1 Vachilongosi va lukolo za Valawi vakavahambila mteta Eleazali na Yoshua mwana wa Nuni, pamonga na vakulu va kolo za makabila ga Isilaeli, 2 ku Shilo mumulima wa Kanaani na vakavajovela, "Bambu Chapanga amulagizi Musa kuvya tete tipewa pandu pa kutama, mewa tipewa na dasi ndava ya kudimila mifuya yitu." 3 Hinu kulandana na malagizu ga Bambu Chapanga, Vaisilaeli vakahagula pandu mugati ya mulima wevitama vakahagula miji na hijiji ndava ya kudimila mifuya ndi vakavapela Valawi pavya pandu pavi.

4 Gudugudu ya kutumbula yavagwilili vandu va lukolo lwa Kohati. Valawi vevavii viveleku vya mteta Aloni vapewili miji kumi na yidatu kuhuma ku makabila ga Yuda na Simioni na Benjamini. 5 Vavelekwa vangi vevasigalili va lukolo lwa Vakohati vapewili kwa gudugudu miji kumi kuhuma mumakabila ga Efulaimu na Dani na yapinga ya likabila la Manase.

6 Vachiveleku va lukolo lwa Gelishoni vapewili kwa gudugudu miji kumi na yidatu kuhuma mumakabila ga Isakali na Asheli na Nafutali na yapinga ya likabila la Manase ku Bashani.

7 Vachiveleku va lukolo lwa Melali, vapewili miji kumi na hivili kuhuma pandu pa milima ya makabila ga Lubeni na Gadi na Zabuloni.

8 Hinu Vaisilaeli vavapelili Valawi miji yeniyo pamonga na pandu pa kudimila mifuya ngati Bambu Chapanga chamulagizi Musa.

9 Genaga ndi mahina ga miji kuhuma mumakabila ga Yuda na Simioni yevapewili kwa gudugudu, 10 viveleku vya mteta Aloni vevavili va lukolo lwa Vakohati ndi vevahumili mulukolo lwa likabila la Valawi. Venavo ndi vavi vatumbula kupata pandu pavi kwa njila gudugudu. 11 Vapewili muji wa Kiliati Alaba hinu ukemiwa Hebuloni, pamonga na pandu paki pa kudimila mifuya pamulima wa hitumbi ya Yuda. Alaba avii dadi wa Anaki. 12 Nambu migunda na hijiji yeyatindili muji wa Hebuloni, apewili Kalebu mwana waki Yefune vivya vyaki.

13 Hinu viveleku vya mteta Aloni vapewili muji wa Hebuloni, muji ukulu kwa kutilalila mundu yoyoha mwatakiwi ndava ya kukoma, pamonga na muji wa Libina, 14 na muji wa Yatili pamonga na dasi zaki za kudimila mifuya na muji wa Eshitemoa na dasi zaki za kudimila, 15 na muji wa Holoni pamonga na dasi yaki kudimila mifuya, na muji wa Debili pamonga na dasi yaki ya kudimila mifuya, 16 na muji wa Aini pamonga na dasi yaki ya kudimila mifuya muji wa Yuta pamonga dasi yaki ya kudimila mifuya na muji wa Beti Shemeshi pamonga na dasi yaki ya kudimila mifuya. Miji yeniyo tisa yeyavii pandu pa makabila genago gavili ga Yuda na Simioni. 17 Kuhuma mulikabila la Benjamini vapewi miji ya, muji wa Gibeoni na Geba pamonga na dasi zaki za kudimila mifuya, 18 na muji wa Anatoti pamonga na dasi yaki ya kudimila mifuya na Alimoni pamonga na dasi zaki za kudimila mifuya, miji yoha yavapewili yavii mcheche. 19 Miji yoha ya yevapewili viveleku vya mteta Aloni vala vevavii vamteta ndi yavii kumi na hidatu pamonga na dasi zaki za kudimila mifuya.

20 Vachiveleku vevasigalili va lukolo lwa Kohati mewa vavii va likabila la Valawi, vapewili kwa gudugudu miji yavi kuhuma mulikabila la Efulaimu. 21 Ku mulima wa vidunda ya Efulaimu vandu venavo vapewili muji wa Shekemu wewavii wa kutilalila mundu mweakomili changali kugana pamonga na dasi yaki ya kudimila na muji wa Gezeli na dasi yaki ya kudimilamila mifuya, 22 na muji wa Kibizaimu pamonga na dasi yaki za kudimila mifuyana na Beti Holoni pamonga na dasi zaki za kudimila mifuya. Miji yoha yavapewili yavii mcheche. 23 Kuhuma mu ndima ya likabila la Dani vapewili miji Eliteke pamonga na dasi zaki za kudimila mifuya na muji wa Gibetoni pamonga na dasi zaki za kudimila mifuya, 24 pamonga na muji wa Aiyaloni na dasi yaki za kudimila mifuya na muji wa Gati Limoni na dasi yaki za kudimila mifuya. Miji yoha yevapewili ndi yavii mcheche. 25 Kuhuma mu yapinga ya likabila la Manase vapewili yivili, muji wa Taanaki na Gati Limoni pamonga na dasi zaki za kudimila mifuya. Miji yoha yevapewili yavii yivili. 26 Miji yoha kumi pamonga na dasi zaki za kudimila mifuya vapewi vandu va lukolo lwa Vakohati zila zezasigalili.

