1 Pegamaliki genago, Adoni Sedeki nkosi wa ku Yelusalemu akayuwana namuna Yoshua cheautolili muji wa Ai na kuuhalabisa njwe, ngati cheakitili kumuji wa Yeliko na nkosi waki. Mewa ayuwini kuvya vandu va ku Gibeoni vaviki lilaganu la uteke na Vaisilaeli, na hinu vitama navu pamonga. 2 Mambu genago gavakitili vandu vayogopayi neju muni muji wa Gibeoni wavili muji uvaha, ngati umonga pagati ya miji ya chinkosi. Muji wenuwo wavii uvaha na weumanyikini neju ya muji wa Ai na vandu vaki vavii vakekesi va ngondo. 3 Penapo Adoni Sedeki nkosi wa ku Yelusalemu akatuma ujumbi kwa Hohamu nkosi wa ku Hebuloni na Pilamu nkosi wa ku Yalmuti na Yafia nkosi wa ku Lakishi na Debili nkosi wa ku Eguloni, 4 akavajovela, "Mubwelayi munitangatila kuvatova vandu va muji wa Gibeoni, muni vakitili lilaganu la uteke na Yoshua pamonga na Vaisilaeli." 5 Kangi vankosi muhanu venavo nkosi wa Vaamoli, ndi nkosi wa ku Yelusalemu na nkosi wa ku Hebuloni na nkosi wa ku Yalmuti na nkosi wa ku Lakishi na nkosi wa ku Eguloni, vakakonganesa manjolinjoli vavi pamonga. Vakahamba navu mbaka ku Gibeoni, vakajitendekeha kuuzangila muji wenuwo.

6 Ndi vandu va ku Gibeoni vakapeleka ujumbi kwa Yoshua peavii kukambi ya ku Giligali, vakamujovela, "Chondi, ukotoka kutileka tete tavahengaji vaku! Bwela kanyata utitangatila ndava vankosi voha va Vaamoli vevitama ku mulima wa vidunda vakonganisi manjolinjoli gavi pamonga muni vabwela kutitova!"

7 Ndi Yoshua akawuka ku Giligali mwene na vandu vaki voha va ngondo pamonga na manjolinjoli vaki vakekesi. 8 Bambu Chapanga akamujovela Yoshua, "Kotoka kuvayogopa vandu venavo muni nikupeli makakala ga kuvahotola. Kawaka yoyoha mweihotola kukutova." 9 Hinu Yoshua akawuka ku Giligali akagenda kilu yoha, peahikili akavazangila chigafula. 10 Bambu Chapanga akavakita Vaamoli vavyayi na wogohi palongolo ya Vaisilaeli, na Vaisilaeli vavakomili vandu vamahele ku Gibeoni, Vakavajumbisa munjila za mihelelu yeyihambila ku Beti Holoni mbaka Azeka na Makeda kwenuko mewa vavakomili vandu vamahele neju. 11 Pevavatila Vaisilaeli kumuhelelu wa ku Beti Holoni kuyelekela Azeka, Bambu Chapanga akavatonyela fula ya maganga gavaha kuhuma kunani mbaka pevahikili ku Azeka, vevakomiwi kwa maganga genago vakavya vamahele neju kuliku vevafwili kwa upanga wa Vaisilaeli.

12 Yoshua alongili na Bambu Chapanga muligono lila peavakitili Vaisilaeli vavahotola Vaamoli akajova palongolo ya Vaisilaeli voha,

"Veve lilanga yima nuu panani ya Gibeoni.

Na veve mwehi yima nuu panani ya likemba la Aiyaloni."

13 Lilanga likayima nuu na mwehi ukayima mbaka mulima wa Vaisilaeli pevamalili kuvahotola vamakoko vavi. Ngati cheyayandikwi muchitabu cha Yashali, lilanga layimili kunani, likaleka lugendu lwaki lwa kuhamba kutipama mulukumbi lwa ligono loha. 14 Lahumalili lepi ligono ngati lenilo pakutumbula na katu yati lihumalila lepi kavili, ligono lila Bambu Chapanga peamuyuwanili mundu. Muni chakaka mwene Bambu Chapanga ndi mweavatovanili Vaisilaeli!

15 Ngondo peyamaliki Yoshua pamonga na Vaisilaeli voha vakawuya kukambi ya ku Giligali.

16 Vankosi muhanu vala vakajumba na kuhamba kujihiha kumbugu lelivii papipi na muji wa Makeda. 17 Yoshua peajoviwi kuvya vala vankosi muhanu vavakolili vajihihili mumbugu ku Makeda. 18 Yoshua akalagiza, akajova, "Mubilingisa maganga gavaha pamulyangu wa mbugu lenilo na muvikayi valonda vayilindayi mbugu lenilo, 19 nambu nyenye mkoto kutama penapo, muganikiwa muvalandalila vamakoko vinu mukavatova chakuyetu. Mkotoka kuvaleka vahika kumiji yavi, muni Bambu Chapanga winu avapelili uhotola wa kuvahotola." 20 Yoshua pamonga na Vaisilaeli vakavatova na kuvakomakesa njwe papipi voha, na vadebe vevasigalili vakatilalila kumiji yavi yeyivi na luwumba. 21 Penapo vandu voha vakamuwuyila Yoshua kukambi ya ku Makeda.

