1 Vandu va likabila la Manase mweavii mvelekanu wa kutumbula wa Yosefu, vapewili pandu pavi. Mewa ndava ya Makili, mvelekanu wa kutumbula wa Manase. Makili avii dadi wa Gileadi, amalili kupewa miji ya Gileadi na Bashani kwa njila ya kukina gudugudu, muni avii mkekesi kungondo. 2 Vandu vangi va likabila la Manase vevasigalili vapewili pandu pavi kwa njila ya kukina gudugudu kulandana na lukolo zavi. Lukolo zenizo ndi zavii za Abiezeli na Heleki na Asilieli na Shekemu na Hefeli na Shemida. Venavo voha ndi vavii vachiveleku va chigosi va Manase mwana wa Yosefu, venavo ndi vavii vadadi va lukolo zavi. 3 Nambu Selofehadi mwana wa Hefeli, mwana wa Gileadi, mwana wa Makili, mwana wa Manase, avii lepi na vana va chigosi, nambu avii na vana va chidala nduu, mahina gavi ndi Mahala na Noa na Hogila na Milika na Tilisa. 4 Vasikana venavo vakamubwelela mteta Eleazali na Yoshua, mwana wa Nuni na vachilongosi vangi vakavajovela, "Bambu Chapanga amulagizi Musa atigavila na tete mulima ngati chevigaviwa vagosi va likabila litu." Hinu Yoshua akavapela pandu pavi ngati chevapewili valongo vavi va chigosi kulandana na lilagizu la Bambu Chapanga. 5 Ndava yeniyo likabila la Manase vapewili pandu kumi pa mulima pamonga na mlima wa Giliadi na Bashani yeyavii kuupandi waliumila lilanga wa mfuleni Yoludani, 6 ndava muni vasikana va likabila la Manase vapewi mulima na kuvya wavi ngati chevapewili vagosi va likabila lavi. Mlima wa Giliadi wavii wa chiveleku cha vana va Manase vevasigalili.

7 Mubaka wa mulima wa likabila la Manase watumbwili ku Asheli mbaka ku Mikimetati upandi welihumila lilanga wa Shekemu; mubaka wavi ukapita kusini kuhuma pala mbaka kuvahikila vandu va Eni Tapua. 8 Mulima wa Tapua wavii waki Manase, nambu muji wa Tapua wewavii mumbaka, wene wavi wa viveleku vya Vaefulaimu. 9 Kangi mubaka wenuwo ukahelelela mbaka ku kapela ka Kana. Kwavili na miji ya Vaefulaimu pagati ya miji ya likabila la Manase. Nambu mubaka wa Manase wavili upandi wa kasikazini mwa kapela kala na kumalakisila ku nyanja ya Meditelanea. 10 Mulima wa kusini mwa kapela kala yavi ya likabila la Efulaimu na pandu ku kasikazini ya kapela kala wavii wa likabila la Manase. Mulima wa Manase wadandasiki mbaka kunyanja na kubakana na Asheli kwa upandi wa kasikazini, na upandi welihumila lilanga wabakini na mulima wa Isakali. 11 Manase avii na miji ku Isakali na ku Asheli miji yeniyo ndi Betisheani pamonga na hijiji yaki na Ibileamu na miji yaki na vakolonjinji va Doli na miji yaki na vakolonjinji va Endoli na miji yaki na vakolonjinji va Taanaki na miji yaki na vakolonjinji va Megido na miji yaki, na hijiji yeyitindila miji yeniyo. 12 Nambu viveleku vya Manase vahotwili lepi kuvavinga vakolonjinji va miji yeniyo, ndava muni Vakanaani vang'ang'anili kutama mwenumo. 13 Ndi Vaisilaeli pevavii na makakala neju, vahotwili lepi kuvavinga Vakanaani nambu vavang'ang'anisi ndu vavahengela mahengu geginonopa ndava yavi.

14 Viveleku vya Yosefu vakamuhambila Yoshua, vakamjovela, "Ndava kyani utipelili pandu pamonga ndu pa mulima kuvya pitu? Tete tavamahele neju muni Bambu Chapanga atimotisi."

15 Yoshua akavayangula, "Ngati nyenye mwavamahele neju na mulima wa vandu va likabila la Efulaimu weuvili muhitumbi, ndi udebe neju kwinu, hinu muhamba mkadumula kudasi yeyivi ku mulima wa Vapelizi na Valefai, muni mukajikitila pandu pakutama."

16 Vakamyangula, "Chakaka kuvya mulima wa vitumbi ukutitosa lepi, mewa vene Vakanaani voha vevitama pamulima wa mtambu vana mutuka za lyuma zezihutwa na hinyama, mewawa na voha vevitama ku Beti Shani pamonga na hijiji yaki, pamonga na vala vevitama ku Likemba la Yezileeli."

17 Nambu Yoshua akavajovela vandu va chiveleku cha Yosefu, ndi likabila la Efulaimu na Manase, "Chakaka nyenye mwavamahele neju na muna makakala neju. Yiganikiwa lepi mupatayi pandu pamonga ndu. 18 Nambu mewa mulima wa hitumbi yati uvya winu, pamonga kuvya hinu ndi dasi ndu. Yati mukuufyeka woha na kuutalalila tangia upandi uwu mbaka upandi wungi. Yati mukuvawusa Vakanaani hati ngati vanamutuka za lyuma gegihutwa na hinyama na vana makakala mwihotola kuvavinga mwenumo."