng Ọvaar Ubinọkpaabyi, s’uwa ojek ichọhm s’anạng p’Israẹl k’Ijip, bạra ọkkaana ichọhmfhạr samạna k’okpe kw’uwa ọfhọ anạng p’Ijip.’ " Ma o, anạng mbọ atwunga echo anạng Ọvaar Ubinọkpaabyi ikpukpobha. 28 Wa anạng p’Israẹl asi oche kw’Ọvaar Ubinọkpaabyi ọtọhnọ Mosẹs ọttạra Aarọn.

29 Ma urunguttem, Ọvaar Ubinọkpaabyi ọfhọ achedenva p’Ijip bẹ́, phyibh tạma k’ochedennwa kw’Phero kw’ọdạbhẹ ẹvaar, tạrr ukpira k’achedenva p’agbakkọhbhọ p’aning k’ọgbakkọhbhọ-ter, tạrr oseng k’achedenva p’itirakpo. 30 Masẹ Phero ọttạra attọhmnạng pẹ, ọttạra anạng p’Ijip aphyạbh ma irungu, wa, ẹgạma ẹbạrẹ eseng eden, ukwuru bẹ́ ẹchọhmfhạr nbekha ch’ọnạng nạn núpua.

Osenga kw’anạng p’Israẹl

31 Ma irungu, Phero oyeri Mosẹs, ọttạra Aarọn, oben bẹ bẹ́, "Abạnga abina! Atima anạng p’Israẹl abina arik anạng paam! Asọhng, ata akpobha Ọvaar Ubinọkpaabyi oche kw’abạnga aroru. 32 Atạkha mmaam sabạnga, ọttạra arạkhạmaan, ọttạra mvu sabạnga, atima asọhng, oche kw’abạnga abeni. Abạnga m’abạra ayọhbh-m ita."

33 Ma wọ, anạng p’Ijip n’ayạk anạng p’Israẹl bẹ́, "Abạnga asi ẹbhạr-ẹbhạrẹ abina arik ẹkhạma chamạna, deja, m’ankker-okkera ampe." 34 Osenga ma, anạng p’Israẹl abina, atạkha brẹd kw’abẹ nạ́n yist tạm nágia, age k’agbangbang pabẹ n’atima asi brẹd, atạkha afhạrọ k’ọvạra fabẹ, atạkha atọhkha k’nkkang. 35 Wa anạng p’Israẹl asi oche kw’Mosẹs ọtọhna bẹ, abẹ ata abạbh anạng p’Ijip silva, ọttạra gol, ọttạra ọvạra. 36 N’ode s’Ọvaar Ubinọkpaabyi kk’anạng p’Israẹl usia bẹ́, abẹ akhaama ọphyaam k’anạng p’Ijip. Abẹ anạng anạng p’Israẹl fidede f’abẹ abạbhọ bẹ. Ma wọ anạng p’Israẹl acha ẹkhaama ch’anạng p’Ijip atima afona.

37 Wa anạng p’Israẹl abin osenga k’Rameses akpira k’Sukọt. Anạng p’uwa asi osenga ngwọ akpir nnọhna ẹnọhna ukuma arạbh jobh, de akpẹrẹ ipanạng ọttạra ọgbọsẹkhẹ achok ọkhaan-ọkhaan. 38 Wa anạng adwạkh-ọdwạk k’ọsaabh, agba atwạn bẹ abẹ ma osenga ngwọ, ọttạra itirakpo k’ọsaabh, oseng k’arạkhạmaan, ọttạra mvu. 39 Wa, abẹ atim abubuma p’abẹ atim abina k’Ijip, atima asi brẹd kwa nạn bibir k’nubir. Abẹ ọttọhk f’n’usi brẹd ubir, ma abubuma mbọ nagia, ukwuru s’uwa abẹ n’akhubh bẹ ukhubh k’Ijip, wa, abẹ dạkhẹ okpe nakhaama kw’abẹ atim awọhn uchiattọhk fabẹ.

40 Phyi-phyibh, wa anạng p’Israẹl arukhu icho ẹnọhna ukuma icho ẹrạbh ukuma jobh k’Ijip. 41 Ma iwu njọ ch’ettong icho ẹnọhna ukuma icho ẹrạbh ukuma jobh, wa, anạng p’Ọvaar Ubinọkpaabyi abin k’nkạma sabẹ arik k’Ijip. 42 S’uwa Ọvaar Ubinọkpaabyi utikhi irungu njọ, ọfha utima bẹ ubina k’Ijip, ma irunguwu nja jọ ch’anạng p’Israẹl m’n’atik irungu n’atima anạng Ọvaar Ubinọkpaabyi ikpukpobha tạrr ipimmanitor.

Inyina ch’erobha ch’Passova

43 Ọvaar Ubinọkpaabyi obeni Mosẹs ọttạra Aarọn bẹ́, "Maa wọ ode nnyina s’iten k’uchiattọhk f’erobha ch’Passova.

‘Tte ukhikhennạng wạnọ-wạnọ nạngẹ pfẹ uchi. 44 Ubira kwidede kw’abạnga atim akpokha adebh okkokke uchi pfẹ, s’abạnga kk’ẹ ọnạm akpaara. 45 Okhenka, ukhikhennạng kw’urukhu bạnga abẹ, ọbạra ode ọtọhmnạng kw’abẹ abher-ẹ ọtọhm, nọ́baana bẹ́ uchi pfẹ.

46 "Ọbaan bẹ́ abạnga achi pfẹ k’ọchọhm ẹtaanga, abạnga eten jạnẹ-jạnẹ kátima ayin k’iyaan. Abạnga ọkhạbhọ wạnọ-wạnọ kávọkhọ. 47 Efhonfhạr ch’Israẹl phyi-phyibh ẹbaan bẹ́ isi erobha nja.

48 "De ukhikhennạng kw’urukhu bạnga abẹ, ọdaakhẹ bẹ́, usi Erobha nja ch’pasova ọnạng Ọvaar Ubinọkpaabyi, ọbaan bẹ́ ajunung p’ọchọhm kwẹ phyibh akpaara ọnạm. Ma wọ, ẹma nwọ n’abạra usi chẹ masẹ ọmmaana wạnọ kwabạnga. Tte ọkpatwạr-nạng nạngẹ uchi o. 49 Inyina nja ede ch’ammaana ọttạra akhikhennạng p’arukhu bạnga abẹ."

50 Wa anạng p’Israẹl phyibh asi oche kw’Ọvaar Ubinọkpaabyi kk’Mosẹs ọttạra Aarọn ọtọhna. 51 Ma iwu njọ jạnẹ-jạnẹ, wa Ọvaar Ubinọkpaabyi utim anạng p’Israẹl k’nkhạma sabẹ, abina arik Ijip.