27 Vandu va munyumba za Valawi vevavii va lukolo lwa Gelishoni, vapewili miji hivili yeyavi muyapinga ya pandu pa likabila la Manase, Muji wa Golani weuvi ku Bashani, muji wenuwo wavii umonga pagati ya miji ya kutilalila mundu mweakomili changagana na dasi yaki ya kudimila mifuya, na muji wa Beeshi Tela pamonga na dasi zaki za kudimila mifuya. Miji yoha yevapewili yavii yivili. 28 Kuhuma mulikabila la Isakali, vapewili muji wa Kishioni na dasi yaki ya kudimila mifuya na muji wa Dabelati na dasi yaki ya kudimila mifuya, 29 na muji wa Yalimuti na dasi yaki ya kudimila mifuya na muji wa Eni Ganimu pamonga na dasi zaki za kudimila mifuya, miji yoha yavapewili ndi yavii mcheche. 30 Kuhuma mundima ya likabila la Asheli vapewili muji wa Mishali na dasi yaki ya kudimila mifuya na muji wa Abidoni na dasi yaki ya kudimila mifuya, 31 na muji wa Helikati na dasi yaki ya kudimila mifuya na muji wa Lehobu pamonga na dasi yaki za kudimila mifuya. Miji yoha yavapewili yavii mcheche. 32 Kuhuma mumlima wa likabila la Nafutali vapewili muji wa Kedeshi weuvii ku Galilaya, wewavii wa kutilalila mundu mweakomi changagana na dasi yaki ya kudimila mifuya, na muji wa Hamoti Doli na dasi yaki ya kudimila mifuya na muji wa Kalitani na dasi yaki ya kudimila mifuya. Miji hoha yevapewili yavii yidatu. 33 Miji yoha yevapewili vandu va lukolo lwa Vagelishoni yavii kumi na hidatu pamonga na dasi zaki za kudimila mifuya.

34 Valawi vangi vevasigalili va lukolo lwa Melali na vene vapewili miji kuhuma mu likabila la Zabuloni, miji yeniyo yavii Yokineamu na dasi yaki ya kudimila mifuya na muji wa Kalita na dasi yaki ya kudimila mifuya, 35 na muji wa Dimna na dasi yaki ya kudimila mifuya na muji wa Nahalali na dasi yaki ya kudimila mifuya, miji yoha yevapewili yavii mcheche. 36 Kuhuma mundima ya likabila la Lubeni, vapewili muji wa Bezeli na dasi yaki ya kudimila mifuya na muji wa Yahazi na dasi yaki ya kudimila mifuya, 37 na muji wa Kedemoti na dasi yaki ya kudimila mifuya na muji wa Mefaati na dasi yaki ya kudimila mifuya. Miji yoha yavapewili yavii mcheche. 38 Kuhuma mundima ya likabila la Gadi, vapewili muji wa Lamoti weuvi ku Gileadi, na wene wavii wa kutilalila mundu mweakomili changagana na dasi yaki ya kudimila mifuya na muji wa Mahanaimu na dasi yaki ya kudimila mifuya, 39 na muji wa Heshiboni na dasi yaki ya kudimila mifuya na muji wa Yazeli na dasi yaki ya kudimila mifuya na dasi zaki za kudimila mifuya. Miji yoha yevapewili yavii mcheche. 40 Hinu miji yoha yevapewili lukolo lwa Vamelali kwa gudugudu, lukolo lwelwasigalili lwa Valawi, yavii miji kumi na hivili na dasi yaki ya kudimila mifuya.

41 Miji yoha yevapewili Valawi pamulima wevatolili Vaisilaeli na kuukita kuvya wavi, yavii miji alubaini na nane na dasi zaki za kudimila mifuya. 42 Kila mmonga pagati ya miji yeniyo yatindiwi na dasi yaki ya kudimila mifuya.

43 Penapo Bambu Chapanga akavapela Vaisilaeli mulima woha ngati chavahadili vagogo wavi. Na vene vayitolili na kutama mwenumo. 44 Bambu Chapanga akavapela uteke kila pandu mumulima woha ngati cheavahadili vagogo vavi. Kawaka hati likoko mmonga mwealingili kutovana nawu na kuvahotola, muni Bambu Chapanga avapelili uhotola Vaisilaeli kuvahotola makoko vavi voha. 45 Kawaka hati chomonga cheavahaidi Bambu Chapanga chechabelili kutimila kwa Vaisilaeli, kila cheavahaidili chahumalili.