Nnwẹr s'Osenga 16

Uchiattọhk f’mana

1 Wa k’iwu chi s’ophye kw’ottong afa, s’anạng p’Israẹl kk’abina k’Ijip, abẹma phyibh abin osenga k’Ẹlim akpira k’ibyi s’owor k’Sin, s’ining k’ngekha kw’Elim ọttạra Sinai. 2 Ma ibyi nnọ s’owor rọ s’efhonfhạr ch’Israẹl ẹmmọhnọ ẹnạng Mosẹs ọttạra Aarọn. 3 Anạng p’Israẹl aben bẹ bẹ́, "Wạra ujibhi ọtạm bẹ́, ampe k’mbọhk s’Ọvaar Ubinọkpaabyi k’Ijip, k’ibyi s’n’anninga ẹyạr anchi nten, ọttạra ichiakpo k’ukhira-k’ukhira oche kw’ọdaakhẹ mạna. Mantọmma, abạnga kk’mạna atima akwu ma ibyi sowor bẹ́, okwo ọfhọ ayokhanạng mba phyibh."

4 Ma wọ, Ọvaar Ubinọkpaabyi obeni Mosẹs bẹ́, "Amma m’ntọhm brẹd kw’m’otebh masẹ ọrạngkpang nnạng bạnga. Anạng mbọ m’ayin k’iyaan k’iwu chidede ata akpokhu f’m’obenga bẹ. M’nsenga ma eden njọ nyoma bẹ, ọfha nse de abẹ m’ator k’ntọhna saam. 5 Ottong iwu isajạnẹ, abẹ m’akpokhu brẹd nwọ ikpe ifa, ọyọhnga oche kw’abẹ n’attotto akpokhu k’iwu nnọkha." 6 Ma wọ Mosẹs ọttạra Aarọn abeni anạng p’Israẹl phyi-phyibh bẹ́, "Ma k’ẹchọhkha, abạnga m’asong-osonga bẹ́, Ọvaar Ubinọkpaabyi wọ utima bạnga ubina k’Ijip. 7 Abạnga m’abạra ase abạrada p’Ọvaar Ubinọkpaabyi ose k’ekpebha, ukwuru bẹ́, kk’immạmmọhnọ s’abạnga ammọhnọ anạng-ẹ ọbhaanga. Amạna mba ande bạng anạng, p’abạnga mnasi immạmmọhnọ anạng?" 8 Mosẹs ọbạra oben bẹ́, "Abạnga m’asong-osonga bẹ́, Ọvaar Ubinọkpaabyi wọ n’ọnạng bạnga nten s’abạnga n’achi k’ẹchọhkha, ọttạra brẹd kw’abạnga aroru kw’abạnga m’achi k’ekpebha, ukwuru bẹ́, kk’immạmmọhno s’abạnga ammọhnọ anạng-ẹ ọbhaanga. Amạna mba oyeni ande bạng anạng? Amạna mba sạ́ng p’abạnga n’ammọhnọ anạng ẹ, abạnga n’ammọhnọ anạng Ọvaar Ubinọkpaabyi." 9 Ma wọ Mosẹs obeni Aarọn bẹ́, "Kpaak efhonfhạr ch’Israẹl phyi-phyibh bẹ́, abẹ akwu abe k’ititikha s’Ọvaar Ubinọkpaabyi, ukwuru bẹ́, kk’immạmmọhnọ sabẹ ọbhaanga.

10 Masẹ Aarọn n’ọkpaak efhonfhạr ch’Israẹl phyi-phybh idik nnọ, abẹ abhạkhẹ akkeri k’ibyi s’owor, abẹ ase abạrada p’Ubinọkpaabyi p’ayini k’ebona.

11 Ọvaar Ubinọkpaabyi oben Mosẹs bẹ́, 12 "Amma kk’immạmmọhnọ s’anạng p’Israẹl mmaanga. Kpaak bẹ bẹ́, ‘K’ẹchọhkha abạnga m’achi nten, k’ekpebha abạnga m’achi brẹd adọhbh. Ma wọ abạnga m’asonga bẹ́, amma wọ nde Ọvaar Ubinọkpaabyi, kw’ode Ubinọkpaabyi kwabạnga." 13 Ma k’ẹchọhkha, ọnọhn f’ẹkpa uyin k’ọsaabh tạrr ufu ibyibhingasẹ sabẹ bẹ́ ttạbh. Ukwu ukpira k’ekpebha, ebona ẹsạkha ẹfhạrọ ibyibhingasẹ sabẹ. 14 Masẹ ebona njọ kk’idima, ekpo masẹ afhạfhọ iyin ibubha isek s’owor. 15 Masẹ anạng p’Israẹl ase pyẹ, apyẹ bẹ nẹ́ttaana, abẹ n’abạbhọ ayok bẹ́, "Bạng ọttọhk khira vọ ma?"

Mosẹs oben bẹ bẹ́, "Uchiattọhk f’Ọvaar Ubinọkpaabyi ọnạngẹ bạnga bẹ́, abạnga achi vọ mạma e." 16 Maa wọ ode ntọhna s’Ọvaar Ubinọkpaabyi kk’ọnạnga bẹ́, "Ọnạng-ọnạng m’okpokhu pyẹ oche kw’m’obeng-ẹ. Ọnạng-ọnạng m’okpokhu okpobhumbọhk otor k’ubhik f’anạng p’ukkira kwẹ."

