1 Pevamali kuvahotola vandu va mulima wula, ndi msambi woha Vasilaeli vakakonganeka ku Shilo na kuyimika lindanda la kukonganekela ndava ya Bambu Chapanga. 2 Pagati yavi gasigalili makabila saba ga vandu va Isilaeli gegavii gakona kupewa pandu pa mulima kuvya wavi. 3 Penapo Yoshua akavajovela Vaisilaeli, "Wu, yati mwilindalila mbaka ndali kuhamba kuutola mulima kuvya winu, mulima wula wemwapewili na Bambu Chapanga, Chapanga wa vagogo vinu? 4 Hinu mujihagulilayi vandu vadatu kuhuma mukila likabila yati nikuvatuma vandu venavo vahamba kuung'mesa mulima woha chauvili na kumanya pandu pevigana pavya pavi kangi vabwela kunijovela nene. 5 Na vene yati vakuugavanisa mulima wenuwo pandu saba. Likabila la Yuda yati livya na pandu paki upandi wa kusini na likabila la Yosefu upandi wa kasikazini. 6 Mutendekeha malovi gegatimili kuvala pandu poha saba na kuniletela. Kangi nene yati nikuvagavanisila kila likabila pandu paki kwa njila ya gudugudu, palongolo ya Bambu Chapanga witu. 7 Nambu Valawi yati vipewa lepi pandu popoha pagati yinu, muni yati vipata vyoha vyevigana kuhuma mukumuhengela Bambu Chapanga kwa lihengu lavi la umteta. Na likabila Gadi na Leubeni na yapinga ya likabila la Manase vamalili kupewa pandu pavi ku Yoludani upandi welihumila lilanga. Musa mtumisi wa Bambu Chapanga ndi mweavapelili pandu penapo."

8 Kangi vandu venavo vakatumbula lugendu lwa kuhamba kuulola mulima cheuvii. Yoshua akavalagiza, "Muhambayi mukaukotakesa mulima na mukayandika cheuvili mulima wenuwo, na mukamala muwuyayi kunijovela, na nene yati nikinisa gudugudu palongolo ya Bambu Chapanga bahapa pa Shilo muni mumanya pandu pemwipewa." 9 Hinu vagosi venavo vakatindila mulima woha, vakayandika kuvala mulima wenuwo cheuvili na pandu poha saba pamonga na miji yaki, kangi vakawuya kwa Yoshua kukambi ku Shilo. 10 Kwenuko ku Shilo, Yoshua akakinisa gudugudu ndava yavi palongolo ya Bambu Chapanga, akaugavanisa kwa Vaisilaeli kulandana na makabila gavi.

11 Gudugudu ya kutumbula yavapatili Vandu va likabila la Benjamini ndi vatumbwili kupewa pandu pa mulima, lukolo kwa lukolo. Pandu pevapewili pavi pagati ya likabila la Yuda na likabila la Yosefu. 12 Kwa upandi wa kasikazini mubaka wavi watumbwili pa mfuleni Yoludani, ukapitila kuupandi wa kasikazini mwa mihelelu ya Yeliko na kuhamba kuupandi welitipamila lilanga na kuyingila mumulima wa vitumbi, na kuhumalila kulukongolo lwa Beti Aveni. 13 Kuhuma penapo, mubaka wenuwo ukahelelela pa muhelelu wa kusini mwa Luzu mana yaki Beteli na kuhelela mbaka ku Ataloti Adali muchitumbi cha kusini mwa Beti Holoni ya upandi wa kunyasi. 14 Kuhuma kuchidunda chechilolesana na Beti Holoni upandi wa kusini mubaka wula ukatindila kusini kuhamba kuupandi welitipamila lilanga, na ukahumila ku Kiliati Baali mana yaki Kiliati Yealimu, muji wa likabila la vandu va Yuda. Wenuwo ndi wewavi mubaka kwa upandi welitipamila lilanga. 15 Upandi wa kusini mubaka watumbwili mumihana ya upandi wa kasikazini mwa muji wa Kiliati Yealimu, ukahika ku Efuloni na kuhamba mbaka kuchinyepa cha manji ga Nefutoa. 16 Kangi mubaka ukahelela mbaka pachitumbula chitumbi chechilolesana na Likemba la mwana wa Hinomu, kasikazini mwa likemba la Valefai. Mubaka wenuwo ukayendelela kunyasi ya likemba la Hinomu na kupitila mhelelu wa kusini mwa muji wa Vayebusi ukahika mbaka ku Eni Logeli. 17 Kangi mubaka ukang'anamuka na kuhamba kuupandi wa kasikazini mbaka ku Eni Shemeshi, ukapitila ku Geliloti yeyilolesana na njila ya kuhamba ku Adumimu, ukahelelela mbaka ku liganga la Bohani mwana wa Lubeni. 18 Kuhuma penapo, mubaka ukayendelela kasikazini mwa Beti Alaba na kumalakisila kulikemba la mfuleni Yoludani. 19 Kangi ukayendelela kuupandi wa kasikazini wa chidunda cha Beti Hogula na kumalikisila kasikazini neju ku nyanja ya mwinyu, pandu pewingilila mfuleni Yoludani. Wenuwu ndi mubaka waki wa kuupandi wa kusini. 20 Mfuleni Yoludani ndi wavii mubaka waki kwa kuupandi welihumila lilanga. Chenicho ndi cheyavikiwi mibaka ya milima yevapewi vandu va lukolo za likabila la Benjamini kuvya wavi kutindila pandi zoha kulandana na lukolo zavi.

21 Likabila la Benjamini kulandana na lukolo kwa lukolo yavii na miji ya, Yeliko na Beti Hogila na Emeki Kesisi, 22 na muji wa Beti Alaba na muji wa Zemalaimu na muji wa Beteli, 23 na muji wa Avimu na muji wa Pala na muji wa Ofila, 24 na muji wa Kefali Amoni na muji wa Ofini na muji wa Geba. miji yoha yavapewili ndi yavii kumi na yivili pamonga na hijiji yaki. 25 Miji hingi yavi Gibeoni na muji Lama na muji wa Beeloti, 26 na muji wa Mizipa na muji wa Kefila na muji wa Moza, 27 na muji wa Lekemu na muji wa llipeeli na muji wa Talala, 28 na muji wa Zela na muji wa Ha Elefu na muji wa Yebusi mana yaki Yelusalemu na muji wa Gibea na Kiliati Yealimu. miji yoha yavapewili yavii kumi na mcheche pamonga na hijiji yaki. Miji yeniyo yoha ndi yevapewili vandu va likabila la Benjamini kulandana na lukolo zaki.