Kawaka mundu mwealingili kulongela linenu loloha kuvavala Vaisilaeli.

22 Kangi Yoshua akajova, "Hinu mudindulayi mulyangu wa mbugu na muniletelayi vankosi muhanu venavo." 23 Na vene vakawusa vankosi muhanu vala kwa kuvala ya mbugu, Nkosi wa ku Yelusalemu na nkosi wa ku Hebuloni na nkosi wa ku Yalimuti na nkosi wa ku Lakishi na nkosi wa ku Eguloni. 24 Pevaletwili vankosi muhanu venavo kwa Yoshua, ndi mwene akavakemela Vaisilaeli voha na kuvajovela vakulu va manjolinjoli veahambili navu kungondo vala, "Mubwela apa muvalivatila vankosi ava musingu zavi." Na vene vakakita chenicho. 25 Kangi Yoshua akavajovela manjolinjoli vala, "Mukotoka kuvayogopa amala kudenyeka mtima, nambu muvya mwavakekesi na ngangali, ndava muni Bambu Chapanga akuvahengela chenicho vamakoko vinu voha vemuhamba kutovana navu." 26 Pa genago Yoshua akavatola vankosi muhanu vala na kuvakoma kwa kuvagongomela mumikongo muhanu na kuvaleka vayinjila mbaka chimihi. 27 Lilanga pelahegalili kutipama, Yoshua akalagisa vavahulusa muhikongo yeyavagongomili mula na vakavataga kumbugu yevajihihili kula. Pevamali kuvadumbukisa mwenumo vakadinda pamulyangu wa mbugu kwa maganga gavaha na maganga genago gavii penapo mbaka lelu.

28 Ligono lenilo Yoshua autolili muji wa Makeda, akamukoma kwa upanga nkosi wa mwenumo pamonga na vandu voha vevavii mumuji wenuwo, amulekili lepi hati mundu mumonga. Amukitili nkosi wa Makeda ngati cheamukitili nkosi wa ku Yeliko.

29 Kangi Yoshua akawuka mwene pamonga na Vaisilaeli voha vakahuma ku Makeda na kuhamba kuuzangila muji wa Libina. 30 Bambu Chapanga avapelili Vaisilaeli uhotola wa kuutola muji wenuwo pamonga na nkosi waki na kuvya wakwavi. Yoshua akavakoma kwa upanga vandu voha va muji wenuwo changali kumleka mumi hata mundu mumonga. Vamukitili nkosi wa Libina ngati chevamukitili nkosi wa ku Yeliko.

31 Pevamalili genago Yoshua pamonga na Vaisilaeli voha vakawuka mu Libina vakahamba ku Lakishi na kuvika kambi kulolesana na muji wula kangi vakauzangila. 32 Bambu Chapanga akavahotosa Vaisilaeli kuutola muji wa Lakishi, Yoshua autolili muji wenuwo muligono la pili. Vakavakoma vandu voha vevavi mumuji wenuwo kwa upanga ngati chevakitili ku Libina. 33 Lukumbi lulwolo Holamu nkosi wa ku Gezeli abwelili kuvatangatila vandu va Lakishi, nambu Yoshua akamukoma pamonga na manjolinjoli gaki na amulekili lepi hati mundu mmonga.

34 Kangi Yoshua pamonga na Vaisilaeli voha vakawuka pa Lakishi na kuhamba ku Eguloni na vakautindila muji wenuwo na kuuzangila. 35 Vakautola muji wenuwo ligono lilolo na kuukita uvya wavi vakavakoma vandu voha va mwenumo, ngati chevakitili ku Lakishi.

36 Kangi Yoshua pamonga na Vaisilaeli voha vakawuka pa Eguloni na kuhamba kuuzangila muji wa Hebuloni, 37 na vakautola uvya wavi. Vakavakoma kwa upanga vandu voha va mwenumo pamonga na nkosi wavi, vakahalabisa njwee na hijiji yoha yeyautindili muji wenuwo. Vakavakoma voha ngati chevakitili kula ku Eguloni.

38 Kangi Yoshua pamonga na Vaisilaeli voha vakang'anamuka na kuuzangila muji wa Debili. 39 Vakautola muji wenuwo na nkosi wavi pamonga na hijiji yoha yeyiutindili muji wenuwo, vakavakoma vandu voha vevavii mwenumo changali kumuleka hati mundu mumonga. Vaukitili muji wenuwo wa Debili ngati chevaukitili muji wa Hebuloni na muji wa Libina na vankosi vaki.

40 Hinu chenicho ndi Yoshua cheautolili mulima woha na kuvahotola vankosi va pandu pa hitumbi upandi wa kusini, na pandu pa mitambu na mumihelelu. Akomili kila chindu ngati chealagizwi na Bambu Chapanga, Chapanga wa Isilaeli. 41 Yoshua akavahotola vandu voha na kutola miji yoha kuhuma ku Kadeshi Balinea mbaka ku Gaza na kuhuma pandu poha pa Gosheni mbaka ku Gibeoni. 42 Yoshua avatovili vankosi ava voha pamonga na milima yavi, kwa lukumbi lumonga muni Bambu Chapanga wa Isilaeli atovini nawu ndava yavi. 43 Kangi Yoshua pamonga na Vaisilaeli voha vakawuya kukambi zavi kula ku Giligali.