17 Wa anạng p’Israẹl asi oche kw’abẹ atọhnọ bẹ. Ayok bạnọ akpokhu k’ọsaabh, bạnọ akpokhu avapẹ. 18 Masẹ abẹ n’ayom k’akpobhumbọhk, abẹ n’ase bẹ́, ayok p’akpokhu k’ọsaabh abẹ k’idaam nákpokha. Ayok p’abạra akpokhu avapẹ abẹ sạsạkhẹ nábạra akpokha. Ọnạng-ọnạng okpokhu oche kw’m’obeng-ẹ. 19 Ma o, Mosẹs oben bẹ bẹ́, "Ọnạng wạnọ-wạnọ nạngẹ uchiattọhk mvọ ochokhu tạrr iwu echobha."

20 Okhenka, ayok bạnọ ntọhna s’Mosẹs nátạkha. Abẹ achokhu uchiattọhk mvọ tạrr iwu echobha. K’ekpebhachẹ, apfẹ ọmaang, ọnwa nsiri, ọbạra osohm. Ettem ẹkhạmọ Mosẹs otena anạng p’Israẹl k’usisi kwabẹ.

21 K’ekpebhawu chidede, ọnạng-ọnạng okpokhu oche kw’m’obeng-ẹ; okhenka, de ekkekhạra ẹkhạmọ, f’abẹ akpokhu arik kk’osonna phyibh.

22 Ottong iwu isajạnẹ, abẹ m’akpokhu akpobhumbọhk afa p’uchiattọhk. Adecho p’Israẹl phyibh abina ata akpaak Mosẹs. 23 Mosẹs oben bẹ bẹ́, "Maa wọ ode ntọhna s’Ọvaar Ubinọkpaabyi ọnạngẹ bẹ́, ‘Uphyini m’ode ẹyọhngkwokhawu, ẹyọhngkwokhawu ch’awurada ẹnạng Ọvaar Ubinọkpaabyi. Abạm uchiattọhk fidede f’abạnga ọbạm, awọhn fidede f’abạnga m’awọhn. Achok fidede f’urikhi tạrr ukpira k’ekpebha." 24 Mạnna wọ abẹ asi oche kw’Mosẹs ọtọhnọ bẹ, abẹ achok f’urikhi tạrr iwu echobha, apfẹ nósoma, nsiri nọ́bra ọnwa. 25 Mosẹs oben bẹ bẹ́, "Abạnga achi pfẹ chemma, ukwuru bẹ́, chemma ode ẹyọhngkwokhawu ọnạng Ọvaar Ubinọkpaabyi; vạnọ-vạnọ k’isek chemma abạnga máse e. 26 Abạnga m’akpokhu pfẹ k’iwu isajạnẹ, okhenka, ottong iwu isenọfa, kw’ode ẹyọhngkwokhawu vạnọ-vạnọ múninga."

27 Tạrr oseng ma, wa ayok bạnọ ayini k’iyaan bẹ́, abẹ ata akpokhu uchiattọhk ma iwu njọ ch’ettong isenọfa, abẹ ubuma násia.

28 Osenga ma, Ọvaar Ubinọkpaabyi oben Mosẹs bẹ́, "Okpe m’ubhir utuma yạn kw’abạnga m’afhum nnyina saam, ọttạra ntọhna saam chuchokh o?" 29 Ajima bẹ́, Ọvaar ubinọkpaabyi kk’bạnga ẹyongkwokhawu ọnạnga, ẹgwọ usi ottong iwu isajạnẹ, n’ọnạng bạnga brẹd kw’iwu ifa. Ottong iwu isenọfa, ọnạng-ọnạng uninga k’ibyi s’uning, nạngẹ k’iyaan uyini." 30 Ma o, anạng mbọ akwokha ọyọhng k’iwu ch’ettong isenọfa.

31 Wa anạng p’Israẹl ayeri brẹd nwọ Mana. Wa awẹ uwuru masẹ ichimạma ch’koriyanda, ọbạra orebh masẹ abukpa p’abẹ atim ana p’ọkhọhn asi. 32 Mosẹs oben bẹ́, "Maa wọ ode ntọhna s’Ọvaar Ubinọkpaabyi, ‘Akpokhu okpobhumbọhk kw’Mana achok igbọ s’kwạna m’ikwu, ọfha abẹ ase brẹd kw’uwa nnạngẹ bạnga achi k’ibyi s’owor, s’ntim bạnga mbina k’Ijip.’ " 33 Mosẹs oben Aarọn bẹ́, "Yoma okpobhumbọhk kw’Mana ge k’isibin ẹtaanga, atạkha achok k’ititikha s’Ọvaar Ubinọkpaabyi, uninga utik igbọ s’oro." 34 Aarọn usi oche kw’Ọvaar Ubinọkpaabyi kk’Mosẹs ọtọhna, ọtạk isibin njọ obera k’ititikha s’Ikwukwur s’Echekha, ọfha ininga ma. 35 Wa anạng p’Israẹl achi Mana k’icho arạbh afa tạrr abẹ akpira k’ibyi s’anạng arukhu. Abẹ achi mana tạrr abẹ akpira k’erem ch’Kenaan.

36 Omer ode okpobhumbọhk wạnọ k’akpobhumbọhk jobh p’asi Ẹpha, kw’ode ẹgbangbangdim.