1 Vankosi voha vevatamili kumwambu ya mfuleni Yoludani na kumulima wa vidunda na pamtambu woha wa kumbwani ya nyanja yivaha Meditelania yeyilolesana na Lebanoni, ndi vavii vankosi va Vahiti na va Vaamoli na va Vakanaani na va Vapelizi na va Vahivi na va Vayebusi, ndi pevayuwini malovi genago, 2 vakakonganeka pamonga vakavya chindu chimonga muni vakomana ngondo na Yoshua na Vaisilaeli.

3 Nambu vakolonjinji va ku Gibeoni pevayuwini mambu gala goha Yoshua geavakitili vandu va ku Yeliko na ku Ai, 4 vakakitili udesi. Vakahamba na kujikita ngati vajumbi, kuni vavi na punda vevazigegisi ndwika za magunila gegalali na vihaku vya hikumba vya divayi vyevilali na vitotiwi. 5 Vakawala champali vyevilalili, na kuwala nyula zezilalili na kulya vyakulya viyumu na vyevii na ukungu. 6 Hinu vakamuhambila Yoshua kukambi ku Giligali vakamujovela mwene pamonga na Vaisilaeli, "Tihumi ku mulima wa kutali, chondi tiyupa tikita lilaganu na tete."

7 Nambu Vaisilaeli vakavayangula Vahivi, "Tihotola wuli kukita lilaganu na nyenye? Pangi nyenye mwitama papipi na tete."

8 Navene vakamujovela Yoshua, "Tete tavahengaji vaku."

Yoshua akavakota, "Nyenye ndi mwavayani? Mwihuma kwoki?"

9 Na vene vakamuyangula, "Tete tavatumisi vaku, tihumili kumulima wa kutali neju na tibwelili muni tiyuwini ulumba wa liina la Bambu Chapanga winu. Tayuwini gala goha geahengili kumulima wa Misili. 10 Tiyuwini goha geavahengili vankosi vavili va Vaamoli vevatamayi kwelihumila lilanga, kumwambu ya mfuleni Yoludani, Sihoni nkosi wa Heshiboni na Ogu nkosi wa Bashani mweatalalilayi ku Ashitoloti. 11 Penapo ndi vagogo vitu pamonga na vandu voha va mulima witu, vakatijovela titolayi chakulya cha mulugendu na tibwelayi kukongana na nyenye na kuvajovela kuvya tete ndi tavatumisi vinu na mukitayi lilaganu na tete. 12 Lola libumunda lenili lavii la motu letakungili petatumbwili lugendu kubwela kwinu, nambu hinu lola chila cheupolili na kulula. 13 Vihaku vyenivi vya vikumba tamemisi divayi lukumbi pevyavii vyamupya, nambu hinu vilalili. Hati nyula pamonga na champali zitu zilali muni tagendili lugendu lutali neju."

14 Hinu Vaisilaeli vakapokela vyakulya vila changali kumkota Bambu Chapanga. 15 Ndi Yoshua akakita navu lilaganu la uteke na kuvaleka vatama mumi. Vachilongosi va msambi wa Vaisilaeli vvahaidila kuvya yati vikita ngati chevalagini.

16 Paligono la datu lukumbi vamali kuvika malaganu genago na Vagebioni, Vaisilaeli vakamanya kuvya vandu venavo vavii vandu vevitama papipi yavi. 17 Hinu Vaisilaeli vakatumbula lugendu, paligono la datu vakahika ku miji yavi ya Gibeoni na Kefila na Beloti na Kiliati Yealimu. 18 Nambu Vaisilaeli vavazangili lepi muni vachilongosi va musambi wa Vaisilaeli vavalapili kwa liina la Bambu Chapanga, Chapanga wa Isilaeli. Penapo vandu voha vakavangungu'tila vachilongosi vavi, 19 Nambu vachilongosi voha vakauyangula msambi wa vandu vavi, vakajova, "Ndava muni tavalapisi kwa liina la Bambu Chapanga, Chapanga wa Vaisilaeli, hinu tihotola lepi kuvakitila gahakahu. 20 Chenichi ndi chetikuvakitila yati tikuvaleka vatama mumi, muni ligoga likoto kuvya panani yitu kwa kudenya chilapu chetilapili." 21 Vakayendelela kujova, "Muvaleka mumi, nambu vavyayi vandu va kutibayulila sagala na kutinegela manji msambi woha wa Vaisilaeli." Ndi ahadi yevavikili vachilongosi kwavi yikavya chenicho.

22 Penapo Yoshua akavakemela Vagibeoni na kuvajovela, "Ndava kyani nyenye mwatikongili tete kuvya mwihuma kumilima ya kutali na kumbi mwitama bahapa papipi na tete? 23 Hinu nyenye muhamuliwi na vangi pagati yinu yati mwivya vavanda va kubayula sagala na kunega manji ndava ya nyumba ya Chapanga wangu."

24 Na vene vakamuyangula Yoshua, "Takitili chenicho tavatumisi vaku muni tajoviwi hotohoto kuvya Bambu Chapanga winu, amlagizi Musa mtumisi waki kuvya avakomakesa vandu voha na kuvapela nyenye mulima wenuwu. Ndi takitili chenicho muni tavayogwipi nyenye yati mukutikoma. 25 Hinu tete tivii muutalalila winu na mwihotola kutikitila chochoha chemwiwona chabwina kutikitila." 26 Ndi Yoshua akavasangula vandu vala kuhuma kwa Vaisilaeli muni vakotoka kukomiwa. 27 Kuhumila ligono lenilo Yoshua akavakita Vagibeoni kuvya vandu va kudumula sagala na kunega manji ndava ya kuvahengela msambi wa Isilaeli na ndava ya pandu pa kuwusila teta Bambu Chapanga, pandu popoha pepahaguliwi. Na Chenicho ndi chevikita mbaka lelu.