1 Kangi Yabini nkosi wa ku Hazoli peayuwini kuvya Vaisilaeli vahotwili, akapeleka ujumbi kwa Yobabu nkosi wa ku Madoni na kwa nkosi wa ku Shimloni, na kwa nkosi waku Akishafu, 2 na kwa vankosi vevavii kuvitumbi vya ku kaskazini, na vevavi ku likemba la mfuleni Yoludani upandi wa kusini mwa liliva Galilaya, na vevavii pamtambu pahi ya hitumbi ya kaskazini na vevevii Napoti Doli kuupandi welitipama lilanga. 3 Apeliki mewa ujumbi kwa nkosi wa Vakanaani vevavii kuupandi welihumila lilanga na vevavii kwelitipama lilanga mwa mfuleni Yoludani na kwa nkosi wa Vaamoli na kwa nkosi wa Vahiti na kwa nkosi wa Vapelizi na kwa nkosi wa Vayebusi vevatamili kuvitumbi na kwa nkosi wa Vahivi vevatamili pahi ya chitumbi Helimoni kumulima wa Mizipa. 4 Venavo voha vakabwela na manjolinjoli vavi voha vavii vamahele neju ngati msavati wa kubwani, pamonga na falasi na mutuka za kuhutwa na hinyama yamahele. 5 Vankosi venavo voha vakawunganisa manjolinjoli vavi vakavika kambi pamonga ku chinyepa cha Melomu muni kutovana na Vaisilaeli.

6 Bambu Chapanga akamujovela Yoshua, "Kotoka kuvayogopa venavo, muni chilau lukumbi ngati ulu yati nikuvapela Vaisilaeli uhotola wa kuvakamula na kuvakoma voha, yati mudumula misekete ya falasi zavi na kuyocha motu mutuka zavi za ngondo." 7 Hinu Yoshua pamonga na manjolinjoli vaki voha vakavahambila chigafula na kukomana navu pachinyepa cha ku Melomu. 8 Penapo Bambu Chapanga akavahotosa Vaisilaeli kuvahotola vene, vakavatova na kuvavingisana mbaka ku Sidoni Yikulu mbaka Misilefoti Maimu, mbaka mulikemba la Mizipa kuupandi welihumila lilanga. Vaisilaeli vakavatova na kuvakoma voha. 9 Yoshua avakitili chilachila ngati chealagiswi na Bambu Chapanga, akadumulana misekete ya falasi zavi zoha na kuziyocha motu mutuka zavi za ngondo zoha.

10 Lukumbi lulwo Yoshua ang'anamwiki na kuwuya kuutola muji wa Hazoli, akamukoma nkosi wa muji wenuwo kwa upanga. Penapo pakutumbula mujiwenuwo wavii muji ukulu wa unkosi zenizo zoha. 11 Ndi akavakoma na vandu voha vevavii mumuji wenuwo kwa upanga. Amulekili lepi hati mundu mmonga avya mumi, kangi akautinyisa kwa motu muji wa Hazoli.

12 Mewa Yoshua ayitolili miji yila yoha ya vankosi vala, na vankosi vaki akavakoma voha njwe, ngati chila Musa mtumisi wa Bambu Chapanga chealagaziwi. 13 Vaisilaeli vaitinyisi lepi kwa motu miji yeyajengiwi kuvitumbi vya avo vankosi, nambu Yoshua auyochili motu nga muji wa Hazoli. 14 Vaisilaeli vakatola vindu vyoha pamonga na mifuya yoha ya miji yeniyo, nambu vavakomili kwa upanga vandu voha va mumiji yeniyo, vamulekili lepi hati mmonga. 15 Ngati Bambu Chapanga cheamulagisi Musa mtumisi waki, mewawa Musa akamulagisa Yoshua, na mwene Yoshua akakita goha bwina ngati chila Bambu Chapanga cheamlagizi Musa.

16 Yoshua akautola mulima woha, pandu pa hitumbi na kila pandu pa kusini, pandu poha pa Gosheni na pandu na pamtambu, na pandu pa likemba la mfuleni Yoludani na hitumbi ya Isilaeli pamonga na pandu paki pa mumitambu, 17 Yoshua avakamwili na kuvakoma vankosi voha va milima yeniyo, kuhuma chitumbi cha Halaki papipi na Seili, mbaka ku Baali Gadi kulikemba la Lebanoni, pahi ya chitumbi cha Helimoni. 18 Yoshua akomini ngondo na vankosi venavo voha kwa miyaka yamahele. 19 Kawaka muji wowoha pandu penapo wewakitili lilaganu la uteke na Vaisilaeli, ngavala Vahivi vevitama ku muji wa Gibeoni, Vaisilaeli vakayitola miji yingi yoha kwa kutovana ngondo. 20 Muni Bambu Chapanga mwene ayikitili mitima ya vandu va milima yeniyo hivya yinonopu muni vatovanayi na Vaisilaeli, muni vavakomakesa njwe changali lipyana, ngati Bambu Chapanga cheamulagizi Musa.

21 Mumagono genago, Yoshua akahamba kuvakoma Vaanaki vevatamayi ku mulima wa hitumbi, kuhuma ku Hebuloni mbaka ku Debili na ku Anabu na kuhuma mulima woha ya hitumbi ya Yuda na Isilaeli. Yoshua avakomakisi njwe vandu venavo pamonga na miji yavi. 22 Asigalili lepi Muanaki hati mmonga ku mulima wa Isilaeli, nambu vasigalili vadebe ndu ku miji ya Gaza na Gati na Ashidoli.

23 Hinu Yoshua akahitola mulima wenuwo woha ngati Bambu Chapanga cheamlagizi Musa. Na mwene Yoshua akavapela mulima wenuwo Vaisilaeli uvya wavi, ngati chevagavaniki mumakabila gavi.

Kangi vandu vakatama kwa uteke changali ngondo kavili.